IPEKULU 26 - Sumi Naga CL (Re-edited) Bible (BSI)

AMPEU Kungo Phiki

¹ “Tinguno alau, no ye Ampeu kungo phiki mlalo, tipau lo atsüla, hughai eno huchuyi keu phi eno phepheike phi kipili no nhaqhiphi 10 mlalo; tipaqo lo kütshakügha shi cherubim shisülo.

² Nhaqhiphi lakhikhi no akushulau auxakuchho 12 eno akijelau auxakuchho 2 shilo; nhaqhiphi kümtsü aqhemi shini.

³ Nhaqhiphi pungu ye lakhino lakhi shelo shi tsüghu kimelo, eno pungu ghi lakhino lakhi shelo shi tsüghu kimelo.

⁴ Amqo lakhi lo ala ashekhau kichi lo atsüla phi pesü xikepu puchope qhilo. Titoi amqo akiniu lo ghi ala ashekhau kichi lo xikepu puchope qhilo.

⁵ Nhaqhiphi lakhi lo xikepu pucho 50 mlalo eno amqo akiniu lo ghi ala ashekhau kichi lo xikepu 50 mlalo; xikepu puchope püakeqo ye lakhino lakhi ghüngü lo qhilo.

⁶ Ameshoyi no mlakeu akufupu 50 mlalo, eno tipaqo pesü nhaqhiphi lakhino lakhi lo fukimepe qhilo, tishianguno Ampeu kungo phiki pesü akupuju lakhi shi qhini.

⁷ “Ampeu kungo phiki shou nhaqhi kepu ghenguno ane mhi pesü nhaqhiphi mlalo; nhaqhiphi 11 mlalo.

⁸ Lakhikhi no akushulau auxakuchho 13 eno akijelau auxakuchho 2 shilo. Nhaqhiphi 11 ye aqhemi shilo.

⁹ Amqo lakhi lo ala pungu tsüghu kimelo, lakhiu mqo lono tsügho tsüghu kimelo, eno nhaqhiphi akütsüghou ye aphiki gizüu küqhüchhe kini shivelo.

¹⁰ Nhaqhiphi amqo lakhi shekichi lo apucho 50 eno amqo lakhiu shekichi lo apucho 50 ishi sülo.

¹¹ “Alazayi pesü akufupu 50 mlalo eno apuchoqo lo fukimepe qhilo eno aphiki lo fukimepe akupuju lakhi shi qhilo.

¹² Aphiki lo nhaqhiphi ala ipeghi keu tüxa pesü Ampeu kungo phiki thiu nhape qhilo.

¹³ Akushulau hula-hila aulotikipshe 18 achili akeu ye Ampeu kungo phiki hula-hila küzüpe qhi kepushi nhape qhilo.

¹⁴ Akütsüqa lo nhakepu kütau kini mlalo, lakhi no ambe yiko huchuyi keu eno lakhiu no ane yiko pesü shilo.

¹⁵ “Ampeu kungo phiki ghenguno akuchughi lo aghoghi acacia sü pesü mlalo.

¹⁶ Aghoghi lakhikhi no akushulau auxakuchho 4 eno akijelau aulotikipshe 27 shilo.

¹⁷ Aghoghi lakhikhi lo akichi aphiphi shi axu kini mlano aghoghi lo kime küqhalu kepu shilo. Ampeu kungo phiki lo aghoghi kümtsü titoi mlalo.

¹⁸ Ampeu kungo phiki ghenguno aghoghi hitoi mlani: apeu küdau ghenguno muku;

¹⁹ Aghoghi muku qholo ghükayi no shikeu boqha 40 mlalo, aghoghi lakhi qholo aboqha kini, tipau shelo aboqha gholono akichi chokime kepu shipe qhilo,

²⁰ Ampeu kungo phiki ahuu küdau ghenguno aghoghi 20 shilo,

²¹ eno ghükayi no shikeu boqha 40, aghoghi lakhikhi qholo aboqha kini.

²² Kulolau Ampeu kungo phiki thiu aghoghi tsügho mlalo,

²³ eno acheku ghenguno aghoghi kini shilo.

²⁴ Tipaqo ye aqhou kütüta shini, ikemu akütsüqa loye abocho atüghüu lono chokime küqhani. Ikehu tipaqo ye kinini shi qhini eno acheku kini shipe qhini.

²⁵ Tile aghoghi tache shini eno ghükayi no shikeu boqha no 16, aghoghi lakhikhi qholo axu kinini anani.

²⁶ “Ampeu kungo phiki ako tüxau aghoghi ghenguno acacia sü pesü heküptasü pungu mlalo,

²⁷ eno ako tüxau aghoghi ghengu ghi pungu mlalo, Ampeu kungo phiki kulola azübou aghoghi ghenguno pungu mlalo.

²⁸ Amta lo heküptasü aghoghi mta lo qhikeu ye Ampeu kungo phiki shekichi lakhi lono lakhiu kutolo chokimelo.

²⁹ Ameshoyi pesü aghoghiqo küzülo eno heküptasü ghenguno ameshoyi pesü abocho mlalo, ameshoyi pesü heküptasü ghi küzülo.

³⁰ Tishino I no naghuto lono o piye keu ghola kiqi lono Ampeu kungo phiki shiqhelo.

³¹ “Atsüla, hughai, eno akuhu yeho ngo phepheike phi kipili pesü nhaqhiphi mlalo. Tile kütshakügha shi cherubim shisülo.

³² Tipau pesü ameshoyi no küzü keu acacia sü tsükucho bidi lo ameshoyi kufuyi pesü pufuni eno ghükayi no shikeu boqha bidi shou nhaqhi woni.

³³ Nhaqhiphi pesü aphiki kunguu akufupu ajoshi akeu lo pufu wolo eno puloshoqhi bohu shepe pesü tile nhaqhiphi dolo peiloghi lo. Eno nhaqhiphi no Akimthe-a ngo Shishe Akimthe-a küma dolo kotha kütüta shi qhini.

³⁴ Shishe Akimthe-a lo puloshoqhi bohu shepe ye akünha pesü nhavelo.

³⁵ Nhaqhiphi nguno khalau aphiki jibo ahuu no akibepu qhilo eno apeu no akulu kibepu qhilo.

³⁶ “Aphiki kulaghi lo nhaqhiphi ghenguno atsüla, hughai, eno akuhu yeho ngo phepheike phi kipili pesü ayipu no aye shisü no qhilo.

³⁷ Nhaqhiphi ghenguno acacia sü pesü atsükucho pungu shilo, ameshoyi no ti küzüvelo. Tipaqo kufupu ye ameshoyi no shilo, tipaqo tsükucho ghenguno alazayi pesü aboqha pungu mlalo.