IBRIMI 6 - Sumi Naga CL (Re-edited) Bible (BSI)

¹ Tighenguno ningu abothu lo Khristo ghili pekishe chekeqo nguno alau tekhoike küdau wuni nolo, akithi kümla lono xaidelu keu eno Alhou lau aküpülü belu keu boqha qhakithe moni,

² baptizkishi ghili, au kibe, kithimi xüchilekulu, eno lhokta küghakütha pesü itaghi aboqha qhakithe moni.

³ Eno Alhou lopushi aye ningu no hipau shini.

⁴ Kughengu kushokütsüpu lakhi akeu ye, khunono ghuthu lakhi lo Alhou küvü lo ache, kungugha gho michelu, Aghungu Kimthe gho küsajelu,

⁵ Alhou tsa ye akivipu kepi michelu eno ighini keu tiqheli kükakumto micheluve

⁶ kethiu no ikiqiveni keno, panongu ye itaghi pano ghüzave ghi kros lo Alhou Nu yeda kithe no shikukujo ani keke panoqo sasü xaideghi luni keu ye kushokütsüpu ke.

⁷ Kughengu khipa yeghi no ghuqhi kelo papashi tsütsüghu mighelu püzü azü yitsüpe avehupu shilu peniye asütsüni thuipeghi lupe cheni keno, Alhou launo kükümgha ithulu cheni.

⁸ Ikemu tile asahu ngo alupi thuipeghi aye, ti ye ameküha eno ghushove ke paphi shive cheni, eno ashekha loye ami no pitive kepu shive cheni.

⁹ Kimiye chekeqo, nino hipa gholau no pi animu nongu vehu loye hinguno akiviu—xakulupu thebei ani.

¹⁰ Alhou ye achipiu kehu nongu no akümla eno kikimiye, Pa je lono küpülümi lau pephe püakeu eno itehi kutolo mu tishi akeu juzüvetsü nanike kumoe.

¹¹ Eno nino kümsü pulo akeu ye nongu lakhikhi no ashekha kutolo mtsüqhei keu lajupu athoshi qhilu penishi ani,

¹² tishianguno nongu ye qeinaive mono khunono aküpülü eno kheakulu vecheo pikiqhitsa ighilu keno tipaqo kimihi shilu peniye ke.

Alhouw Pikiqhitsa ye Thebei

¹³ Kughengu kughou Alhou no Abraham lau piqhi keno, Pa ye Pa nguno akijeu küha keke khuu lau piqhimo kehu Pa ampi je kuno tushoqhi,

¹⁴ eno pi, “Kuchou no I no o kümghatsü no o lagha kughuko tsüni.”

¹⁵ Ikehu kheakulu shikeu lono Abraham ye pikiqhitsa ithulu ke.

¹⁶ Timi ye panoqo nguno akijeu kiuala jeku tushoqhi cheni, eno pano küküpna kümtsü lo ashoqhi no xakütha ashekhau shicheni.

¹⁷ Ikehu kughou Alhou no Pa shoqhi kiyighimi lau kilive mlakeu lhoaye piyeni ke pulove keno, Pa no ashoqhi pesü ti mtsüqhei shitsüe,

¹⁸ tishianguno ala kinikujo lo Alhou ye akimkiu shivemla kehu ningu khunoqo no Pa ijeluve akeno mtotoi shi lajupu ni zülo qhitsü keu tsüqülu peniye ke.

¹⁹ Ningu ye lajupu hipau angulhow thebei eno ithamo keu yiküba toi ani, lajupu hi no nhaqhiphi thiu alou chebo lo ilocheni,

²⁰ ti ye Melchizedek ghola lono alholo ghenguno achinetou shive keu Jisü huno ningu züqhushi azüuno ilove keu-a loke.