IPEKULU 10 - Sumi Naga CL (Re-edited) Bible (BSI)

Püsa Akütacheu: Tülhaqu

¹ Tithiu Ampeu no Moses vilo pi, “Pharaoh lau ilolo, kughengu I no pa ngo pa qemi mlo shikümkave tsüae, tishikeu lono panoqo lau Iw amchipu hipaqo piyeni,

² eno nongu pelo nongu nuli eno atilimi vilo I no kishi mkamihi Egyptmi peitha eno kiu michipu panoqo lau shitsü keno pi peniye, tishianguno nongu pelo Ni ye Ampeu kepi ithi peniye ke.”

³ Ikehu Moses ngo Aaron pama no Pharaoh lau wuno pa vilo pi, “Ampeu, Hebrewmi Lhou no ishi piani, ‘No ye I zülo ado khitohi no ampi pesü aqhokigheu shini keu mili anani kea? Iw timiqo puwuvelo, tishianguno panoqo pelo I qelu pelo.

⁴ Kughengu nono Iw timi puwuni keu milive aye, julo, I no thoghiu tülhaqu o ghakhu lo süghini,

⁵ eno tipaqo no ayeghi nhachhive nani, tishikeu lono khunomu ayeghi ithumlave nani. Eno mürasü no kiu achili qhive keno tipaqo no chukhave nani, tipaqo no aluza lo thuipeghi akeu sübo külhü chukhave nani,

⁶ eno tipaqo no o ki, o qemi ki eno Egyptmi kümtsü ki nhachhive nani, ti ye o puasü noqo no ayeghi lo ighike lono ishi kutolo khilemu ithumla aphi keu ke.’” Tishino pa ye Pharaoh launo tsüghüsü ipeve.

⁷ Tithiu Pharaoh qemi no pa vilo pi, “Ado khitohi timi hipau pelo ningu kitime apeni kea? Timiqo puwuvelo, tishianguno pano pelo Ampeu pano Lhou huthulu pelo. Egypt ye kütsavae pi no ye vethamla aphi keshea?”

⁸ Ikehu Moses ngo Aaron pama sasü Pharaoh lau ideighi. Eno pa no pi, “Wulo, Ampeu no Lhou huthulu lo. Ikemu khunoqo no wuni kea?”

⁹ Moses no pi, “Ningu ye kichi-iti kümtsü sawu nani, ni tianuli, eno ni mbeloji ngo amishi loji kümtsü sawu nani, kughengu ningu ye Ampeu lau aghulhu shimasa nani ke.”

¹⁰ Ikemu pa no pi, “Tsala I no nongu eno nonga kughunuqo puwuve aye, Ampeu no nongu gholo apeniu! Kughengu julo, nongu ye küsakügha kimji hami amlo lo anie.

¹¹ Moe! Nongu gholo kiptimiqo no wulo, eno Ampeu huthulo, kughengu nongu no khu akeu ye tipau ke.” Eno pama ye Pharaoh zülono hapheve.

¹² Tithiu Ampeu no Moses vilo pi, “Egypt yeghi shou tülhaqu ghenguno o u peqhelo, tishikeu lono tipaqo no Egypt yeghi shou ighive peni eno ayeghi hipau lo mürasü no achili qhive keqo sütsüni kümtsü külhü chukhave penie.”

¹³ Ikehu Moses no pa küsü Egypt yeghi shou peqhe, eno tipani putho pucho kupuju Ampeu no kipela mülhü ayeghi tipau shou süghie. Kughou inaqhe shi keno, kipela mülhü no tülhaquqo süghive.

¹⁴ Tülhaqu no Egypt yeghi kümtsü shou ighive eno Egypt ghakhu kümtsü lo ngove, titoi keu tülhaqu loji ye khilemu ighi mphi eno khilemu ighi kithemo nani.

¹⁵ Tipaqo no ayeghi kümtsü nhachhive, ikehu tipa yeghi ye zümoive, eno ayeghi lo mürasü no achili shi qhive keu sütsüni eno axathibo kümtsü tipaqo no külhü chukhave. Egypt yeghi lo aluza lo asübo momu atsüni kiumu qhitsü move.

¹⁶ Tileno Pharaoh no mtazü Moses ngo Aaron kuno pi, “Ampeu, nongu Lhou shou eno nongu shou I no axine shivae.

¹⁷ Tighenguno, kimiyeno itehi I kipimi qhive tsülo, hi likhi ake, eno Ampeu nongu Lhou vilo I launo akithi hipau ikhive tsü penike inikhu tsülo.”

¹⁸ Ikehu pa no Pharaoh launo ipeve no Ampeu lau inikhue.

¹⁹ Ampeu no amülhü pesü ighono akümka kulola mülhü shivetsü, tino tülhaquqo fusasü Akuhu Züghi lo süve tsü. Egypt ghakhu kümtsü lo tülhaqu lakhimu kühave.

²⁰ Ikemu Ampeu no Pharaoh mlo shikümkave tsü, eno pa no Israelmi pelo wu pemoe.

Püsa Atokuu: Aküzü

²¹ Tithiu Ampeu no Moses vilo pi, “Atsütsü küdau o u peqhelo, tishino aküzü pelo Egypt yeghi shou ighi penie.”

²² Ikehu Moses no atsütsü küdau pa u peqhe, ikelo atsala küthü kutolo Egypt yeghi kümtsü lo aküzü kutho ighive.

²³ Panongu ye lakhi no lakhi ithumlave, eno atsala küthü kutolo milakhimu pa-a lono puthugho move, ikemu Israelmi ye panongu no khile akeno tile ye aküvü ae.

²⁴ Tithiu Pharaoh no Moses kuno pi, “Wuvelo, Ampeu qelo; no tianuli kughunuqo ghi nongu gholono wulu nani; nongu mbeloji ngo amishi lojiqo ye qhivelo.”

²⁵ Ikemu Moses no pi, “No ye ni pelo aghakishi ngo akipti kümllagho shilupe masae, tishianguno nino Ampeu ni Lhou lau aghakishi shinie.

²⁶ Ni tsü-aqu ghi ni gholono wu masae; apukhumtsü kupu lhoxü lakhimu qhimo nani, kughengu ni MPEU Alhou mllani ke ningu ye tipaqo ghi sawu nani, wo tomphi loye kiu lhoxü pesü Pa mlla nani keno ningu ye ithini chemoe.”

²⁷ Ikemu Ampeu no Pharaoh mlo shikümkave tsü, eno pa no panoqo pelo wu pemove.

²⁸ Tithiu Pharaoh no pi, “I launo wuvelo; I pelo khilemu itaghi o ju ithulupe kevilo, kughengu nono ni ithulu ke tsala lono no ye thiniae.”

²⁹ Moses no pi, “Nono pi ketoi, ni ye khilemu o gi ithulu kithemae.”