IPEKULU 19 - Sumi Naga CL (Re-edited) Bible (BSI)

Sinai Toghi Lo Israelmi

¹ Israelmi no Egypt lono ipeghi keu aqhi aküthüu lo, panongu ye Sinai sayeqha lo ighive.

² Panongu no Rephidim lono chesü wuve no Sinai sayeqha lo ighi, eno asayeqha lo aghazü shipe ngove. Tile Israelmi ye naghuto zülo aghazü shive,

³ eno Moses ye Alhou sasü kushoni ye iqhove. Naghuto lono Ampeu no Moses kuno pi, “No ye Jacob lagha vilo ishi pini, eno Israelmi vilo pini:

⁴ ‘I no Egyptmi lau kiu shi, eno kishi alhuqu chishibo lono nongu xapu eno nongu sasü I lau ighi keno nongu no ithuluvae.

⁵ Tighenguno itehi, nongu no mtsüqheino I tsa gholu eno Iw puloshoqhi pape aye, nongu ye ayeghi lo timiqo kümtsü dolo Iw akughupu mheghi shi nani, kughengu ayeghiqha kümtsü Iw ke;

⁶ eno I ghenguno nongu ye achinemi kükaqha lakhi eno akimthe shiye shi nani.’ Nono Israelmi vilo pini keu tsa ye hipaqo ke.”

⁷ Ikehu Moses no ighi no layemiqo kuno Ampeu no azah pa tsükeu tsaqo pesü panoqo zülo lheqhi.

⁸ Timi kümtsü no kümtsa khochile no pi, “Ampeu no pive keu kümtsü nino shini.” Eno Moses no timiqo tsa pesü Ampeu vilo pive.

⁹ Ampeu no Moses vilo pi, “Julo, Ni ye khüngküsü kutho lono o lau cheni, tishianguno kughou I no o pütsani keno timiqo no chilu peni, eno alholo o pülülu penie.” Kughou Moses no timiqo tsa pesü Ampeu vilo pi keno,

¹⁰ Ampeu no Moses vilo pi, “Timiqo lau wulo eno ishi ngo thoghiu panoqo kishekimthe no pano phimini ishi kimtheve pelo,

¹¹ eno atsala aküthüu loye kutope ngo pelo. Kughengu atsala aküthüu lo timi kümtsü nhethe lono Ampeu no Sinai Naghuto lono iqighi nani.

¹² No ye timiqo ghenguno naghuto vehomxa lakükha süve no pilo, ‘Naghuto lo ikumo momu tipau shekichi dimoni ke kutokupui lo. Khukhumu naghuto dilu keu ye pithive nani.

¹³ Khunomu pa bumoni, ikemu pa ye atu no veqhi pithiveni momu shexilika pesü kaqhiveni; timi shi aghina lhoxü shi aghi namu xümo nani.’ Kughou afuko sütsa kushuo küighani keno panongu no naghuto lo iqhoghini.”

¹⁴ Ikehu Moses no naghuto lono iqive no timiqo kishekimthe; eno panongu no pano phimini ishive.

¹⁵ Eno pa no timiqo vilo pi, “Atsala aküthüni ghenguno kutolulo; totimi phivilo wu kevilo.”

¹⁶ Atsala aküthüni inaqhe tilehi tsütsüküsü ngo tsütsüpha ighi eno khüngküsü kutho no naghuto lo ikughive eno afuko ghügha ighono kije küigha, ikehu aghazü lo timi akeqo kümtsü no khokho shive.

¹⁷ Tileno Moses no Alhou sasü kushoni ye aghazü lo timi akeqo kümtsü sasü ipeghi, eno panongu no naghuto philo puthugho ngoluve.

¹⁸ Sinai Naghuto ye amchhi no küzüpho luve kughengu Ampeu no ami lono tipau shou ikughive ke. Tipau michhi no amiphokilo michhi toi phoiku, eno naghuto kupuju no shishe ithae.

¹⁹ Eno afuko ghügha no alau eno alau kije shi ighauve kelo Moses no atsa pi, eno Ampeu no tsütsüküsü lono pa khochile.

²⁰ Ampeu no Sinai Toghi kütsüqa shou iqighi. Eno Ampeu no naghuto kütsüqa lo Moses ku puku, eno Moses no tilau ikuve.

²¹ Ampeu no Moses vilo pi, “Iqi no timiqo ghutu lo, tikumo aye panongu no Ampeu juniye shoxüsü ighi no kutomo pühave nosake.

²² Achinemi khunoqo Ampeu kupunu ighini keno panongu ampi kishekimtheve pelo, tikumo aye Ampeu no panoqo ghimeve nosake.”

²³ Moses no Ampeu vilo pi, “Timiqo ye Sinai Naghuto lo ikughi lumo nani, kughengu No ampi no ningu ghutu ghi pike, ‘Naghuto vehomxa lakükha süve no tipau kishekimtheve lo.’”

²⁴ Eno Ampeu no pa vilo pi, “Iqilo, eno o gholo Aaron saiqhoghi lo. Ikemu achinemi ngo timiqo pelo shoxüsü Ampeu lau iqhoghipe kevilo, tikumo aye, Pa no panoqo shou aghime pephe nosake.”

²⁵ Ikehu Moses no timiqo lau iqi no panoqo vilo pive.