IPEKULU 17 - Sumi Naga CL (Re-edited) Bible (BSI)

Atuqu lono Azü

¹ Ampeu zakütsü kiqi lono Israelmi qoaho kümtsü Sin sayeqha lono iqesü a-a lakhi lono lakhi lo wuve no Rephidim lo aghazü shiluve, ikemu timiqo ghenguno azü yekepu kühave.

² Tighenguno timiqo no Moses sasü mtouve no pi, “Azü yekepu ni tsülo.” Moses no panoqo vilo pi, “Nongu ye kushiye I sasü muto ani kea? Nongu ye kushiye Ampeu peju ani kea?”

³ Ikemu tilehi timiqo ye ighono tüghüthive, eno Moses shou muchho no pi, “No ye kushiye ningu eno ni tianuli ngo atsü-aquqo atüghü lono pithiveni ye Egypt lono saipeghi kea?”

⁴ Ikehu Moses no Ampeu lau ighamku, “Timi hipaqo lau ni ye kiu shive tsüni kea? Panongu ye atu pesü I veqhiveni ye kuto anie.”

⁵ Ampeu no Moses vilo pi, “Israel lo layemi khami o gholono sasü timiqo heche wulo, eno aküsü khipau pesü nono Nile lo hesü keno tipau o u lo pesü wulo.

⁶ Julo, I no Horeb lo atuqu shou o zülo puthugho nani, no ye tilehi atuqu shou ghapuku lo, tipau lono azü ipeghi nani, eno timiqo no azü yelu nani.” Moses no Israel lo layemi zülono tishie.

⁷ Ikehu pa no tipa-a pesü Massah eno Meribah kuvetsü, kughengu Israelmi no mtomshu eno Ampeu peju ghi, “Ampeu ye ni gholo ani kemo kea?” ipike ghenguno ke.

Israelmi no Amalekmi Theqhive

⁸ Tithiu Amalekmi no Israelmi sasü küpüghüni ye Rephidim lo ighi.

⁹ Ikehu Moses no Joshua vilo pi, “Ningu ghenguno timiqo kishephe lo, eno wuno Amalekmi sasü aghü shilo. Thoghiu I no I u lo Alhou küsü pesü atoghi kütsüqa lo puthughoni.”

¹⁰ Ikehu Joshua no Moses no pa vilo pi ketoi shino Amalekmi sasü aghüshi, eno Moses, Aaron ngo Hur noqo no atoghi kütsüqa lo iqhove.

¹¹ Kughou Moses no pa u peqhe keno Israelmi no tolu, eno kughou pa no pa u piqive keno Amalekmi no tolue.

¹² Ikemu Moses u ye qeive, tighenguno panongu no atuqu peighi no pa phivilo ghope qhi eno pa no tipau lo iqave, Aaron ngo Hur pama lakhi no hiküdau eno lakhi no huküdau ngono pa u mtupe tsü. Ikehu khetsünhe ilo moke kutolo pa u peqhepe ngotsü.

¹³ Joshua no Amalek ngo paw timi azütakikihi pe akeqo shou toluve.

¹⁴ Tithiu Ampeu no Moses vilo pi, “Kümsümamo kepu shi hipau kaku lo yepe qhilo, ti ye atsütsü qholo Amalekmi kümsümave penike I no qhoi pühave tsü nanie pi Joshua kini lo hipau pisü tsülo.”

¹⁵ Moses no akümlla-khache lakhi shiqhe eno tipa je pesü, Ampeu ye Iw Michiphi ipi kuvetsü,

¹⁶ eno pi, “Kughengu Ampeu kükalakhü shou au peqhe ke! Ampeu no tiqheli lono tiqheli kutolo Amalekmi sasü aghü shi nani.”