HOSIYA 4 - Sumi Naga CL (Re-edited) Bible (BSI)

Ampeu no Israel Nguku

¹ Ampeu tsa inilo, O Israel tianuliqo, Ampeu ye aghakhu lo küami shou nguku kepu ani. Aghakhu lo Alhou ithitoi keu, pükhükulu momu iqemokeu kikimiye kühae;

² tushokiqhi, akimki, ghikiqhi, aküpka, eno asalha likhi ani; panoqo no akütsüghaqo kuqhove no ajikuqo no kibe ke.

³ Tighenguno ayeghi no mloqa, tile küxümi kümtsü no iju ani, aghasa lo tüghashi ngo atsütsü lo aghauqo eno azüghi lo akhaqou ghi haukhavae.

⁴ Tishimu khunomu kütsala eno ngukukile pe kevilo, kughengu I kumchho ye o laue, O achineu.

⁵ Nongu ye puchou no küpxalu nani, tungkupmi ghi nongu sasü putho lono küpxalu nani; eno I no nongu paza kütsave nani.

⁶ Iw timiqo ye akighithi mikheke ghenguno kütsavae; kughengu nongu no akighithi milive ke, I chinemi shipe monike I no nongu milivae. Eno nongu no nongu Lhou yezah kümsümave akeke Ni ghi nongu tianuliqo kümsümave nani.

⁷ Panongu no khije ikowo keno, tijehi I shou axine alau shike; I no pano gigihu pesü akukujo shive tsü nani.

⁸ Panoqo no Iw timi xine küsaje; pano xine ghenguno alamine.

⁹ Ikehu timi ghi achineu ghi atho; panow hekibide ghenguno I no panongu ghime nani eno pano kümla ghenguno I no panongu tsüchile nani.

¹⁰ Panongu no chunani, ikemu aghaqimo nani; panongu no kütüqha nani, ikemu kughuko lumo nani, kughengu panongu no Ampeu pheve no pano pesü

¹¹ alokütsü pühavetsü chekeu asalha, aji, eno aji kithe hipaqo lo azüküvü shi auveke.

¹² Iw timiqo no asü tachu launo kighinikile jucheni, eno panongu qheküsü no tungkuptsa pitsü cheni. Kughengu asalha ghawu no panongu saküghüzüve ake, eno panongu ye kütüqha aniye pano Lhou phevae.

¹³ Panongu no naghuto kütsüqa lono aghashi cheni eno atoghiqo lono, aphisübo, khotsüsübo eno tsüzüsübo qholono piti mlla cheni, kughengu tipaqo kicheqho ye alo kehue. Ikehu nongaqo no kütüqhauvae, eno no mulimi no salhauve.

¹⁴ Nongaqo no kütüqhauve eno no mulimi no salhauve namu Ni ye panoqo ghimemo nani; kughengu kiptimiqo ghi kütüqhalimi lau wu acheni eno achineki lo kütüqhalimi gholono aghashi acheni ke, alokütsü kumomi ye kütsave nani.

¹⁵ O Israel, nongu no kütüqha cheghi namu, Judah pelo pimive pe kevilo. Gilgal lo ilo kevilo, tike kumono Beth-aven lo iqho kevilo, eno “Ampeu ye xüküau” ipi ashoqhi shi kevilo.

¹⁶ Israel ye amishi lhothe no kuthovi akeshi ke Ampeu ye atsüni kümtsha-a lo ambe tucho keshi panoqo tucho luni keshea?

¹⁷ Ephraim ye ajulho lau kime luve ake pa likhi qhivelo.

¹⁸ Pano ji shokhave kemtsa panongu no kütüqhauve cheni; panow yepemi no akukujopu kimiyekütü cheni.

¹⁹ Amülhü no pa chishibo lono panoqo küzüpe wuvae, panongu no pano ghakishi ghenguno kujo nani.