IPEKULU 18 - Sumi Naga CL (Re-edited) Bible (BSI)

Jethrow Mijekütsü

¹ Alhou no Moses eno Paw timi Israelmi ghenguno mla tsükeu, Ampeu no kishi Egypt lono Israelmi saipeghi keno, Midian chineu Moses pangu Jethro no kümtsü chiluve.

² Moses no pa nipu Zipporah aki lo puwove kethiu, pa ngu Jethro no li saluve ke,

³ li gholo anu kini ghi puwove. Anu anoghiu je no Gershom (kughengu pa no pi, “Ni ye inami yeghi lo kachenami shi ighivae”),

⁴ eno anu lakhiu je no Eliezer (kughengu pa no pi, “I pu Lhou no I kukuphuu, eno Pharaoh zütakikihi lono I xaphelue”).

⁵ Moses pangu Jethro no Moses nu pama eno pa nipu sasü asayeqha lo Alhouw naghuto khile pa no aghazü shipe akeno tile ighie.

⁶ Kughou pa no Moses lau, “Ni, o ngu Jethro ye o nipu eno anu pama sasü o lau cheni,” ipi asütsa tsüpuwu keno,

⁷ Moses no pa ngu sasü kusho niye wuno itsaqi eno pa mümae. Eno panongu lakhi no lakhi vilo kiu toi ani keno ighijukile no aphiki lo ilove.

⁸ Tithiu Ampeu no Israelmi ghenguno Pharaoh eno Egyptmi lau mlakeu, alaghi lo aghime panoqo shou ikughi keu, eno Ampeu no kishi panoqo xaphelu keno ti kümtsü Moses no pa ngu vilo pi.

⁹ Ampeu no Israelmi ghenguno akivi mla tsükeu kümtsü ghenguno Jethro no alovive, Pa no Egyptmi u lono panoqo xaphe tsüke.

¹⁰ Jethro no pi, “Ampeu, khuu no Egyptmi u lono eno Pharaoh u lono nongu xaphelu, eno Egyptmi qholono timiqo xaphelu keno Pa sheqhelo.

¹¹ Itehi ye I no ithive ake Ampeu ye alhouqo kümtsü nguno akijeue, kughengu hipau vehulo panongu no ngukangugha shi timiqo peitha ke.”

¹² Moses pangu Jethro no akipti kümllagho lakhi peighi no Alhou lau aghashi; eno Aaron no Israelmi layemi kümtsü saighi no Moses pangu sasü Alhou zülono chushoe.

¹³ Thoghiu Moses ye timiqo tsa küghatha tsüniye iqa luve, eno timiqo no inaqhe no avela kutolo Moses vehope puthugho ngove.

¹⁴ Moses no timiqo ghenguno kiu shi akeno kümtsü pa ngu no ithuluve no pa vilo pi, “Nono timiqo ghenguno shi akeu hi ye kiu kea? Kushiye o likhi no iqa püzü timiqo pelo inaqhe no avela kuto puthughope ani kea?”

¹⁵ Moses no pa ngu vilo pi, “Timiqo no Alhou vilo inijuni ye I lau ighike ghenguno ke;

¹⁶ kughou panongu no kütsala keu ani keno, I lau ighi no I no milakhikhi dolo xathatsü cheni, eno panoqo pelo Alhou khuaye ngo ayezah ithipe chenie.”

¹⁷ Moses pangu no pa vilo pi, “Nono kiu shi ani keno ti ye alokeu kumoe.

¹⁸ No eno timiqo ye mtsüqhei no akulho shive nani, kughengu hi ye o ghenguno ighono mishishei anike o likhino shilumo nanie.

¹⁹ Itehi I tsa inilo; I no o mije tsüni, eno Alhou no o gholo apenie! No ye Alhou zülo timiqo züqhu shini eno panoqo küküpna Alhou zülo süghini,

²⁰ eno akhuaye ngo ayezah tsalo nono panoqo ghutuni, eno panoqo ye kiu laghi lo cheche masa eno kiu shi masa keno panoqo pelo ithi peni.

²¹ Tinguno alau, timiqo dolo shitsami, khunono Alhou sümsa cheni, pükhübekulu eno külügho mithi cheni keno titoi keqo phujulo, eno titoi keqo pelo qhethonhe shou, aqhe shou, lhopungu shou eno chighi shou atou shipelo.

²² Eno panoqo pelo ado kümtsü lo timiqo shou küghatha pelo. Aküküpna kije thaqhü ye panongu no o lau süghini, ikemu aghuloqo ye panongu dolono xatha luveni. Tino o ghenguno mlalei nani, eno panongu no o gholo amakho puqhelu nani.

²³ Tsala nono hipau shi aye, Alhou no o kichepiye nani, no ye puqhelu nani, eno timi hi kümtsü no aloino pano-a lo wulu nani.”

²⁴ Ikehu Moses no pa ngu tsa ini eno pa no pikeu kümtsü shie.

²⁵ Moses no Israelmi dolono shitsami kishe eno panoqo pesü timiqo shou, qhethonhe shou, aqhe shou, lhopungu shou eno chighi shou atou shipe.

²⁶ Eno panongu no ado kümtsü lo timiqo shou küghatha tsü. Kiu kiumu kushokütsü küküpna ye panongu no Moses lau süghi, ikemu aghuloqo ye panongu dolono xathave.

²⁷ Tithiu Moses no pa ngu pelo wovepe, eno pa ye pa ghakhu lo wove.