IBRIMI 7 - Sumi Naga CL (Re-edited) Bible (BSI)

Achineu Melchizedek Kümla

¹ Kughengu Salem kükau, Akiqheu Lhou chineu Melchizedek hipau no Abraham no aghüla wuno kükami ghiqhi püzü woche kelo pa sasü kusholu no kümghatsü,

² eno Abraham no aghü lepughi keu lono chighi saje pa tsü. Pekibide kiqi lono pa je ye atüghüshi amikucho kükau, tipa shelo pa ye Salem kükau ghi, ti ye aloino keu kükau.

³ Pa ye apuaza küha, alagha kughuko küha, pa küxü bothu eno ashekha küha, ikemu Alhou Nu kimihi shi pa ye alholo achineu ke.

⁴ Timi hipau, asü Abraham no aghü lepughi keu lono chighi saje pesü tsükeu, ye kishi kije keno julo.

⁵ Levi laghami khunoqo achinemi keno, Ayezah lo azakütsü kiqi lono pano timi, ti ye pano thiküzümi Abraham laghami lau ghi chighi saje qhalu peni keu shike.

⁶ Melchizedek ye Levi laghami kumo kemu pikiqhitsa ithukuluu Abraham launo chighi saje qhalu eno pa kümghatsüe.

⁷ Tishiaye, kükümgha tsü akeu timi huye kükümgha ithulu akeu timi nguno akijeu kepi ithithaivae.

⁸ Ala halau no thiveni kemi no chighi saje ithulu cheni; ikemu ala halau ye xüakeu huno ithulu cheni.

⁹ Khuana ye chighi saje ithulu chekeu Levi hughi Abraham vecheo chighi saje pesü tsüvae piluvi,

¹⁰ kughengu Melchizedek no Abraham sasü kusholu kelo Levi ye punu mphi kemu pasü philo acheke.

Jisü ngo Melchizedek Kimhe

¹¹ Levimi kümlapu vecheo kupukülailu cheghi aye (kughengu tipau chine qholono timiqo no Ayezah ithulu keke), kushiye Aaron gholau no ighikeu ipimo no Melchizedek gholau no itaghi achineu kütau ighikeu avehupu shive kea?

¹² Kughengu kughou achineu kiliveni keno ayezah ghi kilive kepu shive cheni.

¹³ Ni Mpeu, khuu ghenguno hipaqo vehu pi püani keno pa ye kütami lagha ke, pano lagha loye khumu akiptia lo mla püamoe.

¹⁴ Ni Mpeu ye mtsüqheino Judah laghami ke; eno Moses ye pano lagha jeku püamoe.

¹⁵ Hi ye achineu lakhiu Melchizedek kimihi shi ipeghi kelono mtsüqhei kitheve ani,

¹⁶ pa ye ayezah bekütha kiqi lono ajilo kiyighi chineu kumoe, ikemu kütsave mlakeu küxü küka vecheo achineu shilue.

¹⁷ Kughengu pa ghili ishi ashepe shipüani, “No ye Melchizedek ghola lono alholo chineu ke.”

¹⁸ Ala lakhi lo püzüu zakütsü ye miqemlei eno avehu kühave kehu qhivae

¹⁹ (kughengu Ayezah ye kiumu kupukülai tsü püamoe); ikemu ala halau ye lajupu akiviu kilethivae, tipau vecheo ningu ye Alhou kupunu wulu cheni.

²⁰ Hi ye ashoqhi sümono shike kumoe. Kughengu püzüu achinemi shikelo ashoqhi lumono shiveche,

²¹ ikemu Jisü ye Alhou no pa vilo ishi pikeu vecheo ashoqhi shino achineu shilu, “Ampeu no tushoqhivae, Pa ye Pa kükümsü kilivemo nani, ‘No ye alholo achineue.’”

²² Hi no Jisü pesü puloshoqhi akiviu pepimhe kütsüu shipe ke.

²³ Azüu achinemi ye kutomo ache, kughengu akithi no panongu kümla lono pano hakhave cheke,

²⁴ ikemu Jisü ye alholo acheni kehu paw achine kümla ye ishokibe acheni.

²⁵ Ikehu khunono pa vecheo Alhou lau ighini keno, pa ye tipaqo qhoi xakulupu shi nani, kughengu panoqo ghenguno Alhou lau qhüiniju tsünike pa ye alhokuthu xüacheni.

²⁶ Ningu no akimthe, tichetighe küha, tukutiye küha, axinemi launo kütüta shipe atsütsü nguno kunguu süqheve keu chinetou hitoike aghikeu ye achipie.

²⁷ Pa no ghuthu khavino kümtsü ghenguno pa ampi ikhiphe tsüve keke pa ye achinemi kütami toi atüghüshi pa xine ghenguno eno tithiu no timiqo ghenguno tsalakipe ghakishi shi akepu kühae.

²⁸ Ayezah no miqemlei kemi pesü achinetomi shi penike süsü cheni, ikemu Alhou shoqhi tsa, khikhi Ayezah thiuno ighi keno, tino alholo ghenguno Anu kupukülai keu süsüke.