IBRIMI 12 - Sumi Naga CL (Re-edited) Bible (BSI)

Aküpülü Hukuthuu Jisü

¹ Tighenguno, thopimi aqokitikhi kije no ningu sühope ani kehu, ningu ghi ape kimshi jeli, eno axine khikhino tsatsai ningu tsüghave cheni keno tipaqo xaqhiveni nolo, eno ningu zülo kuto tsükeu kupo kheakulu shi poni nolo.

² Ni küpülü hukuthuu eno kupukülai kütsüu Jisü lau juni. Pa zülo alokivipu qhitsü keu jupe pa ye kros lo thinikeu kujomza moe, eno itehi ye Alhou kükalakhü ajeu iqa ani.

Aghüthisü Kevilo

³ Axinemi no Jisü mithi kelo pa ye kishi kutuu keno kümsü julo, tishianguno nongu ye aghüthi sümo eno amlo haumo nani.

⁴ Nongu no axine küpüghü kelo nongu ye ajikuqo kutolo shiju mphie.

⁵ Nongu ghüthi püxü tsüniye anuliqo ipi nongu kukeu kümsümave akeshea? “I nu Ampeu no sakiyi qoputhu kelo iniküküzüi kevilo, o lomipi kelo aghüthisü kevilo.

⁶ Kughengu Ampeu ye Pa no kimiyekemi sakiyi qoputhu cheni, eno Pa no ikhilu akeu nuli hecheni.”

⁷ Sakiyi qoputhu kelo kutuu lulo. Alhou ye anuliqo toi nongu peitha ani. Apu no sakiyi qoputhumo keu nuli khile ani kea?

⁸ Anuliqo toi nongu sakiyi qoputhu keu küha aye, nongu ye anu kuchou kumono tüqhanu ake.

⁹ Itaghi, ayeghilo ningu papuqo no ni sakiyi qoputhu no nino panoqo qhoqhü cheni. Tishiaye, ningu ye tinguno alau anguaghalo Papu qhoqhü moni keshea?

¹⁰ Kughengu ayeghi lo ningu papuqo ye ado ikhonhei ghenguno pano pulou shi peniye ningu sakiyi qoputhu cheni, ikemu Alhou ye ni kivipu ghenguno shi cheni, ti ye ni pelo Pa kimthe küsaje peniye ke.

¹¹ Sakiyi qoputhu keu tüqhüdo loye alovike kumono aghime shi cheni, ikemu khunono aghimeshi qoputhu luveni keno tipaqo ye iqüghai keu mikucho xathi pithilu cheni.

¹² Tighenguno, nongu u thizümüi keu peqhelo eno nongu khonhe miqemlei keu shikumto lulo,

¹³ nongu la müzüchoi shilo, tishianguno apukhu kinitave kemi no ala chepimimo nani ikemu shipivilu nani.

¹⁴ Timi kümtsü sasü külashi eno akimtheshi ani keu pükapütsa lo, kughengu ti kühake loye khunomu Ampeu ithumla nani.

¹⁵ Alhouw küpükini lono tsüghüve monike kutokupuilo. Kukhukimji sütsünibo toi ipeghi no tipau tüghü no kütami shipüsalu nosake kutokupuilo.

¹⁶ Esau no ana akhu lakhi ghenguno pa punu chipiu jeveke toi alhoksa eno mithekumo shive nosake kutokupuilo.

¹⁷ Nongu no ithi anino tithiu pa ye kükümgha lunishi kelauno anhezü piji phuju kemu milive, kughengu pa ye xachilelu kepu dokivi phumlave.

Süküthümla keu Yekipe

¹⁸ Nongu ye Sinai tolo amiküqü, aküzü, züchiyi keu ngo pasapagha akeu lo ighi mphi

¹⁹ eno afuko ghügha ngo asütsa khikhi chikulumi no pano pütsa pemoni ke qhüiniju keno ti chilu mphie.

²⁰ Kughengu azah tsükeu panongu ye puqhe mlave, “Pichepighi no naghuto dilu namu atu pesü veqhive lo.”

²¹ Ti ye shishe aküighüpu kehu Moses no pi, “Ni ye akümsa no khokho shive.”

²² Ikemu nongu ye Zion Toghi, aküxüpu Lhou phughi kungugha lo Jerusalem akeu lo, eno kungumi kihikhakümla no alovi kuho akeu lo ighivae.

²³ Nongu ye Alhou nuli anoghimi khunoqo je kungugha lo yepüani keno tipaqo mqo lo, kümtsü shou Küghaküthau Alhou lau, eno Alhou zülo kupukülaive kemi amikuchomi ghungu lau ighivae.

²⁴ Nongu ye puloshoqhi akitheu lacheu Jisü lau, eno Abel ji nguno akiviu tsape pikeu shikimthekütsü ji lau ighi ani.

²⁵ Khuu no pi ani keno pa tsa milive kevilo. Kughengu ayeghi lono kütüghü keu panongu no ini move kelo panongu ye pomlave aye, kungugha lono kütüghü keu ningu no milive aye ningu ye kitilamu pokulupu kühae.

²⁶ Khaghi ye Pa sütsa no ayeghi süküghüthae, ikemu itehi ye Pa no piqhivae, “I no itaghi ghuthu lakhi ayeghi likhi kumono atsütsü ghi süküghütha nani.”

²⁷ “Itaghi ghuthu lakhi,” ipikeu tsa ye süküghütha kulupu thime ye ikhive nanie pikeu kiqi, ti ye lhosü keu thime, tishianguno süküghütha mlakeu thime no acheuve peniye ke.

²⁸ Tighenguno ningu süküghütha mlakeu yekipe ithulu ke ghenguno shikimthi ani nolo, tishikeu lono msaighü qhiyi Alhou lau ikhikulupu kümlla shini nolo,

²⁹ kughengu ni Lhou ye pitimaha keu mike.