IBRIMI 5 - Sumi Naga CL (Re-edited) Bible (BSI)

¹ Kughengu timi no achinetou kishe keu thaqhü ye axine ghenguno timiqo züqhushi Alhou lau akümllagho ngo aghakishi tsü penike süsü cheni.

² Achinetou ghi kupukümla kehu pa ye khunono aye kümthami eno ala ghüzümi keno tipaqo mtshaminhei tuchomjo cheni.

³ Hi gheno pa no timiqo xine ghenguno aghashi cheke toi pa ampi sala shi masave cheni.

⁴ Alhou no Aaron kulu keu ghola lono kumo aye timi ye khunomu pa likhi pa kishelu chemoe.

⁵ Tihutoi Khristo ghi achinetou shi penike pa ampi süqheke kumoe, ikemu Alhou khuu no hipa tsa pi keno, Pa no Khristo kishelu ke, “No ye I Nu, ishi tsala lono I no o Pu shiluvae.”

⁶ Pa no a-a lakhiu lo ghi ishi pi püani, “No ye Melchizedek ghola lono alholo achineu ke.”

⁷ Jisü no ayeghi lo ache kelo aghügha kuloghi eno anhezü kipiji pesü Alhou khuu no akithi lono pa xalu nani keno, Pa vilo khuche, eno pa lolo sükümsa akeu ghenguno ikhilu tsüche.

⁸ Pa ye Alhou Nu shi anamu aghime vecheo aghokulu shikalu.

⁹ Pa pesü kupukülai shitsü kelo pa no pa gholu kemi kümtsü ghenguno lhokta xakulupu puki shive,

¹⁰ ti ye Melchizedek ghola lono achinetou shi penike Alhou no aje kuvetsü.

Ikiqi pemo nike Ghutu

¹¹ Hipau vehulo ningu ye kutomo pikepu aphi kemu nongu no ini kushughive akeke chixechilei pini keu sho ani.

¹² Kughengu itehi nongu ye shikükami shiuve aghi kepu kelaye itaghi kütamiu no Alhou no tsükeu boqha tsape pesü nongu shika kepushi aphi kena. Nongu ye akümka chuqupu züqhulo akichhizü avehupu shiaphie.

¹³ Kughengu khuu no akichhizü yecheni keno pa ye itimi shiaphi keke achipiu mikucho tsa ithikuthulu mphike.

¹⁴ Ikemu akümka chuqupu ye kichimi, khunono akivi aküsa dolo kütüta shiniye kimchikulupu küka lono qophe puthupe alhokuthu pepimhe acheni keno, panongu ghenguno ke.