IBRIMI 1 - Sumi Naga CL (Re-edited) Bible (BSI)

Anu Vecheo Pütsa

¹ Khaghi ghuloki lo Alhou no tungkupmi vecheo ala jeli kütüta lono ghuthu kutomo ni puasüqo pütsache,

² ikemu hi ashekha ghuloki loye Pa no khuu vecheo ayeghiqha pulhosü no thime kümtsü shou amheghi kiyighiu shi peniye kishephe keno, Pa Nu vecheo ningu pütsae.

³ Pa ye Alhouw phuphushi keu küvü yekibide ke, eno Alhou lhoaye aphiphishi xapu ani, Pa küka lono Atsa huno atsütsü ayeghi kümtsü puqhepe acheni. Axine shikimtheve tsü kethiu Pa ye akiqhe-a lo Akughushuu u ajeu iqave,

⁴ Pa no Alhou launo aje ighilu keu no kungumi je nguno akighicheu keke Pa ye kungumi nguno akiqheu shive.

⁵ Kughengu Alhou ye kungumi dolo khuu vilo, “No ye I Nu, ishi tsala lono I no o Pu shiluvae.” Momu itaghi, “I no Papu shini, eno pa no I Nu shinani” ipi püania?

⁶ Itaghi, kughou Alhou no ayeghi lo Pa Nu anoghiu puwu keno, Pa no pi, “Alhouw kungumi kümtsü no Pa mllalo.”

⁷ Kungumi tsa loye ishi pi, “Alhou no Paw kungumi pesü amülhü shitsü, eno Pa ghinimi pesü ami mili shitsüe.”

⁸ Ikemu Anu ghengu ye Pa no ishi pi, “O Alhou, O kükalakhü ye pülhapuju eno alholo ke, O mikucho küsü huno O kükaqha yepeu ke.

⁹ Nono achipiu mikucho kimiye eno küsakügha mithike ghenguno O Lhou, Alhou, no alopivitsü chekeu thazü pesü O küsami züuno O nukishelu ke.”

¹⁰ Eno, “No, Ampeu, ampi no abothu lono ayeghiqha boqha gho, eno atsütsü ye O u lo kümla ke;

¹¹ tipaqo ye hauve nani, ikemu No ye anani; ti kümtsü aphimini toi pexave nani,

¹² chijeboike phi toi Nono tipaqo liküzüve nani, tipaqo ye aphimini toi kilive nani. Ikemu No ye pülhapuju athoke, eno O mpe ye kishekhave monani.”

¹³ Itaghi Alhou ye Paw kungumi dolo khuu vilo ishi pi püania, “I no o ghümi pesü o pukhu kinepu-a shitsü moke kutolo I u ajeu iqalo”?

¹⁴ Panongu ye kümtsü aghinimi shi xakulupu ithulu niye akemi huthu peniye puwu püanike kumo keshea?