IPEKULU 24 - Sumi Naga CL (Re-edited) Bible (BSI)

Puloshoqhi Iqhikumto

¹ Ampeu no Moses vilo pi, “I lau ikughi lo, no eno Aaron, Nadab, eno Abihu ngo Israel lo layemi lhotsüni, eno putou no I mlla lo.

² Moses likhi no Ampeu lau kupunu ighini, ikemu kütami ye kupunu moni, timiqo ye pa gholo ighi moni.”

³ Moses no ideighi no timiqo vilo Ampeu tsa eno akhuaye kümtsü pive. Eno timi kümtsü no asütsa lakhi lono khochile pi, “Ampeu no atsa piqhive keu kümtsü ningu no shini.”

⁴ Moses no Ampeu tsa kümtsü yekütsüpe qhive. Pa no inaqhe itheno ithu no naghuto pukhu philo akümlla-khache shiqhe eno Israel shiaye chighikini kiqi lono atsükucho chighikini ghope qhi.

⁵ Eno pa no Israelmi lhothemi puwu no panoqo pelo Ampeu lau akipti kümllagho ngo amshitsü pesü külakishi kümllagho ghakishi shipe.

⁶ Moses no lhoxü ji tüxa ikhilu no tipau pesü akhu lo lesü, eno aji tüxa pesü pa no akümlla-khache lo leqhi.

⁷ Tithiu pa no Puloshoqhi kaku ikhilu no timiqo pelo chilupe ghi phisü. Eno panongu no pi, “Ampeu no piqhive keu kümtsü ningu no shini, eno nino aghokulu shini.”

⁸ Moses no aji ikhipe timiqo shou lepuku no pi, “Julo, hi ye Ampeu no atsa hipaqo kiqi lono nongu sasü puloshoqhi shikeu ji ke.”

⁹ Tishino Moses ngo Aaron, Nadab, eno Abihu ngo Israel lo layemi lhotsüni no ahuu iqhove,

¹⁰ eno panongu no Israel Lhou ithulu. Pa pukhu philo sapphire tu qha püake toi, tsüghükhüi keu no atsütsü hutoie.

¹¹ Pa ye Israelmi atomi shou Pa u chhomoe; panongu no Alhou ithulu eno chushoe.

¹² Ampeu no Moses vilo pi, “Naghuto lo I lau ikughi lo eno tilauno I ngokhe lo, tishianguno I no atulupha lo Ayezah ngo azakütsü, khikhi I no panoqo kütsüshika penike yepüani keno tipaqo o tsüni.”

¹³ Ikehu Moses no ithu pa kukuphuu Joshua sasü Alhouw naghuto lo iqhove.

¹⁴ Eno pa no layemi vilo pi, “Nikujo no nongu lau ideighi moke kutolo hile ngokhe aghilo. Julo, Aaron ngo Hur pama no nongu gholo anike khukhumu kütsala keu aghi aye, pama lau wulo.”

¹⁵ Tishino Moses no naghuto lo ikuve, eno khüngküsü no naghuto küzüluve.

¹⁶ Ampeu juküvü no Sinai Naghuto lo ngove, eno khüngküsü no atsala tsügho ti küzüluve. Eno atsala akütsüniu lo Pa no khüngküsü lono Moses kue.

¹⁷ Israelmi nhethe lo naghuto kütsüqa lo Ampeu juküvü ipeghi keu ye amiküqü toike.

¹⁸ Moses no khüngküsü dolo ilove no naghuto lo ikuve. Eno Moses ye putho pucho atsala lhobidi naghuto lo ngove.