IPEKULU 16 - Sumi Naga CL (Re-edited) Bible (BSI)

Atsütsü lono Asho

¹ Panongu no Egypt yeghi lono ipeve keu aqhi akiniu atsala chighiapunguu lo Elim lono chesü wuve, eno Israelmi qoaho kümtsü no Sin sayeqha lo ighive, ti ye Elim ngo Sinai dolo ake.

² Asayeqha tileno Israelmi qoaho kümtsü no Moses ngo Aaron shou muchho thuve,

³ eno Israelmi no pama vilo pi, “Egypt yeghi lo nino ashi kulholiqo phivilo iqa no aghakiqi shi achuqupu chuche kelono Ampeu u lonomu thive keu pavini cheke, kughengu nokujo no ni sasü asayeqha hipau lo ighi no Israelmi qoaho kümtsü akhüava lono pithiveni ye shi anike.”

⁴ Tile Ampeu no Moses vilo pi, “Julo, I no nongu ghenguno kunguu no asho ghuqhi tsüniye ani, eno timiqo no khalau ipe no tsalakipe chuqupu saje hekütsüni, tishino panoqo no I yezah lo cheche nani kemo keno I no pejuni.

⁵ Atsala akütsüghou lo, kughou panongu no peighi keu kutoni keno, ti ye thosülo panongu no tsalakipe hekütsü chekeu nguno ghuthu kinino alaushi kutoni.”

⁶ Ikehu Moses ngo Aaron pama no timiqo vilo pi, “Egypt yeghi lono nongu saipeghi keu ye Ampeu no kepi nongu no avelau no ithi nani,

⁷ eno inaqhe no nongu no Ampeu juküvü ithulu nani, kughengu nongu no Ampeu shou muchho keu Pa no chiluvae. Kughengu nikujo ye kiue pi nongu ye nikujo shou muchho ani kea?”

⁸ Moses no pi, “Ampeu no nongu pelo chu penike avelau no ashi tsü nani eno inaqhe no asho pesü nongu ghapiqi tsü nani, kughengu nongu no muchho akeu ye Ampeu shou muchho ani kepi Pa no nongu kumchho chiluvae—nikujo ye kiu kea? Nongu kumchho ye nikujo shou kumoe, ikemu Ampeu shou ke.”

⁹ Tithiu Moses no Aaron vilo pi, “Israelmi qoaho kümtsü vilo pilo, ‘Ampeu zülo kupunu ighilo, kughengu Pa no nongu kumchho chiluvae.’”

¹⁰ Aaron no Israelmi qoaho kümtsü pütsa khavi, panongu no asayeqha küdau jupuwu, eno julo, khüngküsü lono Ampeu juküvü ipeghi.

¹¹ Eno Ampeu no Moses vilo pi,

¹² “Israelmi kumchho I no chiluvae. Panongu vilo pilo, ‘Tsüküzü lo nongu ye ashi chu nani, eno inaqhe no nongu ye asho pesü aghapiqilu nani. Tileno Ni ye Ampeu nongu Lhou kepi nongu no ithi nani.’”

¹³ Avelau atsüngü yeighi no aghazü nhakha luve, eno inaqhe no atsüzü no aghazü homxape qi aghi.

¹⁴ Kughou atsüzü chethove keno asayeqha kümtsü lo apa ipumhei keu thime, avütsa toi ayeghi lo aghie.

¹⁵ Kughou Israelmi no ti ithulu keno, panongu lakhi no lakhi vilo pi, “Hi ye kiu kea?” Kughengu ti ye kiu keno panongu ye ithimo ke. Moses no panoqo vilo pi, “Hi ye nongu pelo chu penike Ampeu no asho tsü anie.

¹⁶ Ampeu no azah tsü akeu ye hike: ‘Milakhikhi no khijehi chulu nani keno nongu kümtsü no tijehi kiche lulo. Nongu phiki lo timi kikihi khijehi ani keno tipau kiqi lono nongu milakhikhi no ashoghi lakhikhi kichelu lo.’”

