IPEKULU 28 - Sumi Naga CL (Re-edited) Bible (BSI)

Achinemi Phimini

¹ “Israelmi gholo achinemi shi I qe penike o mu Aaron ngo pa nuli Nadab, Abihu, Eleazar eno Ithamar ishi saghilo.

² Eno no ye o mu Aaron ghenguno akimthe phimini mlalo, ti ye ajuküvü ngo jukivipu shi penike ghenguno ke.

³ No ye atshamgha shikithimi khunoqo lau I no kütshakügha ghungu tsüpüani keno panoqo pelo Aaron phimini mla penike pütsalo, tishianguno pa pelo pa küxü ikhiphepe I chinemi shipenie.

⁴ Panongu no aphimini hipaqo mlani: amla küxa ngo ephod, chijeboike phi, akugho phi, akütsü küküzü phi, eno heqhiphi. Achinemi shi I qe penike panongu no Aaron ngo pa nuli phimini mla pelo.

⁵ Panongu pelo ameshoyi, atsüla, hughai eno huchuyi keu yeho peitha pelo.

⁶ “Panongu no phepheike phi kipili ngo atsüla, hughai eno huchuyi keu yeho eno ameshoyi no aye shikeu pesü ephod mlani.

⁷ Tipau lo ashe kini akeu lono abighi lo xipu kepu akixi kini shino kümtsa tsüghuda küqhani.

⁸ Eno phepheike phi kipili ngo atsüla, hughai, huchuyi keu yeho eno ameshoyi no aye shikeu ephod philo kime no tipau pesü ashi lakhi shi tsüghu kimelo.

⁹ Onyx tu kini pesü tipau lo Israel nuliqo je yepuku lo,

¹⁰ anoghiu lono ayitiu kutolo aje tsügho no atu lakhi lo eno tsügho no atu lakhiu lo ishi yelo.

¹¹ Achi kümlami no jedapu nguthi lo kixi puku ketoi, atu tiküma lo Israel nuliqo je kixi pukulo. Atu tiküma ye ameshoyi bocho lo sülo.

¹² Eno Israel nuliqo kümsükulu shi atu tiküma pesü abighi lo xipu keu ephod phi shou qhilo. Aaron no Ampeu zülo panoqo je kümsükulu shi pa bighi hula hila xapuni.

¹³ Ameshoyi bocho lo atu tiküma medape qhilo,

¹⁴ eno ameshoyi kütsüghü pesü ayikichhe toi mlalo; eno tipau pesü ameshoyi bocho lo medalo.

¹⁵ “Küghakütha mlaküxa lakhi akivishi mlalo. Ephod mlakeu ghola lono phepheike phi kipili ngo atsüla, hughai eno huchuyi keu yeho eno ameshoyi pesü tipau mlalo.

¹⁶ Tipau ye kobidi eno küqhüchhe kini shilo, akushulau ghi akijelau ghi aulotikipshe toku shilo.

¹⁷ Tipau shou atu ajo bidi shi meda pukulo; sardius, topaz, eno carbuncle tuqo no ajo atüghüu shini;

¹⁸ emerald, sapphire, eno mlaputu no akiniu shini;

¹⁹ jacinth, agate, eno amethyst no aküthüu shini;

²⁰ eno beryl, onyx, ngo jasper no abidiu shini. Tipaqo ye ameshoyi bocho lo medani.

²¹ Israel nuliqo je kiqi lono atu chighikini qhini. Tipaqo ye jedapu nguthi toi Israel shiaye chighikini ghenguno lakhikhi lo aje lakhikhi yepukuni.

²² Amlaküxa ghenguno ameshoyi kütsüghü yikichhe mlani.

²³ Eno ameshoyi pesü abocho kini mlano amlaküxa kunguu shekichi lo kimelo,

²⁴ eno ameshoyi yikichhe pesü amlaküxa shekichi lo abocho kini akeu lo kumkho lo.

