IBRIMI 8 - Sumi Naga CL (Re-edited) Bible (BSI)

Puloshoqhi Akiviu Chinetou

¹ Ningu no pi akeu tsa akhotou ye hike: ningu ye kungugha lo Kükanguagha lakhü ajeu iqa akeu chinetou hitoike ani,

² pa ye timi no shikeu kumono Ampeu no shikeu phiki kuchou, akimthe-a lo hukuthuu ke.

³ Achinetomi lakhikhi no akümllagho ngo aghakishi pesü mlla penike süsü püani; ikehu ni chinetou ghi kiuala pesü mlla kepu shive.

⁴ Pa no ayeghi lo aghike aye, achinemi shimoni cheke, kughengu Ayezah kiqi lono akümllagho pesü mllani kemi achinemi akhani.

⁵ Panongu ye kungugha lo akimthe-a akeu julho kimihi lono shicheni. Kughengu Moses no aphiki shiniye akelo, Alhou no ishi pa mijetsü, “Naghuto lo o piye keu ghola lono thokha kümtsü shilo.”

⁶ Ikemu Khristo no lacheu shino puloshoqhi shikeu no akiviu keke pa kümlau no aqau kümlapu nguno shishe akighicheu shive, kughengu ti ye thime kivi piqhi keu shouno shike.

⁷ Puloshoqhi atüghüu no akipimi kühake aye, puloshoqhi akiniu avehupu shimoni cheke.

⁸ Ikemu Alhou no ishi pi kelo Pa ye akipimi ithulu püanie: “I no Israel ngo Judah kibolomi sasü puloshoqhi kithe shini keu tsala cheni, ipi Ampeu no sheshu,

⁹ ti ye pano puasü no Egypt yeghi lo akelo I no au no sünhe saipeke tsalani no panoqo sasü puloshoqhi shikeu toimo nani. Kughengu panongu no Iw puloshoqhi pulo move kehu I no panongu jukuto moveke, ipi Ampeu no sheshu.

¹⁰ Ampeu no sheshu, hipa thiu I no Israel kibolomi sasü puloshoqhi shinikeu ye hike: I no I Yezah pesü pano kükümsü lo sütsü nani, eno pano mlo lo yepukutsü nani, I no panongu Lhou shi nani, eno panongu no Iw timi shi nani.

¹¹ Panongu khumu pano küsau momu pano thiküzümi vilo, ‘Ampeu ithilo’ ipimo nani, kughengu panongu gholo akitilau lono akijeu kutolo kümtsü no Ni ithi nani.

¹² Panow hekibide xineqo I no pevetsü nani, eno I no pano xineqo kihikülai tsümo nani.”

¹³ Hipa gholau no puloshoqhi akitheu tsa pi püzü Alhou no puloshoqhi atüghüu pesü adou shivetsüe. Eno kiu no adou eno aqa shive ani keno ti ye pai hauve nani.