HAGAYI 1 - Sumi Naga CL (Re-edited) Bible (BSI)

Achineki Shikitheni keu Za

¹ Akükau Darius yepe mpe akiniu, aqhi akütsüghou, atsala atüghüu lo Haggai tungkupu vecheo Ampeu tsa Judahw Angh, Shealtiel nu Zerubbabel, eno Jehozadak nu achinetou Joshua lau ighi:

² “Aqokitikhi Mpeu no pi ani: Timi hipaqo no Ampeu ki shiqhe kitheni keu do tomphie piani.”

³ Tileno Haggai tungkupu vecheo Ampeu tsa ighi,

⁴ “Imaye hi ye nongu ampi no aki kivi lo ngono Ampeu ki huno ixapinyi apeni keu ghuloki keshea?

⁵ Tighenguno, itehi aqokitikhi Mpeu no piani: Nongu laghi chhejulo.

⁶ Nongu no kutomo xusü kemu aghulo likhi ghile hulue. Nongu no chucheni kemu lukümkha kühae; nongu no sho cheni kemu aghapiqilu chemoe. Nongu no pepu mini cheni kemu khunomu lüvüilu chemoe. Eno khunono aqe qelu cheni keno pewo süqhu küixü lo süve chenie.

⁷ “Ikehu aqokitikhi Mpeu no piani: Nongu laghi chhejulo.

⁸ Atoghi lo iqho no asü pewo Achineki shiqhelo, tishi aye I no aloqilu eno I juküvüpu shilu nani, Ampeu no pi.

⁹ Nongu no kutomo laju akemu julo, aghulo likhi ghile huke. Eno kughou nongu no aki lo xapughi keno, I no fuleve tsü. Kushiye kea? ipi Aqokitikhi Mpeu no asheshu. Kughengu nongu lakhikhi no pütüta kilo mighimghai auve kelo I ki ye ixapinyive kehue.

¹⁰ Tighenguno nongu sholo atsütsü no atsüzü süchilevae, eno ayeghi no pithilu pemovae.

¹¹ I no züha pesü ayeghi ngo atoghiqo shou pukuvae, athi, atsaizü kithe, thazü, ayeghi lono ipeghi chekeu, timi eno tüghashi, eno panongu kümla kümtsü shou pukuvae.”

Timiqo no Ampeu Gholu

¹² Tileno Shealtiel nu Zerubbabel ngo Jehozadak nu achinetou Joshua eno ghükulumi kümtsü no Ampeu panongu Lhou no puwu ketoi tungkupu Haggai tsa eno Ampeu panongu Lhou sütsa gholu. Eno timiqo no Ampeu sümsa.

¹³ Ikehu Ampeu tsapeu Haggai no timiqo vilo Ampeu tsa pesü pi, “Ni ye nongu gholo ani, ipi Ampeu no sheshu ani.”

¹⁴ Tileno Ampeu no Judahw Angh Shealtiel nu Zerubbabel ngo Jehozadak nu achinetou Joshua, eno ghükulumi ghungu xukuthove tsü. Eno panongu no ighi no panongu Lhou, aqokitikhi Mpeu ki mlathuve,

¹⁵ ti ye akükau Darius yepe mpe akiniu, atsala muku abidiu, aqhi akütsüghou lono ke.