²⁵ Ashe kütau kini akeu pesü kunguu abighi lo ephod akeu lo kumkho pukulo eno titoi shipüzü agizüu küdau ephod lo kumkho pukulo.

²⁶ Ameshoyi pesü abocho kini mlano amlaküxa ashe alou ephod shelo akeu lo medalo.

²⁷ Ameshoyi bocho kini mlalo, eno ephod lo ala kini abighi qhou akeu azüu küdau kime küqhalo, ti ye ephod lo apokha jukivi shi ghosüpe akeu sholo shilo.

²⁸ Amlaküxa lo ameshoyi bochoqo ye ephod lo abocho akeqo lo atsüla yeho kipili pesü kumkholo, tishianguno amlaküxa ye apokha lo dipesü ngono ijove pemoni.

²⁹ Ikehu kughou Aaron no Akimthe-a lo iloni keno, pa ye Ampeu zülo kümsükulu apenike pa mlo phivilo küghakütha mlaküxa xapu akeu lo Israel nuliqo je yepüakeu xapuni.

³⁰ Eno kughou Aaron no Ampeu zülo ighini keno, küghakütha mlaküxa lo Urim ngo Thummim süpuni, tipaqo ye Aaron mlo shou bepe qhini. Ikehu Aaron ye amlaküxa hipau Ampeu zülo pülhapuju pepuni.

³¹ “Ephod medapu keu phiküzü ye kümtsü atsülaju no shini.

³² Tipau mta lo akütsü chhophe kepu kighipe shilo, eno aphiküzü lo toi ixü pemo nike tipau homxa ghi tsüghadave lo.

³³ Ashe tipau lo atsüla, hughai eno huchuyi keu yeho pesü khaghatu shisülo, ashe vehomxa ghi, tipau mta lo ameshoyi mqü sülo,

³⁴ ameshoyi mqü eno khaghatu lakhikhi chijebobo phishe lo tsüghu sülo.

³⁵ Kughou Aaron no achine kümla shini keno, pa no pepuni, eno amqü ghügha ye kughou pa no Akimthe-a lo Ampeu zülo ilo eno ipeghini keno tileno chilu nani, tishianguno pa ye thimo nani.

³⁶ “Ameshoyi kütsüghü pesü akhu lakhi mlalo, eno jedapu nguthi lakhi lo kixi puku ketoi ameshoyi khu tile, ‘Ampeu lau akimtheshi tsüvae’ ipi yepuku lo.

³⁷ Eno atsüla yeho kipili pesü akütsü küzüphi lo tsüghalo.

³⁸ Ti ye Aaron kishe lo akütsü küzüphi lo dapuni, eno Israelmi no akimthe gho shi pephe tsükeu lo kiukiu kipimi aghimu Aaron no puveni. Pa ye alhokuthu pa kishe lo tipau xapuni, tishianguno Ampeu zülo ikhikulupu shi nani.

³⁹ “Aphiküzü eno akütsü küzüphi ghi phepheike phi akivi no shilo eno apokha ye ayipu no aye shisü ghi mlalo.

⁴⁰ “Aaron nuliqo ghenguno aphiküzü, apokha eno akütsükuqho mlalo. Ti ye angualei eno jukivipu shiniye ke.

⁴¹ Eno tipaqo pesü o mu Aaron eno pa nuliqo pipelo, eno panoqo nukishe pe ikhiphe tsülo, tishianguno panoqo pelo achinemi shi I qe peni.

⁴² Panongu phikümsa küzülu penike alou mini gholo. Tipaqo ye achita lono alukobo kutolo shilo;

⁴³ eno alou mini tipaqo ye Aaron ngo pa nuli no kughou kuposhukulu phiki lo iloghini momu Akimthe-a lo achine kümla shiniye akümlla-khache lo ighini keno tileno pepuni, tikumo aye panongu ye akipimi xapu thive nosae. Hi ye alholo pa eno pa tikughuko athiumi ghenguno ayezah lakhi shi ache nani.