¹⁷ Ikehu Israelmi no titoi shie. Khami no kutomo, khami no aghulo ishi panongu no kiche kütsüe.

¹⁸ Ikemu kughou panongu no ahu shikeno ti ye ashoghi lakhikhi mighilue, khukhumu kutomo kiche kütsü keu no achili shiluke kumoe, eno khukhumu aghulo kiche kütsü keu no zülaveke kumoe. Milakhikhi no khije khijemu chulu kepu qhemi lono kiche kütsüe.

¹⁹ Moses no panoqo vilo pi, “Khumu inaqhe kutolo tipau kitilamu achili qhimoni.”

²⁰ Ikemu panongu no Moses tsa ini tsümoe. Khami no tipau achili kitila inaqhe kutolo qhive, eno tino apithe lhoipeghi no tsümünave. Ikehu Moses no panoqo lau amloideve.

²¹ Inaqhe atsütsü panongu no pütüta no chukulupu qhemi lono tipau kiche kumqo; ikemu kughou khetsünhe no kaghai ipeghive keno tipau ye mlaghoive.

²² Atsala akütsüghou lo milakhikhi no ashoghi kinini kichelu. Eno kughou aqoaho lo sakiphemiqo no ighi no Moses vilo pi keno,

²³ pa no panoqo vilo pi, “Ampeu no azah tsükeu ye hike: ‘Thoghiu ye tsaqüi akulho qhikeu tsala, Ampeu lau akimthe shi ikhiphe tsükeu Sabbath ke; kiu ghukepu keno ghuve eno kiu bekepu keno bevelo, achili kiu aghini keno inaqhe sala qhivelo.’”

²⁴ Ikehu Moses no panongu azah tsü ketoi panongu no inaqhe sala ikhithape qhive, ikemu ti ye tsümüna moe, eno apithe mu ilomoe.

²⁵ Moses no pi, “Ishi no ti chulo, kughengu ishi ye Ampeu lau ikhiphe tsükeu Sabbath tsala ke; nongu ye ishi ye aluza lo ti ithulumo nani.

²⁶ Atsala tsügho nongu no ti kiche kumqolo, ikemu atsala akütsüniu ye Sabbath ke, tipani ye kiumu küha nanie.”

²⁷ Atsala akütsüniu lo timi khami no ti kicheni ye wu, ikemu panongu ye kiumu ithulu moe.

²⁸ Ampeu no Moses vilo pi, “Nongu ye khitohi I yezah papeni keu miliveni kea?

²⁹ Julo! Ampeu no Sabbath nongu tsüe; tighenguno atsala akütsüghou lono Pa no atsala kini ghenguno asho nongu tsüe. Nongu kümtsü pütüta-a lo ngove lo; atsala akütsüniu loye khuu pelomu pa-a lono khalau ipepe kevilo.”

³⁰ Ikehu timiqo no atsala akütsüniu loye akulho qhive.

³¹ Israelmi no tipau je pesü manna kuvetsü. Hipau ye napa lothi toi metsüghoi eno micheju kelo akhingozü no mlakeu sho zümzümüi keu toike.

³² Moses no pi, “Ampeu no azah tsükeu ye hike: ‘No shelo tiqhelimi sala manna ashoghi lakhi qhilo, tishianguno panoqo pelo I no Egypt yeghi lono nongu saipeghi kelo asayeqha lo asho khipau pesü nongu loji keno ithulu penie.’”

³³ Moses no Aaron vilo pi, “Abohu lakhi ikhilulo, eno no shelo tiqhelimi sala qhitsü kepushi tile manna ashoghi lakhi süno pesü Ampeu zülo qhitsülo.”

³⁴ Ampeu no Moses azah tsü ketoi, Aaron no tipau pesü Ampeu zülo thopi lakhi shi peniye qhive.

³⁵ Israelmi no akütsashi ngolu kepu-a tomoke dolo panongu ye ampe lhobidi manna chuche. Canaan yeghi lughi tolu moke kutolo panongu ye manna chue.

³⁶ (Ashoghi lakhi ye ahu kini toike qhemi ke.)