HOSIYA 7 - Sumi Naga CL (Re-edited) Bible (BSI)

¹ Kughou I no Israel shipivini keno, Ephraim xine ngo Samaria kümla lhoksa pephe nani; kughengu panoqo no pishikiqhi kilhisho shi küpkami no hepho ilo, eno khalau no süxa ishike.

² Ikemu pano lhoksa kümtsü I no kümsülu ani kepi panongu ye kiqiju moe. Itehi ye pano kümla no panongu süho luvae eno ti ye I zülo ani.

³ Panongu no pano küsakügha pesü akükau lopivi tsü, eno panow thekuchu pesü kükapumi lopivi tsüe.

⁴ Panongu kümtsü ashupumi; panoqo ye amiphoki külü toi, ti ye ashokishiu no asho kunupe ingu ipeghi moke kutolo ami chixemo no lüghüi qhike toie.

⁵ Ni kükau tsala lo sakiphemiqo ye aji shomzü keu no süuve; Pa no thoküghami gholono pa u xachho tsüke.

⁶ Kughengu amiphoki külü mlo toi panoqo no küsüqe ighi; puthotsü pano mlokighide no kuchughei ngoa no inaqhe no ami mili toi iqüe.

⁷ Panongu kümtsü no amiphoki külü toike, eno panongu no panow yepemi kütsave cheni. Panow kükami kümtsü ikiqivae, ikemu khunomu I ku ighimoe.

⁸ Ephraim no ashiayeqo sasü xukütshü kungo cheni; pa ye asho pügha kuthumo keue.

⁹ Inaghami no pa kumto qhasü luvae ikemu pa ye ti ithi amoe; asa kümpa pa shou ikughi khavae, ikeghi pa ye tiumu ithi amoe.

¹⁰ Israel qheküza no pano zülo ashepe shitsü akeghi panongu ye Ampeu pano Lhou lau ideighi moe, tike kumono Pa phumove ke.

¹¹ Ephraim ye miqhedu toi, mbomzü eno tsükhüi moe, Egypt ku püzü Assyria lo pove.

¹² Panoqo no wuche kelono I khame pano shou vepukuni; kungu ghauqo toi I no panongu saiqighive nani; panongu no hekütsüpe akelono I no pano shikümzü nani.

¹³ Panongu hasapue, kughengu pano ye I launo kauvae! Panongu kütsave nani, kughengu panongu no I hebidevae! Ni ye panongu xachile lunishi anamu panongu no I shou akimki tsa pichenie.

¹⁴ Panongu ye amlo tsüqhiyi I lau ighamku chemo ikemu pano lüpa lono igha cheni; athi eno aji ghenguno pano ampi ghüza cheni; panongu no I hebide chenie.

¹⁵ I no panongu qophe eno pano u shikumtotsü keghi I shou alhoksa kuchughu ke.

¹⁶ Panongu no ideighi, ikemu kunguu küdau kumoe; panoqo ye thekuchu süzü toie; panow kükapumiqo no timi kiphikumo mili xapu kehu azütakikihi lono ikiqive nani. Hipau ghenguno Egypt yeghi lo panongu cheqhi nani.