HOSIYA 12 - Sumi Naga CL (Re-edited) Bible (BSI)

¹ Ephraim ye amülhü no loji ani eno atsala kupuju kipela mülhü papewu cheni; panoqo no kichile eno hekiqhi bukiqhi küghüsü; panongu no Assyria sasü puloshoqhi shi, eno thazü pesü Egypt lo wue.

Ampeu no Israel ngo Judah Nguku

² Ampeu no Judah nguku ani Jacob no mla püakeu kiqi lono pa ghime nani; pa kümla kiqi lono tsüchile nani.

³ Aza po lono pa no amu phitsü tsüqü luve tsü, eno pa no kichimi shive kethiu ye Alhou sasü kumjoe.

⁴ Pa no kungumi sasü kumjo no toluve; eno qa ghi paw kükümgha khue. Pa no Bethel lono Alhou ithilu, tilauno Alhou no ningu pütsae

⁵ Ampeu, aqokitikhi Lhou, pülhapuju kümsümamo keu je:

⁶ “Ikehu no ye o Lhou kukuphu vecheo ideighilo, iqemokeu kikimiye eno kuchou xakütha mtotoi tsüqülo, eno tamono o Lhou khealo.”

⁷ Alhikishimi khuu u lo pishikiqhi ahu pe ani keno, pa ye qhasüni keu no pa pulou.

⁸ Ephraim no pivae, “Ah, ni ye kinimi; I sala küakini phuluvae; I kümla lo panongu ye I kipimi momu I xine ithumlae.”

⁹ Ni ye Egypt yeghi lonomu Ampeu o Lhou ke; tiqhetini tsalaqo lo toi I no itaghi o pelo aphiki lo ngope nani.

¹⁰ I no tungkupmi pütsa ke; kungunhetsü alau kighishetsü keu huye I no ke, eno tungkupmi vecheo kimghikipiye tsüke.

¹¹ Tsala Gilead lo axine aghi aye, panoqo ye mtsüqheino kiumu kumove nani: panongu no Gilgal lono amshitsü heqhi mlla; pano kipti-aqo ghi alu holeve keu lo atu kumqo püake toike.

¹² Jacob no Aram yeghi lo pove; tilau Israel ye anipu ghenguno hukuthu kümla shino ambeqo jukuto ache.

¹³ Tungkupu vecheo Ampeu no Egypt lono Israel saipeghi, eno tungkupu vecheo pa jukuto.

¹⁴ Ikemu Ephraim no mijimlai Pa xukuthoe; ikehu aji peleve keu makho pa Mpeu no pa shou benani eno paw küthakügha kümla ghenguno pa tsüchile nani.