HOSIYA 11 - Sumi Naga CL (Re-edited) Bible (BSI)

Israel Ghenguno Ampeu Kikimiye

¹ Kughou Israel no itimi shiche keno, I no pa kimiye che, Egypt lono I no I nu kuphelue.

² Khijehi panoqo ku keno tijehi panongu no putosülo wuve; panongu no Baalqo lau aghashi eno ajulhoqo lau piti mllauve.

³ Ikeghi Ephraim alache shika piye keu ye I noke. I no I u pesü panoqo khape, ikemu panongu ye I no panoqo shipivi kepi ithimoe.

⁴ I no küpüqhiyi keu kighikipili, eno kikimiye kütsügha pesü panongu saphe, panoqo kuo lono kuokhasü ikhive tsü, eno itsaqi no panoqo loji ke.

⁵ Panongu ye Egypt yeghi lo idewomo nani, ikemu Assyria no pano kükau shive nani, kughengu panongu no I lau ideighini keu milive.

⁶ Azütakikihi no pano mishighüna jole nani, pano khagho lo aküptasüqo kuboleve tsü nani, eno panow lapiyemi ghenguno pano kütsave nani.

⁷ Iw timiqo ye tsümomo I launo tsüghüveni shi cheni, eno panongu no Shishe Akiqheu lau ighamku anamu Pa ye kiu gholau nomu panoqo xaqhemo nani.

⁸ Ni ye kishino o pheveni kea, O Ephraim? Ni ye kishino o qhiveni kea, O Israel? Ni ye kishino o pesü Admah toi shitsüni kea? Ni ye kishino Zeboiim toi o peithani kea? I mlo no kilive ani; Iw kikimiye ye lüvüi eno mtshaminhei ke.

⁹ Ni ye I ji kumqho pephe moae; Ni ye Ephraim kütsa kithemae; kughengu Ni ye timi kumono Alhou, nongu gholo Akimtheu, Ni ye aloghu lono ighimo nani.

¹⁰ Panoqo no Ampeu pape nani; Pa no abongshuu toi igha nani; kughou Pa no ighani keno, pa tianuliqo no khokhoshi kulolau no ighi nani;

¹¹ panoqo no khokhoshi Egypt lono aghau toi ighi nani, eno miqhedu toi Assyria yeghi lono ighi nani, I no aki lo panoqo puwove nani, Ampeu no asheshu.

¹² Ephraim no akimki pesü I süho, eno Israel lagha no pishikiqhi pesü I boluvae, ikemu Judah ye Alhou gholo chechephi eno Akimtheu lau pükhükulupu shi anie.