HOSIYA 5 - Sumi Naga CL (Re-edited) Bible (BSI)

Israel ngo Judah lau Aghime Cheni

¹ Hi inilo, O achinemiqo! Amlo tsüqhiyilo, O Israelmi! Akini xükholo, O akükau limi! Kughengu küghakütha ye nongu ghenguno ke; kughengu Mizpah lo nongu no alichhe ilhouve ke, eno Tabor shou akhame sükhope qhike.

² Mjochile kemi no kuthoküzü shi heqhi ghiqhi auvae, ikemu I no panongu kümtsü shikümzü nani.

³ I no Ephraim ithi ani, eno Israel ye I launo itshümlae; O Ephraim, itehi kutolo no ye kütüqha aphi; Israel ye shi kuchhubevae.

⁴ Panongu kümla no lakhape panongu pelo pano Lhou lau ideighilu peamoe. Kughengu asalha ghawu no panongu lolo ani, eno panongu ye Ampeu ithi amovae.

⁵ Israel qheküza no pano zülo ashepe shi anie; Israel ngo Ephraim ye pano kipimi lono küpxalu nani; Judah ghi panongu gholono küpxalu nani.

⁶ Panongu no pano mbeloji ngo amishi loji sasü Ampeu phuniye wu nani, ikemu panongu no phumla nani; Pa ye panoqo launo tsüghüvae.

⁷ Panongu no Ampeu lau aküpülü piye move; kughengu panongu no inami tianuliqo punu ke. Itehi ye aqhi kithe no pano luza gholono pano kütsa nani.

⁸ Gibeah lo akibo küighalo, Ramah lo afuko küighalo. Beth-aven lono kütüghülo; nino o papeni, O Benjamin!

⁹ Aghime tsala lo Ephraim ye pighive nani; kiu no mtsüqhei keno I no Israel shiaye lau piye nani.

¹⁰ Judah sakiphemi ye alughitu tukiqeve chekemi toike; panoqo shou azü lepuku keshi I no I loghu lepuku nani.

¹¹ Ephraim no niqhinilai keu pape niye pükapütsa kehu pa ye nedaqoda keu xakütha lono chunudaqhi ani.

¹² Ikemu Ni ye Ephraim lau amila toi, eno Judah lagha lau qhai-ghoi mauve ketoi ke.

¹³ Ephraim no pa küsü ithulu kelo Judah no pa ghüzaku ithulu kelo, Ephraim no Assyria lau akukuphu, akükau akijeu lau khu puwu. Ikemu pa ye o shipivi mla momu o ghüzaku shipivi tsümlae.

¹⁴ Kughengu I no Ephraim lau abongshuu toi nani, eno Judah lagha lau abongshuu lhothe toi nani. Niu no aleqhi shi o sütha pinyive no wuve nani; I no xapu wuve nani eno khunomu xaphe mlave nani.

¹⁵ Panongu no pano kipimi ithi no aghime lono müamzü I phuighi moke kutolo Ni ye itaghi I kungo-a lo ideighive nani.