IPEKULU 1 - Sumi Naga CL (Re-edited) Bible (BSI)

Egypt lo Israelmi Shishe Ikowove

¹ Israel nuli khunoqo Jacob gholono Egypt lo ighi keno, pütüta kibo kiqi lono hipaqo ke:

² Reuben, Simeon, Levi, eno Judah,

³ Issachar, Zebulun, eno Benjamin,

⁴ Dan ngo Naphtali, Gad ngo Asher.

⁵ Jacob tikughukomi kümtsü kelo pano lhotsüni; Joseph ye azüu no Egypt lo ngo aghive.

⁶ Tithiu Joseph, eno pa thiküzümi ngo pano tiqhelimi ye kümtsü thikhave.

⁷ Ikemu Israel shiaye ye shishe kije ikowove; panongu ye kighishe wove eno shishe mtotoi thuwuve, ikehu panongu no ayeghi tipau chhitoive.

Pharaoh no Israelmi Neda-qoda

⁸ Akükau kithe lakhi, khuu Joseph mtha keno, pa no Egypt shou ayepe luve.

⁹ Pa no paw timiqo vilo pi, “Julo, ni ghenguno Israelmi ye ighono kutomo eno akumto shivae.

¹⁰ Ighilo, ningu tsükhüi shi panoqo peitha luveni nolo, tikumo aye panongu no kughuko wove no tsala aghükishi ipeghi aye, panongu no ni ghümi gholo küqhano ni mjochile eno ayeghi hipau lono pokave nosae.”

¹¹ Tighenguno panongu no amakho kimshi pesü panoqo ghimeni ke aqemi hekiqhimi panoqo shou qhive. Panongu no Pharaoh ghenguno pekükütsü mishighüna, Pithom ngo Raamses shiqhe pukue.

¹² Ikemu panongu no Israelmi ala ghime aye, Israelmi no alaushi kighishe wove eno alaushi inaghau qhawove.

¹³ Ikehu panongu no mkamihi Israelmi pelo aqüaxemi toi mla pe

¹⁴ aghani ngo pititu kümla, eno aluza lo akümla jeli kümtsü aghimeshi mlakeu vecheo panoqo küxü kukhukimji shitsü. Akümla kümtsü lo panoqo pelo aqüaxemi toi mlape ke.

¹⁵ Tithiu Egypt kükau no Hebrewmi anga jukupunumi, lakhi no Shiphrah eno lakhiu no Puah, pama vilo pi,

¹⁶ “Kughou nokujo no apunu lüpa lo Hebrew totimi jukupununi keno, tsala kiptimi shi aghi aye, nokujo ye pa pithive masa, ikemu totimi shi aghi aye, li ye xülu nani.”

¹⁷ Ikemu jukupunumi pama ye Alhou msave eno Egypt kükau no pama azah tsü ketoi shimove, eno kiptimiqo pelo xülupe.

¹⁸ Ikehu Egypt kükau no jukupunumi pama kuno pi, “Nokujo ye kushiye ishi kiptimiqo pelo xüluvepe kea?”

¹⁹ Pama no Pharaoh vilo pi, “Kughengu Hebrew totimiqo ye Egyptmi totimi toimoe, kughengu panongu ye akumto kehu jukupunumi no panoqo lau ighikumo züuno punuve chenie.”

²⁰ Ikehu Alhou no akivishi jukupunumi pama lau mlatsü, eno timiqo ye kughuko wove no ighono akumto shi thuwuve.

²¹ Jukupunumi pama no Alhou sümsa ke ghenguno Pa no pama kibo kughu tsüe.

²² Tithiu Pharaoh no paw timi kümtsü lau azah tsü, “Hebrewmi lau anu kiptimi punu keqo kümtsü nongu no Nile lo vesüve lo, ikemu anga totimi ye kümtsü püxülo.”