HOSIYA 6 - Sumi Naga CL (Re-edited) Bible (BSI)

Israel ngo Judah no Xaidemoe

¹ “Ighilo, ningu Ampeu lau idewoni; Pa no ningu ghüzave kehu Pa no shipivi tsü penie; Pa no ni hekuluqhi ke ningu zaku khavetsü nani.

² Atsala kini thiu Pa no ningu püxü kithetsü nani; atsala aküthüu lono Pa no ningu sünheqhe nani, tishianguno nino Pa zülo xüni.

³ Ningu pükapütsa no Ampeu ithini nolo; Pa ipeghini keu ye tsüküvü toi mtsüqhei ke; tsülü tusho tsütsüghu no ayeghi vapütsü keshi Pa no tsütsüghu toi ni lau ighi nani.”

⁴ Ni ye o pesü kiu shiveni kea, O Ephraim? Ni ye o pesü kiu shiveni kea, O Judah? Nonguw kikimiye ye inaqhe kimhi toi, itheno hauve keu tsüzü toike.

⁵ Tighenguno I no tungkupmi vecheo panoqo michevae; I kichi lo tsa pesü I no panoqo ghiqhivae, eno Iw küghakütha ye aküvü toi ipeghi nani.

⁶ Ni ye aghakishi kumono iqemokeu kikimiye lunishi, akipti kümllagho kumono Alhou ithitoi keu laju ani.

⁷ Ikemu Adam toi panongu no puloshoqhi hebideve; tilau panoqo ye I pükhü mlave.

⁸ Gilead ye küsaküghami phughi, anepa kümtsü aji pusüsü ani.

⁹ Küpkami no ala khe akeshi, achinemi ghi hekütsü kumqope acheni; panongu no Shechem laghi lono timi ghiqhi cheni; panongu no kixikila shi cheni.

¹⁰ Israel lagha lo aküighüpu lakhi I no ithulu püani; Ephraim salha ye tile ani; Israel ye kitiqevae.

¹¹ Kughengu, O Judah, o ghengu ghi ghile do ye kutovae. Ti ye I no Iw timiqo küakini tsüchileni keu doke.