IBRIMI 2 - Sumi Naga CL (Re-edited) Bible (BSI)

Xakulupu Kughucho Kevilo

¹ Tighenguno ningu no kiu chiluve akeno tipau lo amlo tsüshe masae, tikumo aye ningu ye putosüve nosae.

² Kughengu kungumi vecheo sheshu keu tsape no pükhükulupu shive keke, eno küqüve keu momu hekibide kümtsü tipa qhemi aghimepu sholuve keke,

³ xakulupu kije hikithipu kughuchove aye, kishino ningu ye poluni kea? Ampeu no atüghüshi hi sheshue, eno tithiu khunoqo no chilu keno panongu no ni vilo mtsüqhei shitsüe.

⁴ Alhou ghi amchipu eno akümzapu, mzamghalei keu jeli eno Pa pulou kiqi lono küsaje tsükeu Aghungu Kimthe gho vecheo ashepe shiküqha tsüke.

Xakulupu Süghikütsüu

⁵ Alhou ye kungumi pelo ighini keu yeghiqha, khipa ghili ningu no kügha ani keno, tipau shou yepemi shi penike qhipüa moe.

⁶ Khileala ishi ashepe shipüake toi, “Timi ye kiue pi Nono pa ghenguno O lomsü acheni, momu timi keno-o kuu Nono pa tuchomjo acheni kea?

⁷ Nono pa pesü kungumi nguno kitila akuchuniu shivetsü; Nono ajekipi eno agigihu pesü pa qhopipe;

⁸ thokha thime pesü pa pukhu philo qhitsüe.” Alhou no thokha pa qholo qhive tsükeu lo kiumu paw ghaküsü nguno khalau ye qhitsümoe. Itehi ningu ye thokha pa qholo akeu ithulu amphie.

⁹ Ikemu Jisü khuu ado hami ghenguno kungumi nguno akuchuniu shivetsü keno ningu no ithulu ani, akithi ghime ghenguno itehi ajekipi eno agigihu kütsükuqho pu akeu ye Alhouw küpükini vecheo pa no kümtsü ghenguno akithi miche kepu shive kehue.

¹⁰ Kughengu pa ghime vecheo anuli kutomo ajuküvüpu lo süghilu keu lo Alhou khuu vecheo thime kümtsü acheni keno Pa no Jisü pelo xakulupu la lo amiheu shilupe keu ye achipilo ke.

¹¹ Kughengu khuu no axine shikimthe cheni eno khunoqo no mithe luve cheni keno kümtsü akuhu aghü lakhi lono ke. Tighenguno pa ye panoqo vilo athiküzümie pini keu kujo chemoe,

¹² ishi pike toi, “I no I thiküzümi vilo O je pitsüni; aqoaho zülono I no O shekiqhe le pheni.”

¹³ Itaghi, “I no Pa lau I küpkhü beni.” Eno itaghi, “Ni ye Alhou no atianuli I tsükeqo sasü hile anie.”

¹⁴ Ikehu atianuliqo no ashi eno aji xapu aketoi, pa ampi ghi panoqo kimihi shi thokha küsaje ke, tishianguno pa kithi vecheo tüghami khuu no akithi küka ache keno kütsave niye ke,

¹⁵ eno khunoqo akithi kümsa ghenguno aküxü tivi qüaxe lo tsüghape ache keno xapheve niye ke.

¹⁶ Kughengu mtsüqheino pa ye kungumi kuphu chenike kumoe, ikemu Abraham polo kughukomi kuphu cheni.

¹⁷ Tighenguno pa ye thokha jeli lono pa thiküzümiqo kimihi shi masave, tishianguno Alhou kümlapu lo pa ye kimiyeqhiyi keu eno pükhükulupu chinetou lakhi shi püzü timiqo xine ghenguno alashitsü peniye ke.

¹⁸ Kughengu ghukuju lo pa ampi no imejuve akehu pa ye khunoqo no ghukuju sholu ani keno kuphulu nani ke.