HOSIYA 8 - Sumi Naga CL (Re-edited) Bible (BSI)

Israel ye Miyitsü Ghilehu nani

¹ Afuko pesü o mütsü lo thelo! Alhuqu toike lakhi no Ampeu ki shou ikughi ani, kughengu panongu no Iw puloshoqhi hexavae eno I yezah hebideve ake.

² Panongu no I lau ighamku ighi, “I Lhou, ningu—Israelmi—ye No ithi anie.”

³ Israel ye akivi milivae; aghümi no pa hasü ighi nani.

⁴ Panongu no kükami kishe kemu I vecheo shimoe. Panongu no sakiphemi süsü kemu Ni ye ithimoe. Panongu no pano ampi kütsani ye panow ghükayi ngo ameshoyi pesü ajulhoqo mlae.

⁵ I no o mishitsü julho peve tsüae, O Samaria. Tipaqo shou I mloide puku ke. Panongu ye pimi moveni keu ado khitohi lunani kea?

⁶ Kughengu hi ye Israel launo ke; ayi kiyiqimi lakhi no mla keue; hi ye Alhou kumoe. Samaria mishitsü julho ye kubo kighinyive nani.

⁷ Panongu no amülhü yisü, ikemu miyitsü xolu nani. Aghibo puthughope akeqo ye aghipe movae; tipaqo ye athi pithimo nani; tsala tipaqo no pithi namu inaghami no chuvetsü nani.

⁸ Israel ye küghape munovae; panongu ye shiyeqo gholo ameküküha li kughupo toivae.

⁹ Kughengu panongu ye aghalo khurha toi lomoshi itsüsü Assyria lo wuvae; Ephraim ye alojipumi piqevae.

¹⁰ Panongu no shiyeqo gholo alojimi piqe aghi namu, I no kighithe panongu hekütsü kumqo nani. Eno akükau ngo kükapumiqo ye kighitheno asüqha ghenguno aghimeshi ihi nani.

¹¹ Ephraim no axine kümllagho ghenguno akiptia küghüsü mla kehu tipaqo ye pa ghenguno axine khache-a shivae.

¹² I no pa sala I yezah qhethonhe chighi ye anamu tipaqo ye thime kithe toi shino kihitsü monani.

¹³ Aghashipe I mlla kelo panoqo no ashi pesü tsüno ti chucheni, ikemu Ampeu ye tipaqo ikhilutsü chemoe. Itehi ye Pa no panoqo xine kümsüchilelu no tipau ghenguno ghime nani; panoqo ye Egypt lo idewove nani.

¹⁴ Kughengu Israel ye pa Lhokeu kümsümave no akighikiqo shi, eno Judah no aliwo kuptu phughiqo küghüsü shiqhevae; tighenguno I no pa phughiqo shou ami puwu tsüni, eno tino liw sükusho-aqo pitileve tsü nani.