IBRIMI 3 - Sumi Naga CL (Re-edited) Bible (BSI)

Jisü ye Moses Nguno Akijeu

¹ Tighenguno, küpülümi athiküzümiqo, nongu khunono kungugha saje kulumi shive akeno, apostol eno achinetou Jisü, niw pikiphe küpülü lau jupukulo,

² Moses no Alhou kibo lo pükhükulupu shike toi Jisü ghi pa süsü keu Lhou lau pükhükulupu shike.

³ Aki kishiu no aki nguno alau agigihu ithulu ketoi Jisü ye Moses nguno alau ameküapu gigihu ithulue.

⁴ (Kughengu aki kümtsü timi no mla cheni, ikemu thokha kümtsü kümlau ye Alhou ke.)

⁵ Moses ye aqemi lakhi shi hithiu piniye akeu tsalo thopi shi penike Alhou kibo lo pükhükulupu shike,

⁶ ikemu Khristo ye Anu lakhi shi Alhou kibo shou pükhükulupu shike. Eno tsala ningu no mtotoi niw lajupu lo amlo kuloghi shi aye ningu ye Alhou kike.

Alhou Pülümo kemi Kütüghü

⁷ Tighenguno Aghungu Kimthe no piake toi, “Ishi tsala lo nongu no Alhou sütsa chilu aye,

⁸ hekibide ghuloki lo toi nongu mlo shikümka kevilo, asayeqha lo pejuke tsala lo,

⁹ no puasüqo no ampe lhobidi kutolo tilau no I ghükeju eno I kümlaqo ithulu püani.

¹⁰ Ikehu Ni ye tipa tiqhelimi ju I ghaideve no pike, ‘Panongu mlo ye alhokuthu akumou lalo wuve no I laghi ye ithi move cheni.’

¹¹ I loghu lono I no tushoqhive ketoi, ‘Panongu ye I kulhokiqhi-a lo ilomo nani.’”

¹² Athiküzümiqo, nongu milakhi lolomu alhoksa eno pülükümla mlo xapu aghi no kutou aküxüpu Lhou launo ikiqive nosake kutokupui lo.

¹³ Ikemu “Ishi tsala” ipi ake tivilo nongu ye tsalakipetsü lakhino lakhi shikumto kilelo, tishianguno pishikiqhi xine pelo khuu mlo mu shikümkave pemonie.

¹⁴ Kughengu ningu no abothu lo ni mlo kuloghi shiche ketoi ashekha kutolo mtotoi tsüqü pelu aye ningu ye kümtsü Khristo lau kulojilu kemi ake.

¹⁵ Ishi yepüake toi, “Ishi tsala lo nongu no Pa sütsa chilu aye, hekibide ghuloki lo toi nongu mlo shikümka kevilo.”

¹⁶ Khunoqo no chilu pülaghi hebideve kea? Panoqo ye Egypt lono Moses no saipeghi keqoke kumo?

¹⁷ Eno khunoqo no ampe lhobidi kutolo Alhou xukutho kea? Panoqo ye axine shive püzü pano phimpiu ghi asayeqha lono ikiqi thive keqoke kumo keshea?

¹⁸ Eno ti hebideve kemi lau kumono Pa ye khunoqo vilo Pa kulhokiqhi-a lo ilolumo nanie pi kea?

¹⁹ Ikehu ningu no ithi akeu no panoqo ye pano küpülü kumo ghenguno ilomlave ke.