HOSIYA 13 - Sumi Naga CL (Re-edited) Bible (BSI)

Israel shou AMPEU w Küghakütha

¹ Ephraim no atsa pi kelo kümtsü no khokhoshi che; Israel lo pa süqhe puku cheke, ikemu Baal vecheo pa ye akipimi ithulu no thivae.

² Eno itehi ye panoqo no alau eno alau axine shino pano sala ayi julho mla ani, panow ghükayi no kütshakügha shi ajulho mla ani, ti kümtsü kütshakügha kümla kishimi noke. Panoqo ghili ishi picheni, “Timi heqhipe mlla chekemi no amshitsü mümae!”

³ Tighenguno panongu ye inaqhe kimhi toi, momu itheno hauve keu tsüzü toive nani, aniqa lono amuu fupe wuve keu momu alashe lono amchhi phoipeghi ketoi nani.

⁴ Ikemu Egypt yeghi lou no Ni ye Ampeu o Lhou ke; no ye I likhi thono Alhou kütau ithimoe, eno I nguno alau ye xakuluu kütau kühae.

⁵ Asayeqha eno züha yeghi lono no ithikeu ye I no ke;

⁶ ikemu kughou panongu no chusholu keno, panongu ye aghakiqi shiluve kehu I kümsümave ke;

⁷ Ikehu Ni ye panoqo ghenguno abongshuu toivae; angshuu amikhiu toi I no ala lo itshü no ngokhe nani.

⁸ Atiqo pühave keu ava toi I no panoqo vakulu nani; panongu mla süxüve tsü nani, eno abongshuu toi panongu tsüchuve nani aghalo tüghashiqo no süthapinyi keu toive nani.

⁹ Pa no o kütsavae, O Israel, kughengu nono O kukuphuu mjochile ke.

¹⁰ Aphughiqo lono o xaluni keu o kükau ye khile ani kea? Ow yepemi khile ani kea? Panoqo ghenguno nono pi, “Akükau lakhi eno sakiphemiqo I tsülo.”

¹¹ I mlokighide lono I no akükau lakhi o tsü, eno I loghu lono I no pa ikhi süwuve tsüe.

¹² Ephraim xine ye tsüghavae; pa xine ye hekütsüpe qhivae.

¹³ Apunu küsü pa lau ighivae, ikemu pa ye alotsümo keu nu, kughengu ado tove keghi pa ye atita lo ikipe la lo ighimoe.

¹⁴ Kithigha küka launo I no panoqo qhüchilelu nani; Akithi lono I no panoqo xachilelu nani. O akithi, ow püsaqo khile ania? O Kithigha, o sahu khile ania? Amlo ighiqhiyi keu ye I nhethe lono küsüvae.

¹⁵ Pa no pa thiküzümi gholo miniboi aghi namu, kipela mülhü, Ampeu mülhü, no yenguyike-a lono ighi nani, eno pa züpuki ngo azükikhe ye qhaive tsü nani; tino pa kinibo lono akughupu thime kümtsü pewuve nani.

¹⁶ Samaria no li xine xapu nani, kughengu li no Alhou hebideke; panongu ye ghüyi lono wonani; pano tianuliqo ye chisheda pinyi heqhive nani, eno mishipu akemi totimiqo kive xüleve tsü nani.