IPEKULU 14 - Sumi Naga CL (Re-edited) Bible (BSI)

Akuhu Züghi Katha

¹ Tithiu Ampeu no Moses vilo pi,

² “Israelmi vilo idewo Pi-hahiroth zülo aghazü shilo pilo, ti ye Migdol ngo azüghi küma dolo Baal-zephon kupunu loke; nongu ye azüghi phivilo tipau küdau jupuwu ghi aghazü shilo.

³ Kughengu Pharaoh ye Israelmi vehulo ishi pi nani, ‘Panongu ye aghakhu lo itsü chephie; asayeqha huno panoqo vekhape qhivae.’

⁴ Eno I no Pharaoh mlo shikümkave tsüno pa no panoqo hawu nani, eno Pharaoh ngo paw aqokitikhi vecheo I no ajuküvü ithuluve nani, Egyptmi no Ni ye Ampeu kepi ithi nani.” Ikehu panongu no titoi shive.

⁵ Kughou Egypt kükau vilo timiqo ye povae pi keno, pa ngo pa qemi mlo ye kilive, eno panongu no pi, “Ningu ye Israelmi pelo ni qe achekeu lono wuvepe keu hi ye kiu shive akea?”

⁶ Ikehu pa no paw khurkulu kuto eno pa gholo ghüshimi sawu,

⁷ khurkulu kishekiphe aqhe tsügho eno Egypt lo khurkulu kütau kümtsü lo hiyampemi no tipaqo shou ikuno sasü wue.

⁸ Ampeu no Egypt kükau Pharaoh mlo shikümkave tsü, eno Israelmi no akumto shi wuche kelo pa no Israelmi hasü ighi.

⁹ Baal-zephon kupunu lo azüghi phivilo Pi-hahiroth lo aghazü shipe ngo akelono Egyptmi no panoqo hasü ighi, Pharaohw khurshi ngo khurkuluqo eno paw khurshimi ngo ghüshimi ishi no panoqo haluve.

¹⁰ Kughou Pharaoh no kupunu ighi keno, Israelmi no panongu nhethi tsüpuku jukelo Egyptmi no panoqo thiu cheghi, eno panongu ye shishe msave. Israelmi no Ampeu lau ighamku.

¹¹ Panongu no Moses vilo pi, “Egypt lo akumoki kühave kehu no ye ni sawo asayeqha lono pithiveni ye shi ani keshea? No ye Egypt lono ni sasü ipeghi no ni lau kiu shive akea?

¹² Egypt lo ngo akelono nino o vilo: ‘Ni qhivelo, ni pelo Egyptmi qe apelo’ ipike kumo? Kughengu asayeqha lono thiveni keu ye Egyptmi qe akeu no ningu ghenguno akiviu shini cheke.”

¹³ Moses no timiqo vilo pi, “Msa kevilo, mtotoi puthugho lo, eno Ampeuw xakulu, khikhi Pa no nongu ghenguno ishi tsala lo mla nani keno ti julo. Kughengu Egyptmi khunoqo nongu no ishi ithulu ani keno, nongu ye panoqo khilemu ithulu kithemae.

¹⁴ Ampeu no nongu ghenguno aghüshi nani, nongu ye iqünhei ngoke likhi shikepue.”

¹⁵ Ampeu no Moses vilo pi, “Nongu ye kushiye I lau ighamku ani kea? Israelmi vilo azüu wulo pilo.

¹⁶ O küsü peqhelo, eno azüghi shou o u chhopuwo no ti kijetha lo, tishianguno Israelmi no qhaike yeghi dolono azüghi lo katha wulu nani.

¹⁷ Eno I no Egyptmi mlo shikümkave tsü nani, tishikeu lono panongu no Israelmi pape ilo nani, eno Pharaoh ngo paw aqokitikhi, khurkulu eno khurshimi shou I no ajuküvü ithuluve nanie.

¹⁸ Kughou Pharaoh ngo paw khurkulu eno khurshimi shou I no ajuküvü ithuluveni keno Egyptmi no Ni ye Ampeu kepi ithi nani.”

¹⁹ Tithiu Alhouw kungumi Israelmi aqokitikhi züu wuche keu huno athiu idewove, eno khüngküsü tsükucho panoqo züu wuche keu ghi iqesü panoqo thiu ngove no,

²⁰ Egyptmi aqokitikhi ngo Israelmi aqokitikhi dolo ngove. Eno tilehi khüngküsü no halau ye aküzü süghitsü eno halau no aküvü süghi tsü kehu putho kupuju khunomu khuu phivilo ighilu move.

²¹ Tileno Moses no azüghi shou pa u chhophe, eno Ampeu no puthotsü kipela mülhü kümka pesü azüghi fuchile puwove tsü, eno azüghi pesü qhaike yeghi shive tsüno azü kijethave tsüe.

²² Israelmi no azüghi mta lo qhaive keu yeghi lono wuve, panongu ghenguno azü huno au ajeu ngo piyiu aliwo kuptu shi ngove tsüe.

²³ Pharaohw khurshi, khurkulu eno khurshimi kümtsü no panoqo hasü azüghi mta lo ilove.

²⁴ Eno tsüthoni ke zülo Ampeu no ami ngo khüngküsü tsükucho dolono Egypt ghüshimi lau jupiqi eno panoqo pesü phiküghüzüve tsü,

²⁵ khurkulu pukhuqo mevetsü kehu panongu ye sawu mlave. Eno Egyptmi no pi, “Ningu Israelmi zülono poveni nolo, kughengu Ampeu no panoqo züqhushi Egyptmi mjochile anie.”

²⁶ Tile Ampeu no Moses vilo pi, “Azüghi shou o u chhopuwu lo, tishianguno azü no Egyptmi eno panow khurkulu ngo khurshimi shou idechile ikughive penie.”

²⁷ Ikehu Moses no azüghi shou pa u chhopuwu, eno kughou inaqhe shive keno azüghi no ideilo azüu tholo ngove. Egyptmi no tipau lo posü ilove kelo, Ampeu no Egyptmi azüghi mta lo vesüve.

²⁸ Azü no qochile ighi no khurkulu ngo khurshimi yimive; Pharaohw aqokitikhi azüghi lo panoqo hasü ighi keqo dolo khumu xümlave.

²⁹ Ikemu Israelmi ye azüghi mta lo qhaike yeghi lono chesü wuve, azü huno pano u ajeu ngo piyiu aliwo kuptu shivetsü.

³⁰ Ikehu tipa tsalani Ampeu no Egyptmi u lono Israelmi xaluve, eno Israelmi no azüghi mkülo Egyptmi thive keu ithulue.

³¹ Ampeu no Pa küka kughushu lono Egyptmi mjochile keu Israelmi no ithulue, ikehu timiqo no Ampeu sümsa, eno panongu no Ampeu ngo Pa qeu Moses lau pülübeve.