HOSIYA 14 - Sumi Naga CL (Re-edited) Bible (BSI)

Ampeu lau Ideighilo

¹ Ampeu o Lhou lau ideighilo, O Israel, kughengu no ye o xine ghenguno küpxavae.

² Atsa pesü Ampeu lau idewo eno Pa vilo pilo, “Axine kümtsü ikhive tsülo; kiu no alo keno ikhilu tsülo, eno ni kichi lono tushoqhi ketoi nino amshitsü pesü tsüni.

³ Assyria ye ni xamla nani; ningu ye khurshi samo nani; eno ningu ye, ‘Ni Lhou’ ipi ni u no mlakeu vilo pimo nani. O launo mighimi no küpükini ithulu chenie.”

⁴ Panongu no pheve keu küpülü I no shipivi tsü nani; I no kümsano kimiye nani, kughengu panoqo launo I mlokighide iqüve ake.

⁵ Ni ye Israel lau atsüzü toi nani; pa ye lapu toi puipeghi nani; pa ye Lebanon süboqo toi akuhu qüilo nani;

⁶ pa khuniqo no thuipeghi nani; paw jukivi no olivebo toi nani, pa xokütsüngü no Lebanon toi nani.

⁷ Panongu no ideighi no Iw sükusho qholo xü nani; athi toi kupukuno shi nani; atsaibo toi mini ipeghi nani; pano jekipi ye Lebanon tsaiji toi nani.

⁸ O Ephraim, Ni ye ajulho pesü kiu shive tsüni kea? O khochile eno o jukuto chekeu ye I no ke. Ni ye xüthilei keu cypressbo toi ke; I launo o xathi ithulu cheni.

⁹ Khukhumu alokütsüu no hipaqo vethalulo; Khuu no kimchilu cheni keno, pa no ithilo; kughengu Ampeu laghi ye achipi ke, eno müzüchoi xüche kemi no tipau laghi püla cheni, ikemu axinemi ye tipaqo lono küpxalu chenie.