IBRIMI 4 - Sumi Naga CL (Re-edited) Bible (BSI)

Sabbath Kulhokiqhi

¹ Tighenguno Alhou kulhokiqhi-a lo iloni ke piqhi püakeu tüqhüdo lo ningu msaighüni nolo, tikumo aye kutou milakhi nomu ti tomlave nosae.

² Kughengu panoqo lau toi ningu lau ghi atsakiviu ighi, ikemu panongu no chilu keu tsape ye pano lapu shimove, ti ye panongu no aküpülü süno ti chilu kemi sasü küqhalu moke.

³ Tishiaye ningu khunoqo no pülü luve akeno tipa kulhokiqhi-a lo thebei ilo ani. Ayeghiqha boqha gho ake lono Pa kümla kümtsü tave keghi Pa no pike, “I loghu lono I no tushoqhive ketoi panongu ye I kulhokiqhi-a lo ilomo nani.”

⁴ Kughengu khileala Pa no atsala akütsüniu vehu ishi pi püani, “Atsala akütsüniu lo Alhou no Pa kümla kümtsü tave no akulhoqhive.”

⁵ Eno itaghi tipau tsamqo lo ishi pi, “Panongu ye I kulhokiqhi-a lo ilomo nani.”

⁶ Ikehu khunoqo no püzüu atsakiviu ikhilu kemu hekibide ghenguno ilomlave keno tipaqo ngo timi khami tile iloni kemi aphi keke

⁷ Pa ye itaghi atsala lakhi, “Ishi tsala,” ipikeu kuto püani, ti ye Pa no ishi pive keu ampe kutomo thiu no David vecheo pi, “Ishi tsala lo nongu no Pa sütsa chilu aye, nongu mlo shikümka kevilo.”

⁸ Kughengu Joshua no timi kulhoqhi tsü püaghi keaye, Alhou ye tipa thiu atsala kütau vehu pimoni cheke.

⁹ Tighenguno, Alhouw timiqo ghenguno Sabbath kulhokiqhi ye aphike,

¹⁰ kughengu khukhumu Alhou kulhokiqhi-a lo ilolu keu ye Alhou no Pa kümla lono akulhoqhi ketoi pa ghi pa kümla lono akulhoqhi luvae.

¹¹ Tighenguno ningu tipau kulhokiqhi-a lo iloni ke pükapütsani nolo, tishianguno khunomu hekibidemi toi ikiqive pemonie.

¹² Kughengu Alhou tsa ye aküxüküa eno aküka ani, putoputo zütakikihi nguno akütsüghau, angulho eno anguagha, aqüki anhüki kikije-a kutolo ghitha ilo chekeu, eno amlo akükümsü lo akeu kutolo jupililu chekeu ke.

¹³ Alhou no lhosü keu kiumu pesü küsüve mlae, ikemu ningu no khuu lau kihikülai tsümasa nani keno, Pa nhethe loye kümtsü lhaphepe eno pekipheshi ani.

Achinetou Akijeu Jisü

¹⁴ Tishi aye ningu ye achinetou akijeu, khuu kungugha lo ani keno, Alhou Nu Jisü hu ani keke ningu niw pikiphe küpülü mtotoi tsüqü peni nolo.

¹⁵ Kughengu ningu ye ni kutokumo vetha tsümlani keu chinetou anike kumoe, ikemu alaghi kümtsü lono ningu toi ghükeju kemu axine shipüamo keu chinetou anie.

¹⁶ Tighenguno ningu amlo kumtoshi küpükini kükalakhü kupunu wuni nolo, tishianguno ningu no kimiyekini ithulu eno avehupu shive kelo küpükini phulu nani.