IPEKULU 15 - Sumi Naga CL (Re-edited) Bible (BSI)

Moses Le

¹ Tithiu Moses ngo Israelmi no Ampeu lau ale ishi phe, “I no Ampeu lau ale pheni, Pa no ajekipi shi toluke; Pa no khurshi ngo tipa sakicheu azüghi lo vesüvae.

² Ampeu ye I kumto eno I le ke, eno Pa ye Iw xakuluu shivae; hi no I Lhou ke, I no Pa sheqheni, I pu Lhou, I no Pa süqheni.

³ Ampeu ye aghükishimi ke; Pa je ye Ampeu ke.

⁴ “Pa no Pharaohw khurkulu ngo ghüshimi azü lo vesüve, paw kishekiphe kijemi Akuhu Züghi lono pütsüqhive.

⁵ Züqozü no panoqo küzüluve; atuqu toi panongu no azüghi kutho lo ilove.

⁶ O Ampeu, O u ajeu küka jekipipu, O Ampeu, O u ajeu huno aghümi kütsa cheni.

⁷ O kükanguagha kije lono Nono O ghümi sünheqhi; Nono O loghu puwu; tino aghijini toi panoqo pitile ke.

⁸ O nigi lo tuthu huno azüghi khepucho luve; züqozü no yimi ikughive; azüghi polalo azü no chethove.

⁹ Aghümi no pi, ‘I no hawuni, I no züthaveni, I no hakhokulu kijeveni, I no kümsü akeqo luveni. I no I zütakikihi süjopheni; I u no panoqo kütsaveni.’

¹⁰ Nono O mülhü puwu; azüghi no panoqo küzüluve; aküsayi toi panoqo ye akughushu züghi lo itsüilove.

¹¹ “O Ampeu, alhouqo dolo khuu no O toi kea? Aküka kughushu, ajuküvüpu kümla lo sheqheküzü, akümzapu mla chekeu, Khuu no O toi kea?

¹² Nono O u ajeu xachho; ayeghi no panoqo munove ke.

¹³ “Nono qhüchilelu keqo Ow iqemokeu kikimiye lono saphe ke; O küka lono Nono O kimthe kungo-a lo panoqo saighie.

¹⁴ Ashiayeqo no chiluvae; panoqo ye msa khokhoshi ani; apunu küsü no Philistia lo küxümiqo tsügha luvae.

¹⁵ Edom lo atomi ye itehi aghüthi süvae; akümsa no Moab sakiphemiqo tsüqü luvae; Canaan lo küxümi kümtsü no amlo hauvae.

¹⁶ O Ampeu, Ow timiqo no heche wumoke kutolo, Nono qhüluve keqo no kathasü wulu moke kutolo, akümsa ngo aküighüpu no panoqo shou ikughie; O u kumto ghenguno panongu ye atuqu toi inaqhoivae.

¹⁷ O Ampeu, a-a khikhi Nono O kungo-a shipüani keno, akimthe-a khikhi O u no shiqhe keno, O Ampeu, Nono tile panoqo sailo Ow naghuto lo shosü nani.

¹⁸ Ampeu no alholo eno pülhapuju ayepe nani.”

¹⁹ Kughou Pharaohw khurshi ngo khurkulu eno khurshimi no azüghi lo ilo keno, Ampeu no panoqo shou azüghizü qochile ighivepe, ikemu Israelmi ye azüghi mta lo ayeghi qhai keu lono ala chesü wuve.

²⁰ Tithiu tungkupliu Miriam, Aaron chepu no amqübo li u lono ikhiluve, eno totimi kümtsü no amqübo pesü li pape ighi no ilhe.

²¹ Eno Miriam no panoqo lau ishi ale phe: “Ampeu lau ale phelo, Pa no ajekipi shi toluke; Pa no khurshi ngo tipau sakicheu azüghi lo vesüvae.”

Akukhu Zü

²² Tithiu Moses no Israelmi sasü Akuhu Züghi lono iqesü Shur sayeqha lo wuve. Panongu no asayeqha lo atsala küthü chesü wu, ikemu azü ithulu move.

²³ Kughou panongu no Marah lo ighi keno, panongu ye azü yemlave kughengu tipa zü ye khumtsai ke; tighenguno tipa-a pesü Marah kutsüe.

²⁴ Timiqo no Moses lau muchho ghi pi, “Ningu ye kiu yeni kea?”

²⁵ Moses no Ampeu lau ighamku, eno Ampeu no asüta lakhi pa piye, pa no tipau azü lo vesüve, eno azü ye yelu kepu shive. Tile Ampeu no panoqo ghenguno ayezah lakhi mlatsü, eno tileno panoqo peju

²⁶ ghi pi, “Tsala nongu no amlo tsüqhiyi Ampeu nongu Lhou tsa ini eno Pa nhethe lo kiu no achipi keno tipau shi aye, eno Pa yezah lo nongu mlo tsü eno tipaqo kümtsü pelu aye, I no Egyptmi lau aküsü puwu keqo kiumu nongu lau süghimo nani, kughengu Ni ye Ampeu, nongu shikipiviu ke.”

²⁷ Tithiu panongu no Elim, khilehi azüpuki chighikini eno amsabo lhotsüni ache keno tile ighi, eno panongu no azü phivilo aghazü shipe ngove.