IPEKULU 20 - Sumi Naga CL (Re-edited) Bible (BSI)

Azakütsü Chighi

¹ Alhou no atsa hipaqo kümtsü pi,

² “Ni ye Ampeu, khuu Egypt yeghi lo aqüaxe kibo lono nongu saipeghi keno, nongu Lhou huke.

³ “I zülo nongu ye alhouqo kütau mlla moni.

⁴ “Nongu ye no sala ajulho mlape qhimoni, momu kunguu atsütsü lo momu aqhou ayeghi lo momu ayeghi qhou azü lo kiu kimihimu mlape qhimoni.

⁵ Nongu ye tipaqo lau pishiqho moni momu tipaqo qemoni, kughengu Ni Ampeu nongu Lhou ye anhekushu Lhou kehu apu khunono I mithi cheni keno pano xine ghenguno atianuli aküthüu eno abidiu tiqheli kutolo xuju ighi chenie,

⁶ ikemu khunono I kimiye eno I zakütsü pape cheni keno tipaqo lau iqemokeu kikimiye tiqheli qhethonhe kutolo piye cheni.

⁷ “Nongu ye adou lono Ampeu nongu Lhou je peitha moni, kughengu khuu no adou lono Pa je peithani keno Ampeu no pa shou akipimi benani.

⁸ “Sabbath tsala kümsülu lo eno tipau akimthe shi qhilo.

⁹ Nongu no atsala tsügho mlalo, eno nongu kümla kümtsü shini,

¹⁰ ikemu atsala akütsüniu ye Ampeu nongu Lhou lau Sabbath ke. Tipani ye nongu, no tianuli, no qemi kiptimi momu totimi, atsü-aqu, momu kicheghüzümi now khagho bokütha lo akeqo shi aghi namu nongu ye kiu kümlamu shimoni.

¹¹ Kughengu atsala tsügho lono Ampeu no atsütsü eno ayeghi, azüghi eno tile akeqo kümtsü lhoe, eno atsala akütsüniu loye akulhoqhi ke. Tighenguno Ampeu no Sabbath tsala kümghatsü eno tipau pesü akimthe shi qhike.

¹² “O puaza gihulo, tishianguno Ampeu o Lhou no tsü akeu yeghi lo o tsala ye kushuo shilu nani.

¹³ “No ye timi ghiqhi moni.

¹⁴ “No ye shupu salha moni.

¹⁵ “No ye püka moni.

¹⁶ “No ye o kisüghüu shou akimki thopi shimoni.

¹⁷ “No ye o kisüghüu ki jumine moni; no ye o kisüghüu nipu, momu pa qemi kiptimi totimi, momu pa mishitsü, khurgha, momu kiu kiumu paw shi aghikeu jumine moni.”

¹⁸ Kughou timi kümtsü no tsütsüküsü ngo tsütsüpha kulokeu ithulu eno afuko ghügha ngo naghuto lo amchhi phokeu ithulu keno, panongu ye akümsa no khokho shive no putou puthugho luve

¹⁹ no Moses vilo pi, “Nou no ni pütsalo, eno nino inini; ikemu Alhou pelo ni pütsape kevilo, tikumo aye ningu ye thive nosae.”

²⁰ Moses no timiqo vilo pi, “Msa kevilo, kughengu Alhou ye nongu pejuni ye ighi ani, tishikeu lono nongu lolo Pa sümsa keu apeniye ke, tishianguno nongu no axine shimo nani.”

²¹ Timiqo no putou puthugho ae, eno Moses no aküzü kutho küdau Alhou no akeu lo kupunu wue.

Akiptia Yezah

²² Ampeu no Moses vilo pi, “Israelmi vilo ishi pilo: ‘Ni ye atsütsü lono nongu pütsa kepi nongu ampi no ithuluvae.

²³ I gholo ngono nongu ye ghükayi lhouqo mla moni momu nongu sala ameshoyi lhouqo mla moni.

²⁴ Ayeghi no shikeu kiptia I ghenguno mlalo eno akipti kümllagho ngo külakishi kümllagho, nongu mbe ngo amshitsü tipau lono aghashini. I je kümsülu penike I no kishetsü ke-a lo nongu lau ighi nani eno nongu kümghatsü nani.

²⁵ Tsala nongu no atu no shikeu kiptia I ghenguno mla aye, nongu ye heküthatu pesü tipau mla moni, kughengu nongu no ayi pesü tipau chitha aye nongu ye ti shikitiqeve nani.

²⁶ Eno nongu ye anepa lono I kümlla khache lo ikumoni, tishianguno nongu kukujopu tileno ithulu pemonie.’