HOSIYA 2 - Sumi Naga CL (Re-edited) Bible (BSI)

Israel Mikuchokumo Ghime keu

¹ O thiküzümi vilo, “Nongu ye Iw timi,” eno o chelimi vilo, “Nongu ye küpükini ithuluvae,” ipilo.

² “O za lomipi lo— kughengu li ye I nipu kumoe, eno ni ye li kimi kumovae— tishino li pelo kütüqha pemove, eno li pelo asalha tave pelo;

³ tikumo aye I no li phimini xave tsüno li punu tsala lo toi aphikümsa shive tsüni, li pesü yenguyike-a toive tsüni, eno li pesü qhaike yeghi toive tsüno atüghü lono li pithiveni.

⁴ Li tianuliqo shou ghi Ni ye küpükini piyemo nani, kughengu panongu ye kütüqhalimi tianuli ke.

⁵ Kughengu panongu paza ye shupu-salhave; khuu panongu mishi keno li huno akukujopu shike. Kughengu li no pi, ‘Ni ye I lojipumi lau wuniae, panoqo no asho, azü, akülüphi, phepheike phi, thazü eno yekepu pesü I tsü chenie.’

⁶ Tighenguno I no asahu pesü li laghi putukhave tsüni eno aliwo shipe li lakhave no li ye alaghi ithumlave peni.

⁷ Li no alojipumi hawu nani ikemu halumo nani, eno li no panoqo phuwu nani ikemu phumlave nani. Tileno li no ishi pi nani, ‘Ni ye I kimi atüghüu lau idewoni, kughengu I ghenguno itehi ye püzüu pavie.’

⁸ Athi, aji eno thazü ngo Baal mlla chekeu ghükayi eno ameshoyi pesü li pipe keu ye I no kepi li ye mthae.

⁹ Tighenguno ado tove kemtsa I no I thi ngo I tsaiji ikhichile luve nani, eno li phikümsa küzü chekeu Iw akülüphi ngo phepheike phi I no luchileve nani.

¹⁰ Itehi ye li lojipumi zülono I no liw kujomo ghili pi nani, eno khunomu I u lono li xaphelu mo nani.

¹¹ Eno I no liw kunuvüqai keu, tiqhetini, aqhi kithe, Sabbath, eno apine jeli kümtsü kishekhave tsü nani.

¹² I no li tsaibo eno mububoqo kütsave tsü nani, tipaqo jupe li no ishi piche, ‘Hipaqo ye I lojipumi no tsükeu I jumeqo ke.’ I no tipaqo pesü aghasa shive no tüghashiqo no kütsaleve peni.

¹³ Baal ghulhu tsalaqo lo li no akümllagho pitipe tsü, anguthi ngo achiku no ananu shino alojipumi papewu, eno I kümsümave kehu I no li ghime nani, ipi Ampeu no asheshu.

Israel shou AMPEU w Küpükini

¹⁴ “Ikehu, julo, I no li züizani, eno yenguyike-a lo saighi no ivüilai li pütsa kümtshani.

¹⁵ Tilauno I no li tsailu tsüchile nani eno Achor Khila pe lajupu hukikha shitsü nani. Tilauno li lhothe ghuloki lo toi, Egypt yeghi lono ipeghi kelo toi li no khochile nani.

¹⁶ “Tipa tsala lo, Ampeu no asheshu, nono I vilo ‘I kimi,’ ipi ku nani eno no ye I vilo ‘Iw Baal’ ipi kumove nani.

¹⁷ Kughengu I no Baalqo je li kichi lono ikhive tsü nani eno tipaqo je kümsüchilelu pemove nani.

¹⁸ Tipa tsalani, I no panoqo ghenguno aluza lo tüghashi, kungu ghau, ayeghi lo itikiche lhoxü sasü puloshoqhi shi nani. I no aghakhu lono shexilika, azütakikihi, eno aghükishi lakhave tsü nani, eno nongu pelo aküighüpu kühave no ikiqi ihozü lupe nani.

¹⁹ Eno I no pülhapuju ghenguno no inisüve nani. I no achipiu mikucho eno kuchou xakütha, iqemokeu kikimiye eno küpükini lono no inisü nani.

²⁰ I no pükhükulu lono no inisü nani. Eno nono Ampeu ithive nani.

²¹ “Tipani I no khochile nani, Ampeu no shuphe ani, I no atsütsü khochile nani, panoqo no ayeghi khochile nani,

²² eno ayeghi no athi, atsaiji eno thazü khochile nani, tipaqo no Jezreel khochile nani,

²³ I no I sala shi aghakhu lo li shosü nani. Eno I no küpümoe ipi keqo shou küpükini anani, Iw timi kumoe ipi keqo lau, ‘Nongu ye Iw timie’ ipi nani; pa no pi nani, ‘No ye I Lhou.’”