HOSIYA 10 - Sumi Naga CL (Re-edited) Bible (BSI)

¹ Israel ye nibonilei keu tsaibo tipau ye axathi pithi acheni. Pa xathi no ikowo ke kümtsü pa no alau akiptia mla cheni; pa ghakhu no ikoishe kelo pa no pa tsükuchoqo shikumto cheni.

² Panongu mlo ye kichile ke; itehi panongu ye pano kipimi makho xapu masae. Ampeu no pano kiptia kubovetsü eno akümlla tsükuchoqo kütsave tsü nani.

³ Itehi ye panongu no pi nani: “Nino Ampeu sümsamo ke ningu ye akükau kühae; ikemu akükau lakhi ye ni ghenguno kiu shitsü luniche kea?”

⁴ Panongu no atsa likhi piqhi; abokümsa shoqhi pesü panoqo no puloshoqhi shie; ikehu küghakütha no hokideve keu lulo tüghü lupi ipeghi ketoi toi thuipeghi ani.

⁵ Beth-aven mishitsü julho ghenguno Samaria lo küxümi ye khokhoshi ani. Tilehi timi eno achinemi ghi tighenguno mloqa ani, panoqo no tipau jekipipu shou alovi acheke tipau ye panoqo launo wuvae.

⁶ Ti huye asüqha shi ghi Assyria lo akükau akijeu tsüve nani. Ephraim ye shikujove nani, eno Israel ye pa julho ghenguno kujo nani.

⁷ Samaria kükau ye azü no yipe chekeu süloka toi pühave nani.

⁸ Aven lo akuchuqu-a, Israel xinepu hu ye kütsaleve nani. Asahu ngo koghesahubo no akiptiaqo lono ipeghive nani, panongu no naghuto vilo, “Ni küghütshülo,” eno atoghi vilo, “Ni nhaluvelo!” ipi nani.

⁹ Gibeah ghuloki lono nongu ye axine shivae, O Israel; tilauno nongu ye kibe ighivae. Aghükishi no Gibeah lo achipikumomi haluve moni kea?

¹⁰ Kughou I no puloveni keno, I no panoqo shikümzü nani, panoqo xine kütsasa ghenguno pano tsügha kelo shiyeqo no hekütsüpe panoqo mjochile nani.

¹¹ Ephraim ye qopheve keu mishi lhothe, athi qonike pulo ache, eno li kuo kivi I no msape qhie; ikemu I no kuokhasü Ephraim xapipe nani; Judah ye hokide masa nani; Jacob ye pa sala hokide masae.

¹² Nongu sala amikucho xusülo; iqemokeu kikimiye xolulo; chimokeu yeghi hokide lo, kughengu itehi ye Ampeu phu kepu doke, Pa no ighi no achipiu mikucho nongu shou ghuqhitsü nani.

¹³ Nongu no axine hokide; nongu no achipikumo xolue; nongu no akimki xathi xochue. Kughengu nongu no nongu shou likhi eno now ghüshimi aqokitikhi shou pükhübeve,

¹⁴ ikehu now timi shou aghüshi ghügha ipeghive nani, eno now sükusho-aqo kümtsü kütsaleve tsü nani, aghüshi tsala lo Shalman no Beth-arbel kütsale akelo; azanoqo ye atianuli gholono mukhumuno shive nani.

¹⁵ Now kixikila kije ghenguno no shou hi shinani, O Bethel. Tsüküvü ipeghi kemtsa Israel kükau ye pithive nani.