IBRIMI 9 - Sumi Naga CL (Re-edited) Bible (BSI)

Ayeghilo Akimthe-a

¹ Puloshoqhi atüghüu ghi akümlla khuaye eno ayeghilo kimthe-a acheke.

² Khalau bocho phiki shipe qhino tile akulu kibepu eno akibepu ngo Alhou mllakeu sho qhiche. Tino akimthe-a ipiche.

³ Nhaqhiphi akiniu thiu Shishe Akimthe-a ipikeu akiniu bocho ache,

⁴ tile tsüngqüi keu kiptia ameshoyi no shikeu ngo puloshoqhi bohu ameshoyi no ako kümtsü küzüve keu ache, tipau alou ameshoyi bohu lo manna süpüa, Aaron küsü anipa ishe ipeghive keu, eno atulupha kini lo puloshoqhi tsa yepe qhikeu ache.

⁵ Abohu shou Alhou juküvü cherubim no achishibo sükhope kimiyekini lakhü khonhape ache. Itehi ye hipaqo vehu kishekulu shi pikhamlae.

⁶ Hi kuchopu kutope qhino achinemi no tsalakipe kümlapu shiniye khalau bocho lo iloche,

⁷ ikemu akiniu bocho loye achinetou likhino ampe lo ghuthu lakhi likhi iloche, tighi pa ampi ghenguno eno timiqo kümtha xine ghenguno aji pemo keloye ilo chemoe.

⁸ Hipau vecheo Aghungu Kimthe no ningu piye akeu ye khalau bocho no ake thaqhülo Shishe Akimthe-a lo iloni keu pephemla aphie

⁹ (hi ye ishi tiqheli michipu ke). Hipau kikithi kiqilo agho ngo aghakishi ye akümllamiw kiviküsa lotsü shikütsüghüve tsümlae,

¹⁰ ikemu kuchu-kusho eno qhukimthe keu khuaye likhie. Hipaqo ye akikili kithe ighi moke dolo aphimpi ghenguno bekütha yeqoke.

Khristo Ji no Xachilelu

¹¹ Ikemu kughou Khristo no thime kivi akeqo ghenguno achinetou shi keno, pa no (au no shimo keu, ti ye pulhoküsü gholo kumokeu) phiki akijeu eno kupukülai keu lo iloe.

¹² Pa ye anetsü ngo aneti ji pesü ilomoe, ikemu pa ampi ji pesü ghuthu khavino kümtsü ghenguno Shishe Akimthe-a lo ilo no lhokta xachile kulupu pesü ni tsüke.

¹³ Kughengu anetsü ngo amshitsü ji, momu amshiali pitikeu yevu pesü mithe kumomi shou lepuku kelo ashou shikimthe luve cheni aye,

¹⁴ Khristo, khuu no lhokta Ghungu vecheo tukutiye kühano Alhou lau pa ampi pephe tsü keno, pa ji ye tinguno alau ningu pelo aküxüpu Lhou huthu peniye akithipu kümla lono niw kiviküsa lotsü shikimthe tsülu nani.

¹⁵ Hi ghenguno pa ye puloshoqhi akitheu lacheu ke, tishianguno kuluve kemi pelo lhokta mheghi pikiqhi ithulu peniye ke, kughengu puloshoqhi atüghüu lo timi no axine shikeu lono xaphe niye akithi ighike.

¹⁶ Milakhi no amheghi tsüniye yepüa kelo pa ye thivae pikeu paghi mtsüqhei lumasae.

¹⁷ Kughengu akiye ye thive kethiu likhino avehu shini aphi thono pa no xüaphi loye kiumu akiqi kühae.

¹⁸ Tihutoi puloshoqhi atüghüu ghi aji sümo kelo huthuphe püamoe.

¹⁹ Moses no timi kümtsü lau Ayezah lo azakütsü lakhikhi no sheshu kelo, pa no amshiti ji ngo ane ji pesü azü, ayiloni eno ayeho kuhu gholono Ayezah kaku ngo timi kümtsü shou küzüte puku,

²⁰ eno pi, “Hi ye Alhou no azah nongu tsükeu puloshoqhi jike.”

²¹ Tihutoi itaghi Moses no aphiki ngo akümlla khu-ajukhu kümtsü aji no küzüteve.

²² Kuchou no Ayezah qholo ye thokha aji pesü shikimthe che, eno aji pelemo keloye axine qhikütsü kühake.

²³ Kungughalo thime kimihi ye hitoike khuaye pesü shikimthe che, ikemu kungughalo thimeqo ye hinguno akiviu ghakishi pesü shiche.

²⁴ Kughengu Khristo ye au no shikeu, kuchou kimihi, akimthe-a lo iloke kumoe, ikemu itehi Alhou zülo ni züqhushi ipeghini ye kungugha lo iloke.

²⁵ Momu achinetou no ampe atsütsü pa ji kumono lhoxü ji pesü akimthe-a lo ilo chekeu toi Khristo ye anguno anguno pa pephe tsüniye iloke kumoe,

²⁶ tishike aye ayeghi lhopheke pa ye ghuthu kutomo imeve aghini cheke. Ikemu tiqheli shekuho lono pa no ghuthu khavino kümtsü ghenguno pa ampi pesü aghashive keu vecheo axine peve tsüniye ipeghike.

²⁷ Timi kümtsü ghuthu lakhi ye thive penike kughuve tsüae, eno tithiu no küghakütha ighi cheke toi,

²⁸ Khristo ghi timi kutomo xine puluve tsünike ghuthu lakhi pa ampi pephe tsüve kethiu ghuthu akiniu ipeghi nani. Ti ye axine peve tsüniye kumono pa khekulho shi akeqo xalu nani.