HOSIYA 1 - Sumi Naga CL (Re-edited) Bible (BSI)

¹ Judah lo kükami Uzziah, Jotham, Ahaz, eno Hezekiah noqo ghuloki lo eno Israel kükau Joash nu Jeroboam ghuloki lono Ampeu tsa Beeri nu Hosea lau ighi.

Hosea Nipu eno Anuliqo

² Kughou Ampeu no atüghüshi Hosea vecheo Israel pütsa keno, Pa no Hosea vilo pi, “Wulo, anipu kütüqhalimi luvelo eno kütüqhaliu sasü atianuli shilo, kughengu aghakhu ye Ampeu pheve no shishe kütüqhauvae.”

³ Ikehu pa no wuno Diblaim nga Gomer luve, li no mishive eno anu lakhi punu.

⁴ Eno Ampeu no pa vilo pi, “Pa je ye Jezreel kutsülo, kughengu ado kitila thiu Jezreel lo aji pelekeu ghenguno I no Jehu kibolomi ghime nani, eno I no Israel shiaye kükaqha kishekhave tsü nani.

⁵ Eno tipa tsalani, I no Israelmiw shexilika Jezreel khila lono hechheve tsü nani.”

⁶ Li no itaghi mishive no anga lakhi punu. Eno Ampeu no pa vilo pi, “Li je ye Lo-ruhama kutsülo, kughengu Ni ye Israel shiaye küpümo momu akipimi qhitsümo nani.

⁷ Ikemu I no Judah shiaye küpüqhiyi nani, eno Ni Ampeu panoqo Lhou no panongu xalu nani. Ni ye shexilika, azütakikihi, aghükishi, khurshi momu khurshimi vecheo xalumo nani.”

⁸ Kughou li no Lo-Ruhama khove keno, li no itaghi mishive no kiptimi punu.

⁹ Eno Ampeu no pi, “pa je ye Lo-ammi kutsülo, kughengu nongu ye Iw timi kumoe, eno Ni ye nongu Lhou kumoe.”

¹⁰ Tishimu Israel tianuliqo kikihi ye azüghi lo asaye toive nani, ti ye mighimla momu kihimla ke. Eno khileno panoqo vilo, “Nongu ye Iw timi kumoe,” ipi keno, tileno panoqo vilo ishi pi nani, “Aküxüpu Lhou nuliqo.”

¹¹ Eno Judah ngo Israel nuliqo ye kümtsa hekütsü nani, panongu no pano ghenguno akütsü lakhi süküsü shi nani. Eno panongu no hipau yeghi lono iqhove nani kughengu Jezreel tsala ye kije shi nani.