IPEKULU 11 - Sumi Naga CL (Re-edited) Bible (BSI)

Püsa Ashekhau pesü Shikichi

¹ Ampeu no Moses vilo pi, “Itaghi püsa lakhi I no Pharaoh eno Egypt shou süghini. Tithiuno pa no o pelo hileno wuvepe nani. Kughou pa no nongu puwuni keno, pa no nongu qhoi haphe nani.

² Itehi Israelmi no chikulupu shi pilo, kiptimi eno totimi lakhikhi no pütüta kisüghüu vilo ghükayi ngo ameshoyi no shikeu tinhemgha jeli khulo.”

³ Ampeu no Egyptmi nhethe lo timiqo kimiyeqhiyi ithulupe. Tinguno alau, Moses ye Egypt yeghi lo Pharaoh qemi eno timiqo zülo ighono kije shive.

⁴ Tighenguno Moses no pi, “Ampeu no ishi piani: ‘Zübumta lono I no Egypt qha kümtsü wuni,

⁵ eno Egypt yeghi lo anu anoghiu kümtsü thive nani, Pharaoh khuu kükalakhü lo iqa ani keno, pa nu anoghiu lono aqüaxeliu khuu athi shesü cheni keno, li nu anoghiu, eno lhoxü piti tüghüu kutolo thive nani.

⁶ Egypt yeghi kümtsü lo küqa kumlo kije anani, titoi keu ye khilemu shimphi eno shikithe monani.

⁷ Ikemu Israelmi eno panow lhoxü shou ye atsü nomu gheha monani, tishikeu lono Ampeu no Egyptmi ngo Israelmi dolo kiyeqü keu shi püatsü anie pi nongu no ithi nani.’

⁸ Eno o qemi hipaqo kümtsü no I lau ighi no pishiqhope pi nani, ‘No eno timi o pape chekeqo kümtsü ipevelo.’ Eno tithiuno I no ipeve nani.” Eno pa no amloidesü Pharaoh launo ipeve.

⁹ Tileno Ampeu no Moses vilo pi, “Pharaoh ye o tsa ini tsümo nani, tishianguno Egypt yeghi lo Iw akümzapu kümlaqo küghüsünie.”

¹⁰ Moses ngo Aaron pama no Pharaoh zülo akümzapu hipaqo shie, eno Ampeu no Pharaoh mlo shikümkave tsü, eno pa no pa yeghi lono Israelmi puwumoe.