IPEKULU 21 - Sumi Naga CL (Re-edited) Bible (BSI)

Aqüaxemi Ghenguno Ayezah

¹ “No ye Ayezah hipaqo panongu zülo qhitsülo.

² Kughou nongu no Hebrewmi aqüaxemi qhüni keno, pa ye ampe tsügho qeni, eno ampe akütsüniu lo pa ye kümsano kuqho puwuveni.

³ Tsala pa no lüthü shi ighi aye, lüthü shi wuveni; tsala pa no akibo shive no ighi aye, pa nipu ye pa gholono wuveni.

⁴ Tsala pa mpeu no pa nipu lutsü püaghi eno li no pa lau atianuli punu püaghi tsü aye, anipu ngo li tianuli ye pa mpeuw shiveni, eno pa ye lüthü shi wuveni.

⁵ Ikemu aqeu no mtsümishei, ‘Ni ye I mpeu, I nipu eno I tianuli kimiye cheni; ni ye kuqhopheve pemoe,’ ipi aye,

⁶ pa mpeu no pa sasü Alhou lau ighini, eno ahukikha momu ahukikha kuchosü lo saghini. Eno pa mpeu no ayi pesü pa kini vüpheve tsüni, eno pa ye alholo pa qüaxe shi acheuveni.

⁷ “Kughou milakhi no panga pesü aqüaxemi shi jeveni keno, li ye kiptimi aqüaxemi toi wuve moni.

⁸ Tsala li no li mpeu, khuu no paw shi qhiluve akeno, pa loshipiqi mlave aye, li qhüchilelu penike pa no ikhiphe tsüni. Pa ye li pesü inaghami lau jepuwuni keu chipiu kiumu kühae, kughengu pa ye li shou pükhükibe kubove ake.

⁹ Tsala pa no li pesü pa nu ghenguno qhiluve aye, pa ye panga toi li peithani.

¹⁰ Tsala pa no pa sala anipu kütami luve aye, pa ye anipu atüghüu chuqupu, aphimini eno li chipiu kümghüve tsümoni.

¹¹ Eno pa no li ghenguno thime küthü hipaqo shimove aye, li ye pisa tsümono kümsano wuveni.

¹² “Khukhumu timi shou hepuku kelono pithive keu ye pithiveni.

¹³ Ikemu tsala pa no püthapütsano kumono Alhou no pa pelo pa u lo ikiqi ilovepe aghi aye, I no nongu ghenguno a-a lakhi kichetsü nike tile poiloni.

¹⁴ Ikemu milakhi no amqü lono püthapütsano kütami pithive aye, nongu no I kümlla khache lono pa sawo pithiveni.

¹⁵ “Khukhumu pa puaza hekeu ye pithiveni.

¹⁶ “Khukhumu timi küghape jechuve keu, eno khukhumu pa sasü ngo aghi keu ye pithiveni.

¹⁷ “Khukhumu pa puaza ghusho keu ye pithiveni.

¹⁸ “Kughou timi dolo kichighive no milakhi no atu pesü momu pa u sükumqope lakhiu heve, eno timi huye thimo kemu alüpa hedaveni keno,

¹⁹ timi huno ideithu pa küsü kuchope khalau alache luve aye, khuu no pa hekeno pa ye akipimi kühava, ikemu pa do-aju puwove keu theli lo pa no lochile masa, eno pa no vithailu moke kutolo pa tuchomjoni.

²⁰ “Kughou milakhi no aküsü pesü pa qüaxemi, kiptimi momu totimi heve no aqü-axeu huno pa u lono thiveni keno, pa shou aghime beni.

²¹ Ikemu aqüaxeu no atsala lakhi kini dolono xüluve aye, pa shou aghime bemoni, kughengu aqüaxeu ye pa mheghi ke.

²² “Kiptimi dolo kichighi ake lono mishipu akeu totimi heve no tishi kelono anga punuveni, ikemu kiu ghüzamu shimo aye, khuu no li heve keno pa shou li kimi no mtsüqheino asüchuni, eno xaküthami no betha tsükeu qhemi pa no loveni.

²³ Ikemu tsala aghüza shive aye, nongu no aküxü theli lo aküxü no loni,

²⁴ anhethi theli lo anhethi, ahu theli lo ahu, au theli lo au, apukhu theli lo apukhu,

²⁵ akipti theli lo akipti, azaku theli lo azaku, hepungo keu theli lo hepungoni.

²⁶ “Kughou milakhi no pa qüaxeu, kiptimi momu totimi, nhethi hephove tsüno ti kighicheve tsüni keno, pa ye pa nhethi ghenguno pa qüaxeu kümsa no kuqho puwuveni.

²⁷ Tsala pa no pa qüaxeu, kiptimi momu totimi, hu helave tsü aye, pa ye pa hu ghenguno pa qüaxeu kümsa no puwuveni.

²⁸ “Kughou amshitsü no kiptimi momu totimi lakhi shoqhi pithiveni keno, atu pesü amshitsü veqhi pithiveni, eno tipau shi chumoni, ikemu amshitsü mpeu ye amakho pumoni.

²⁹ Ikemu tsala amshitsü huno alhoaye lono azüu ghi timi shoqhi cheghi no ampeu vilo ghutu anamu initsü mono, amshitsü huno kiptimi momu totimi shoqhi pithive aye, amshitsü huye atu pesü veqhi pithiveni eno ampeu ghi pithiveni.

³⁰ Tsala xakipheme pa shou betsü aye, pa ye pa küxü qhüchile kepu ghenguno kiu kiumu pa shou bekütha shikeu tsüni.

³¹ Tsala amshitsü no timi lakhi nu momu anga shoqhi pithive aye, ayezah hipau kiqi lono aphiphi shi pa lau peithani.

³² Tsala amshitsü no aqüaxeu, kiptimi na totimi namu, shoqhi pithive aye, amshitsü mpeu no ghükayi shekel shighi pesü aqüaxeu mpeu tsüni eno amshitsü ye atu pesü veqhiveni.

Lokichile Yezah

³³ “Kughou milakhi no aqo lhaphe, momu aqo chhupe tipau nhamo no amshitsü momu khurha no tipau lo ikiqi iloveni keno,

³⁴ aqo mpeu no tipau lochileni. Pa no tipau mpeu pisa tsüni, eno lhoxü kumo ye paw shiveni.

³⁵ “Kughou amshitsü lakhi no kütami mishitsü shoqhi pithiveni keno, pama no amshitsü xüakeu jeve no tipau me kijeveni, eno lhoxü kumo ghi pama kijeveni.

³⁶ Momu amshitsü huno azüu ghi alhoaye lono shoqhi cheghi no ampeu no khatha püaghimo aye, pa ye amshitsü theli lo amshitsü pesü lochileni eno amshitsü kumo ye paw shiveni.