IBRIMI 10 - Sumi Naga CL (Re-edited) Bible (BSI)

Khristo Ghakishi

¹ Ayezah ye thime kuchou akeqo kumono thime kivi ighi niye akeu julho keke, ti ampe atsütsü ishokibe aghakishi atho tsüche keu ye mlla niye kupunu ighi akemi pesü khilemu kupukülai tsümla nani.

² Akümllami xine ghuthu khavino shikimtheve tsüke aye, panongu ye axine shipüa keu kümsüpu move no aghakishi kümtsü qhiveni cheke kumo?

³ Ikemu ampe atsütsü aghakishi shikeu no timiqo pelo pütüta xine kümsü lupe cheke.

⁴ Kughengu amshitsü ji ngo ane ji ye khilemu axine ikhive tsümlae.

⁵ Tishi kehu Khristo no ayeghi lo ighi kelo pa no pi, “No ye aghakishi eno akümllagho laju chemoe, ikemu Nono I sala aphimpi lakhi kutope qhitsüe;

⁶ No ye akipti kümllagho eno axine kümllagho lo O züküvü kühae.

⁷ Tileno I no pi, ‘O Alhou, liküküzü kaku lo I ghenguno yepüake toi ni ye O pulou shinike ighivae.’”

⁸ Pa no atüghüshi pi, “No ye aghakishi, akümllagho, akipti kümllagho, eno axine kümllagho laju eno azüküvüshi chemo” (hipaqo ye Ayezah kiqi lono tsü chenike),

⁹ itaghi pa no pi, “Julo, ni ye O pulou shinike ighivae.” Pa no akiniu iqhikumto tsüniye atüghüu ikhive tsü.

¹⁰ Eno Jisü Khristo phimpi no ghuthu khavino akümllagho shive tsükeu vecheo Alhou pulou lono ningu shikimthe luvae.

¹¹ Achinemi no tsalakipetsü puthugho no pa kümlapu shi acheni eno khilemu axine peve tsümlani keu ghakishi pesü anguno anguno tsü acheni.

¹² Ikemu kughou Khristo no axine ghenguno alhokuthu ghenguno pephe tsüve keno, pa no Alhou u ajeu iqave,

¹³ eno itehi kutolo Alhou no pa ghümi pesü pa pukhu kinepu shitsü moke kutolo ngokhe ani.

¹⁴ Kughengu pa no ghuthu lakhi aghashi keu lono khunoqo shikimtheve akeno tipaqo alhokuthu ghenguno kupukülaive tsüe.

¹⁵ Aghungu Kimthe ghi ni lau thopi shitsüe; Pa no atüghüshi pi,

¹⁶ “Ampeu no sheshu, tipa tsala thiu I no panoqo sasü puloshoqhi shini keu hike: I no I Yezah pesü pano mlo lo sütsü nani, eno pano kükümsü lo yepuku tsü nani.”

¹⁷ Tipa shelo Pa no pi, “I no pano xine eno hekibide kümlaqo kümsümave tsü nani.”

¹⁸ Khileno hipaqo pevekütsü ani keno tile axine kümllagho kühae.

Ningu Alhou Kupunu Ighini

¹⁹ Tighenguno athiküzümiqo, Jisü ji vecheo ningu ye akimthe-a lo iloni keu mlo kumto ani kehu,

²⁰ pa no nhaqhiphi, ti ye pa phimpi, vecheo ningu ghenguno ala kithe, aküxüpu la lakhi khaqhive tsüae,

²¹ eno ningu ye Alhou ki shou achineu akijeu ani kehu,

²² ningu kuchou mlo xapu tsaqüi keu küpülü qhini, alhoksa lotsü lono ningu mlo shikimtheve no azü kütsüghü pesü ni phimpi qhuve püzü Alhou kupunu wuni nolo.

²³ Ningu ithamo no nino laju piphe chekeu mtotoi tsüqü peni nolo, kughengu khuu no piqhi püani keno Pa ye pükhükulupu ke.

²⁴ Ningu kishino lakhino lakhi hakuthope kimiye kile eno akümla kivi shiluni keno alomsüni nolo,

²⁵ timi khami toi shimono ningu ye kuho kumqo chekeu kughuchove moni, ikemu Atsala kupunu woche keu nongu no ithulu ani kehu ningu alaushi lakhino lakhi shikumtoni nolo.

²⁶ Kughengu kuchou kighithi ithuluve no ningu no püthapütsano axine shiauve aye, axine ghenguno aghashi keu ye kiumu kühavae,

²⁷ ikemu küghakütha kümsapu, eno aghümi pitiveni keu miküqü likhivae.

²⁸ Khukhumu Moses Yezah hebide keu ye mikini momu küthü no thopi shikeu lono kiumu kimiyeqhiyi mono pithive cheke.

²⁹ Tishiaye, khuu no Alhou Nu nedaqoda, pa shikimthe tsükeu puloshoqhi ji shipütha, eno küpükini Ghungu thaighani keno, timi tipau ye kishi aghime alhoksa ithulu nani keno nongu ye kümsü juama?

³⁰ Kughengu khuu no, “I no amkhülu nani; I no lochile nani,” eno itaghi, “Ampeu no Paw timi shou küghatha nani,” ipi keno, ningu no Pa ithi ani.

³¹ Aküxüpu Lhou u lo ikiqi ilolu keu ye kümsa kimshipue!

³² Ikemu wovekeu ghuloki lo nongu no aküvü ithuluve kethiu kishi kutuokutuu aghime kitikhi puqhe keno kümsü julo,

³³ khaniloye aqo zülono nongu thaigha eno shikighime, hataloye hitoi ime akemi sasü nongu no aghime küsaje ke.

³⁴ Nongu no akughumi gholo ime küqha, eno alokivishi no küakini ghi sükishe luvetsü peke, kughengu nongu ye küakini akiviu eno pülhapuju acheni keu thime aphi kepi nongu no ithi ake.

³⁵ Tighenguno nongu mlo kuloghi shilo, tino ajume kije süghi cheni.

³⁶ Nongu ye kheakulu shimasa ani, tishianguno kughou nongu no Alhou pulou shiluni keno Pa no piqhi püakeu ithulu nani.

³⁷ Kughengu ishi yepüani, “Ado kitila thiu, khuu ighi niye ani keno pa ye munuve mono ighi nani;

³⁸ ikemu Iw amikuchomi ye aküpülü lono xülu nani, eno pa no athiu idewove aye ni ye pa shou I lokiqi kühave nani.”

³⁹ Ikemu ningu ye athiu idewove no pühaveni kemi kumo püzü aküpülü akemi eno Alhou no püxü keqoke.