IPEKULU 23 - Sumi Naga CL (Re-edited) Bible (BSI)

¹ “No ye alatsa veküpha moni. No ye akimki thopi shiniye kixikilami sasü au kumsho moni.

² No ye küsakügha shiniye amqo akichiu gholo ikiqi ilomoni, momu achipiu xakütha tuchighi niye amqo akichiu küdau shino atsa kükügha lo thopi shimoni,

³ momu no ye kumlhomi tsa kükügha lo pa lau agi jumoni.

⁴ “Tsala nono o ghümi mishitsü momu khurha aveghüzü shi cheghi keu sholu aye, no ye pa lau sachile saghini.

⁵ Tsala nono milakhi khuu o mithi cheni keno paw khurha akho no qaqhipe aghi keu ithulu aye tishi qhive tsümoni; ikemu sawo pa tsüveni.

⁶ “Atsa kükügha lo no ye kumlhomi launo pa chipiu tuchighive tsümoni.

⁷ Akimki shi ngukube keu lono putosülo, eno pimihami ngo achipiu mikuchomi pithi moni, kughengu Ni ye küsaküghami ngukube kepu kühave no pheve keu shimo nani.

⁸ No ye külügho lumoni, kughengu külügho no mtsümishei ithulu chekemi nhethi kighicheve tsü cheni eno khunono achipiu küdau ani keno panoqo chipiu süchighive tsü cheni.

⁹ “No ye inaghami peitha püsa moni. Nono inaghami mlo ithi anie, kughengu nongu ghi Egypt yeghi lo inaghami shi acheke.

Sabbath ngo Tiqhetini Yezah

¹⁰ “Ampe tsügho dolo nono o yeghi lo yisüni eno tipau pithi keu hekütsüni,

¹¹ ikemu ampe akütsüniu loye ayeghi pelo akulho qhilu pelo eno chimono qhiveni, tishikeu lono nongu gholo kumlhomi pelo chulu peni; eno panongu no kiu achili qhive keno aluza lo tüghashiqo pelo chupeni. O tsailu ngo ow olivelu lo ghi no ye titoi shini.

¹² “Atsala tsügho dolo nono o kümla shini, ikemu atsala akütsüniu loye akulhoqhi lo; tishianguno o mishitsü ngo ow khurha no akulho qhilu peni, eno o qemi totimi nuli ngo shoinami pelo aghüthi püxü kithelu penie.

¹³ “I no nongu vilo pikeu kümtsü lo amlo tsülo, eno kütau lhouqo jeku moni, momu nongu kichi lono pikeu chilupe kevilo.

¹⁴ “Ampe lo ghuthu küthü nongu ye I lau aghulhu shini.

¹⁵ Kholaqhi sümokeu ghulhu ikhiluni. I no azah tsüke toi, kihitha tsükeu do, Abib qhi lono, no ye kholaqhi sümokeu sho atsala tsüni chuni, kughengu tipau qhi lono no ye Egypt lono ipeghi ke. Khumu au kümsashi I zülo ighi moni.

¹⁶ Nono aluza lo kiu yisü keno, o ghime xathi pithi tüghüu pesü Ghile Ghulhu pinini. Ampe shekha lo o ghime xathi o luza lono hekütsü ke ghuloki lo no ye Pekükütsü Ghulhu shini.

¹⁷ Ampe lo ghuthu küthü now kiptimi kümtsü Ampeu Alhou zülo ighini.

¹⁸ “No ye Iw aghakishi ji gholo kiukiumu kholaqhi süve keu pesü mlla moni, momu I ghulhu lo atha ye inaqhe kutolo qhimoni.

¹⁹ “O yeghi lo xathi amsüu akiviu pesü Ampeu o Lhou kilo süghilo. “No ye aneti lakhi pesü paza kichhizü gholono kumqho moni.

Canaan Leni keu Shoqhi

²⁰ “Julo, ala lo nongu khekuto sasü I no kuto püakeu-a lo ighi peniye I no kungumi nongu züu puwu ani.

²¹ Pa lau amlo tsüqhiyi shilo eno pa tsa gholulo; pa hebide kevilo, kughengu pa ye nongu kipimi qhitsümo nani, kughengu pa lolo I je ani.

²² “Ikemu nongu no kutokupui pa tsa ini aye eno I no pikeu kümtsü shi aye, I no nongu ghümiw aghümi shi nani, eno nongu mjochile chekemi mjochile nani.

²³ “Kughou Iw kungumi no nongu züuno wuno Amorimi, Hittimi, Perizimi, Canaanmi, Hivimi, eno Jebusimi lau nongu sasü ighini keno, I no panoqo pühave nani,

²⁴ nongu ye pano lhouqo zülo pishiqho momu tipaqo qemoni, momu panongu no shiche ketoi shimoni, ikemu nongu ye qhoi panoqo haleveni eno pano tsükucho mukhumuno shi kuboveni.

²⁵ Nongu ye Ampeu nongu Lhou qeni, eno Pa no chuqu-kusho pesü nongu kümghatsü nani, eno I no küsükini nongu gholono ikhivetsü nani.

²⁶ Totimi khumu ala lono hauvemo momu anuha shimo nani; I no nongu xüpushu tsü nani.

²⁷ I no nongu züuno kichi kümsa keu puwu nani eno nongu no timi khunoqo lau ighi keno panoqo kümtsü pelo kübangüve penani, eno I no nongu ghümi kümtsü pelo idechilesü povepe nani.

²⁸ I no nongu züuno akhighiqo puwu nani, tipaqo no nongu züuno Hivimi, Canaanmi, eno Hittimi hapheve nani.

²⁹ Ampe lakhi lono Ni ye panoqo haphemo nani, tikumo aye ayeghi hipau ye küghüküghaleive no tüghashi no nongu nguno kutomo shive nani.

³⁰ Nongu no ikowo eno ayeghi qhasülu moke kutolo, I no kititi no nongu züuno panoqo haphe nani.

³¹ Akuhu Züghi lono Philistiami Züghi kutolo eno asayeqha lono Euphrates kutolo, I no nongu ghuthu shitsü nani, kughengu I no aghakhu lo küxümi pesü o u lo süvetsü nani, eno nongu no panoqo hapheve nani.

³² Nongu ye panongu eno pano lhouqo sasü puloshoqhi shimoni.

³³ Panongu ye no ghakhu lo küghüna moni, tikumo aye panongu no nongu pelo I shou axine shipe nani; kughengu nongu no pano lhouqo mlla aye, tino nongu ghenguno alichhe shive nani.”