IBRIMI 11 - Sumi Naga CL (Re-edited) Bible (BSI)

Aküpülü

¹ Aküpülü ye ningu no laju chekeu mtsüqhei shikulu, ithumla no achekeu thime ani kepi thebei tsükeu ke.

² Khaghi lomi ye pano küpülü vecheo Alhou mlo kiqipu shilue.

³ Atsütsü ayeghi ye Alhou tsa vecheo lhophe kepi ningu no aküpülü lono vethalu cheni, tishikeu lono kiu ithulu ani keno ti ye ithukulu thime lono lhoke kumoe piniye ke.

⁴ Aküpülü lono Abel no Cain nguno ikhikulupu ghakishi Alhou lau tsü, eno Alhou no pa kümllagho ikhilu tsüno aküpülü vecheo pa ye amikucho kepi kihi tsüe. Pa ye thive namu aküpülü vecheo pi chephie.

⁵ Aküpülü lono Enoch ye akithi miche pemoni ye Alhou no saikuve, Alhou no pa sawuve kehu khunomu pa phumlave. Pa sawuve mphi lono pa ye Alhou lopu shiche kepi pa shepe shitsüe.

⁶ Aküpülü küha keloye Alhou mlo kiqipu shimlae, kughengu khuu no Alhou lau ighini keno pa ye Alhou ye acheni eno Pa phu ighi kemi Pa no asaxü tsücheni kepi pülülu masae.

⁷ Aküpülü lono Noah ye ithumla aphi keu vehu Alhou no pa kütüghü kelo pa kibolomi xalu niye msaighü qhiyi ashukaki mlae. Hipau vecheo pa no ayeghiqha kipimi piye eno aküpülü vecheo amikucho ithulu chekeu mheghi kiyighiu shilue.

⁸ Aküpülü lono Abraham ye hithiu pa mheghi shiniye akeu yeghi lo Alhou no wu peniye kukelo agholue. Pa ye khila wucheni keno mtha keghi aghokulu shi wuve.

⁹ Aküpülü lono pa ye inami ghakhu lo tüsümi toi pikiqhi yeghi lo, aphiki tshüno pikiqhi mheghi pa gholono kümtsa ithuluni kemi Isaac ngo Jacob pama sasü ache.

¹⁰ Kughengu pa ye aboqha kumto phughi khikhi Alhou no kughuphe eno shiqhe keno tipau lajukhe cheke.

¹¹ Aküpülü lono Sarah ye atianuli shikepu do vechebeive keghi mishilu kepu küka ithulue, kughengu piqhi püakeu Lhou ye pükhükulupu kepi li no pülübe ke.

¹² Ikehu thiveke kumlho timi lakhi launo atsütsü lo ayepu eno azüghi mkülo asaye jehi atianuli kughukolue.

¹³ Hipaqo kümtsü aküpülü lono thivae. Panongu ye piqhi püakeu ithumlave, ikemu putou no ithulu no kuchou kepi ikhiluve, eno ayeghi lo inami eno hapheve kemiae pi ikhiluve.

¹⁴ Kughengu timi khunono hitoi picheni keno pano ye pano ghakhu phucheni kepi ithithaive cheni.

¹⁵ Pano no qhive keu yeghi kümsü aghike aye, panongu ye tilau idewolu kepu dokivi ithulu cheke.

¹⁶ Ikemu panongu ye aghakhu akiviu, ti kungugha lo akeu, kümsü kütüche. Tighenguno Alhou no Pa ye pano Lhoue pinike kujove moe, kughengu panoqo ghenguno Pa no aphughi lakhi kuto püanike.

¹⁷ Aküpülü lono Abraham ye pa peju kelo, pa nu Isaac pesü mlla, Alhouw pikiqhi ithukuluu huno pa nu lakhi akeu pesü mllani ye shi,

¹⁸ pa nu vehu ishi pipüa, “Isaac vecheo o tianuli kughuko nani.”

¹⁹ Alhou ye akithi lo ghi Isaac xüputhu luve nanie pi pa no kiqilu, eno kimghiju aye, pa ye akithi lono Isaac ithulu chileke.

²⁰ Aküpülü lono Isaac no Jacob ngo Esau pama shou asheazü kükümgha inibe tsüe.

²¹ Aküpülü lono Jacob no thiuche kelo pa küsü kuchope Alhou mlla ghi Joseph nuli pama kümghatsü.

²² Aküpülü lono Joseph no pa küxü shekha lo Israelmi ipekulu vehu pitsü eno pa saghi vehu ghenguno kiche mijetsü.

²³ Aküpülü lono Moses ye, pa punu kelo pa puaza no aqhi küthü kutolo pa peküsü, eno anu no jukivi kehu panongu ye akükau za hebideni keu msave moe.

²⁴ Aküpülü lono Moses ye, kughou pa no kichimi shiuve keno, Pharaoh nga nue pinike milive,

²⁵ eno axine lo aghakiqipu shinike züqhulo Alhouw timi gholo imeve nike kisheluve.

²⁶ Egypt küakini nguno Khristo ghenguno tichetighe xapu keu no akijeu kepi pa no kiqilue, kughengu pa ye asaxü shou jupuku cheke.

²⁷ Aküpülü lono pa ye akükau mlokighide msa mono Egypt qhive, kughengu pa ye ithukümla Lhou ithulu akeshi ideighi mono cheve.

²⁸ Aküpülü lono pa no Hechekulu Ghulhu huthu tsüno aji pesü küzüte tsüe, tishianguno anu anoghiu Ghikiqhiu pelo panongu bupe moniye ke.

²⁹ Aküpülü lono Israelmi no ayeghi lo chekeshi Akuhu Züghi katha, ikemu Egyptmi no titoi shiniye kelo azü no pano pütsü qhive.

³⁰ Aküpülü lono Israelmi no ghulo tsüni Jericho homxa kelaye aliwo tupi no ilaqive.

³¹ Aküpülü lono asalhau Rahab no pukujumi sasülu kehu hekibidemi gholono pühave moe.

³² Hinguno alau ni ye kiu pinia? Gideon, Barak, Samson, Jephthah, David, Samuel, eno tungkupmiqo ghili pinike ni ye ado kühae,

³³ aküpülü vecheo panongu no kükaqha lelu, kuchou xakütha peitha, pikiqhitsa ithulu, abongshuu baxa lakhalu,

³⁴ amiküqü pinhelu, azütakikihi zülono polu, miqemlei anamu mtotoilu, aghütomi shive, inaghau ghüshimi halelue.

³⁵ Totimiqo no pano bolomi akithi lono xüputhuve kemi ikhilue. Khami ye aküxü akiviu lo xüputhu peniye kuqhokiphe ghi milive no kijipüsa peke.

³⁶ Khami ye ghushoqhi eno heqhi buqhi, tshüluve eno akughu shive.

³⁷ Atu pesü panongu veqhi, amta lono xapho kini shive, azütakikihi no ghiqhive. Panongu ye ambe ngo ane yiko pepusü itsüche, aqüagha, shikighime, peitha püsa,

³⁸ eno kupokichemi shi asayeqha ngo naghutoqo lo, asüki-atukiqo itsü cheke. Panongu ghenguno ayeghiqha ameküapu kumove.

³⁹ Ike timi hipaqo kümtsü, Alhou zülo pano küpülü ikhikulupu shi akeghi, kiu piqhipüa keno ithumlave,

⁴⁰ kughengu Alhou no ningu ghenguno kiukela akiviu kughupüa kehu ningu gholono panongu ghi kupukülailu peniye ke.