IPEKULU 25 - Sumi Naga CL (Re-edited) Bible (BSI)

Akimthe-a ghenguno Tüqhatüzü

¹ Ampeu no Moses vilo pi,

² “Israelmi pütsa no I ghenguno tüqhatüzü shilo. Khuu no amlo lono pa hakite keu ani keno pa launo lulo.

³ Nongu no panoqo launo tüqhatüzü luni keu ye hike: ameshoyi, ghükayi, eno alazayi,

⁴ atsüla, hughai, eno akuhu yeho, phepheike phi akiviu, ane mhi,

⁵ ambetsü yiko hughai bevekeu, ane yiko, acacia sü,

⁶ akuluqo ghenguno thazü, nukepu thazü ghenguno amkhu eno axokütsüngü,

⁷ ephod phimini ngo amla küxaphi lo süpu kepu ghenguno onyx tu.

⁸ Panongu no I ghenguno akimthe-a mlani, tishianguno I no panoqo gholo ngoni.

⁹ I no aphiki kogheküghü eno tile tinhemgha kümtsü o piyeve keu tholono nongu ye tipau mlani.

Puloshoqhi Bohu

¹⁰ “Acacia sü pesü puloshoqhi bohu lakhi mlalo. Akushulau no aulotikipshe 45, akijelau no aulotikipshe 27, eno akiqhelau ghi aulotikipshe 27 mlani.

¹¹ Ameshoyi kimthe pesü abohu alou eno ashou ghi medani, eno ameshoyi no ashe vehomxape qhini.

¹² No ye tipau ghenguno ameshoyi no mlakeu abocho bidi mlani eno apukhu bidi lo yedalo, abocho kini no ako tüxau süni eno kini no ako tüxau süni.

¹³ Acacia sü pesü abohu xapu kepu sü mlani eno ti küma lo ameshoyi no medalo.

¹⁴ Eno ti küma pesü puloshoqhi bohu akou abocho akeqo lo xisü no xapuni.

¹⁵ Asü tiküma ye puloshoqhi bohu bocho lo xisüpe qhini; ti ye abohu lono ikhipheve moni.

¹⁶ Eno I no o tsüniye akeu zakütsü pesü abohu lo ashepe lakhi shi qhini.

¹⁷ “Ameshoyi kimthe pesü akünha mlani. Akushulau aulotikipshe 45, eno akijelau aulotikipshe 27 mlalo.

¹⁸ Akünha shekichi kini lo cherubim kini ameshoyi hephave keu no mlalo.

¹⁹ Ako tüxau cherub lakhi eno ako tüxau no cherub lakhi ishi mlalo. Cherubim kinikujo akünha lo meda küqhalo.

²⁰ Cherubim chishibo ye kunguu no sükhope akünha khonhape ngoni, tiküma lakhino lakhi kuju kilepe qhini; cherubim gi ye akünha küdau juni.

²¹ Eno akünha ye puloshoqhi bohu kütsüqa lo qhini, eno puloshoqhi bohu lo I no o tsüniye akeu zakütsü pesü nono ashepe lakhi shi qhini.

²² Akünha sholo ashepe bohu shou cherubim kini akeu mta lono I no o sasü kushoni, Israelmi ghenguno I no azakütsü o tsüniye akeu vehu I no tileno o vilo pini.

Asho Ghenguno Akibepu

²³ “Acacia sü pesü akibepu lakhi mlalo. Akushulau aulotikipshe 45, akijelau aulotikipshe 18, eno akiqhelau aulotikipshe 27 shilo.

²⁴ Ameshoyi kimthe pesü tipau medalo eno ameshoyi no ashe vehomxa lo.

²⁵ Akichi lo asü tachu akijelau aulotikipshe 3 pesü vehomxa lo eno ameshoyi pesü tipau mekhave lo.

²⁶ Tipau ghenguno ameshoyi no shikeu abocho bidi mlalo, eno abocho tipaqo pesü ako bidi lo apukhu bidi lo yedalo.

²⁷ Akibepu xapuni ke asü xisülu kepushi abochoqo ye akou akichi lo qhini.

²⁸ Acacia sü akibepu xapu kepu sü mlalo, eno ameshoyi pesü tipaqo medave no akibepu kuhopeni.

²⁹ Axokütsüngü ghenguno akhu ajukhu, eno atsaizü kümllagho lephe kepu chithakhu eno akhosali mlalo; tipaqo ye ameshoyi akimthe pesü mlalo.

³⁰ Akimthe sho ye alhokuthu I zülo akibepu shou qhilo.

Ameshoyi Kulu Kibepu

³¹ “Ameshoyi kimthe pesü akulu kibepu mlalo. Akulu kibepu ye ameshoyi hephave keu pesü mlani: tipau pukhu, akemtsü, ajukhu, anipa eno axamunu shisü keu kümtsü shikime pukulo.

³² Eno tipau lono aloka tsügho ikowo keu shilo, akulu kibepu loka küthü no ako tüxau eno küthü no ako tüxau qhilo;

³³ Aloka tsügho lo lakhikhi no almond kupu eno anipa toikeu jukoghe shilo.

³⁴ Akulu kibepu tipau lo almond puipeghi aketoi keu jukhu bidi mlalo, tipa gholo anipa ngo tipau xamunu mlasü lo,

³⁵ aloka tsügho akulu kibepu lono ipeghi akeu lakhikhi lo anipa mlasü lo.

³⁶ Tipa nipa ngo alokaqo ye lakhi lono shipukulo, akulu kibepu kupuju ye hephave keu ameshoyi lakhi no mlalo.

³⁷ Tipau ghenguno akulu tsüni mlani. Eno akulu ye ghope qhilo, tishianguno tipau zülo aküvü tsüpeni.

³⁸ Tipau tsümtsa ngo akhu ajukhu kibepu ye ameshoyi kimthe no shini.

³⁹ Tipau lo peitha kepu akhu ajukhu jeli kümtsü mlani ke ghenguno ameshoyi ahu shighi pungu peitha lo.

⁴⁰ No ye ti kümtsü kogheküghü khikhi I no naghuto lono o piye ani keno tipau kiqi lono mlalo.