IBRIMI 13 - Sumi Naga CL (Re-edited) Bible (BSI)

Alhou Lopu Ghakishi

¹ Athiküzümi dolo kimiye kile ketoi kimiyelo.

² Shoinami sasüni keu kughucho kevilo, kughengu khami ye mthano kungumi sasü luvae.

³ Nongu no akughumi gholo akughushi akeshi panoqo kümsü lulo, nongu ampi no shilusa akeshi aghimeshi akeqo kümsü lulo.

⁴ Kümtsü no külakupu gihu masae, eno külakupu lüpa shipixi kepu kumoe, kughengu kipti toti dolo mithekumomi eno küsalhami shou Alhou no küghathabe nani.

⁵ Pisa kimne lono o küxü putosü lulo, eno nono kiu ani keno o ghakiqi shilo, kughengu Alhou no pi, “Ni ye khilemu o qhivemo, momu o phevemo nani.”

⁶ Ikehu ningu ye amlo kumtoshi pilu nani, “Ampeu ye I kukuphuu; Ni ye msavemo nani; Timi no I lau kiu shiluni kea?”

⁷ Now sakiphemi khunono Alhou tsa pesü nongu vilo piche keno tipaqo kümsü lulo. Pano xüghola kümsü kutoju no pano küpülü papelo.

⁸ Jisü Khristo ye ighi, ishi eno alholo aphiphie.

⁹ Akükütsü jeli paküta keqo no saküghüzüve pekevilo, chine chini chuqupu khuaye no kumono Alhouw küpükini no amlo shikumtolu keu pavi; kughengu aye tipaqo peche kemi ye kiumu ala shi chemoe.

¹⁰ Jewmi phiki lo mlaitha chekemi ye niw akiptia lo chukepu chipiu kühae.

¹¹ Kughengu achinetou no axine kümllagho shi lhoxü ji pesü Shishe Akimthe-a lo iloghi cheni, ikemu akumo ye aghazü khalau no pitive cheni.

¹² Titoi Jisü ghi pa likhi pa ji vecheo timiqo shikimthe tsüniye khagho nguno khalau no pithive.

¹³ Tighenguno ningu aghazü nguno khalau pa lau wuno pa jukünatha keu pepuni nolo.

¹⁴ Kughengu ayeghi lo ningu ye haumoni keu phughi kühae, ikemu ningu ye ighini ye akeu phughi phucheni.

¹⁵ Jisü vecheo ningu tamono Alhou lau shekiqhe ghakishi tsüni nolo, ti ye akichi lono pa je piphe tsüni keue.

¹⁶ Akivi mlani keu kughucho kevilo eno nongu no akeu pesü küsaje kilelo, kughengu titoike ghakishi no Alhou lopuke.

¹⁷ Now sakiphemi gholulo eno panongu qhoqhülo, kughengu pano ye Alhou lau kihikülai tsü nani kehu nongu küxü jukuto khe acheni. Pano pelo amlo samono aloviqhiyi mla pelo, tishimo aye nongu vehupu kiumu shimla nani.

¹⁸ Ni ghenguno inikhu tsülo, ningu mlo ye tsüghükhüi ani kepi thebei ani, eno alaghi kümtsü lo gihuküzüpu shinike kümsü acheni.

¹⁹ I no nongu hakite anike nongu ye amlo tsüqhiyi inikhu tsülo, tishikeu lono I pelo kighithe nongu lau ighilu peni.

Kükümgha Kighini

²⁰ Itehi ye aloinokütsü Lhou, khuu no lhokta puloshoqhi shikeu ji vecheo akithi lono ni Mpeu Jisü, ambekheu akijeu xüputhu keno, Pa no

²¹ akivi thime kümtsü pesü nongu tsüno Pa pulou shilu peni, eno Pa no Jisü Khristo vecheo ni lolo Pa pulou shipeni; alho lono alholo Pa lau ajekipi apelo. Amen.

Kishekha Petha

²² Athiküzümiqo, Iw shikumtotsa initsü lopi I no nongu hakite ani, kughengu ni ye ikhonhei shi nongu lau yepuwu anike.

²³ Ni thiküzüu Timothy khaqhi pheve keu nongu pelo ithive penishi ani, pa no ke-i ighi aye I no pa sasü ighi no nongu kusholuni.

²⁴ Now sakiphemi ngo küpülümi kümtsü petha tsülo. Italy lono ighi kemi no petha nongu tsüpuwu ani.

²⁵ Küpükini no nongu kümtsü gholo apeniu.