HOSIYA 9 - Sumi Naga CL (Re-edited) Bible (BSI)

Ampeu no Israel Ghime nani

¹ Alovi kevilo, O Israel! Ashiayeqo toi ahulü akevilo; kughengu nongu ye no Lhou pheve no kütüqhauvae, nongu ye aniqa kümtsü lo asalha jume kimiye cheni.

² Aniqa eno aji tughuko ye panongu loji khamla nani, eno aji kithe ye panongu ghapiqi tsümla nani.

³ Panoqo ye Ampeu yeghi lo ngope move nani, ikemu Ephraim ye Egypt lo idewove nani, eno panoqo no Assyria lo mithekumo chuqupu chunani.

⁴ Panongu no Ampeu lau atsaiji kümllagho tsümo nani, eno pano ghakishi ye Pa lopiqi tsümla nani. Ti ye mloqa akemi sho toi, tipau chukemi kümtsü kitiqeve nani; kughengu pano sho ye panongu müzü ghengu likhino ke; tipau ye Ampeu kilo peighimo nani.

⁵ Tiqhetini tsala eno Ampeu ghulhu tsala lo nongu ye kiu shi nani kea?

⁶ Kughengu panoqo ye kütsakungo keu lono pochea kemu Egypt no panongu hekütsü nani; Memphis no pano shiqho nani. Apüghübo no panow akughupu ghükayi thime luve nani; pano phiki lono asahubo ipeghive nani.

⁷ Aghimepu tsalaqo ighivae; lokichile ghuloki ighivae; Israel no tipau ithi nani. Tungkupu huye mbomzüe; aghungu lo timi ye aghüzüe, ti ye nongu xine kije eno akimthi kije ghenguno ke.

⁸ Tungkupu ye I Lhou gholono Ephraim kheu huke; ikeghi pa laghi kümtsü lo ashihami lichhe ani eno akimthi no pa Lhou kilo ani.

⁹ Gibeah ghuloki lo toi panongu ye pano ampi shipixivae: Pa no panoqo xine kümsülu nani; Pa no tipau ghenguno panoqo ghime nani.

¹⁰ Asayeqha lo atsaithi toi, I no Israel phulue. Mubuthi kipithi ghuloki lo mububo lo axathi amsüu toi, I no pano puasüqo ithulue. Ikemu panongu no Baal-peor lo ighi no pano pesü akukujopu lo ikhiphepe tsüve, eno pano no küpü chekeu lhou toi aphikümqhüpu shive.

¹¹ Ephraim jekipi ye aghau lakhi toi yewuve nani— punumo, mishimo, atita lo azü ghomove nani!

¹² Panongu no atianuli saputhu namu I no pano mlo ghujushi pithikhave tsü nani. Kughou I no panongu qhiveni keno panongu ye ahasapue!

¹³ Ephraim ye I no ithuluke atsüni-a lo amsabo lhothe toi; ikemu Ephraim ye pa tianuli sasü ghikiqhi-a lo wu masae.

¹⁴ Panoqo tsülo, O Ampeu— No ye kiu pesü tsüni kea? Ala lono hauve keu tita eno qhai keu kichhi panoqo tsülo.

¹⁵ Pano lhoksa qhoi Gilgal lo ani kehu tilauno I no panoqo jumithi thuveke. Pano kixikila ghenguno I no I ki lono panoqo haphe nani. Ni ye panongu kimiye moae; pano sakiphemi kümtsü no hekibidemi ke.

¹⁶ Ephraim ye micheqhivae; pano kuhu ye qhaivae; panongu ye axathi pithimoae. Panongu no atianuli punu namu, I no pano no qhuivü chekeu tianuliqo pithive tsü nani.

¹⁷ I Lhou no pano milive nani kughengu panongu no Pa tsa initsü move ake; panongu ye shiyeqo gholo kupokichemi shive nani.