HABAKUK 3 - Sumi Naga CL (Re-edited) Bible (BSI)

Habakkuk Kighini

¹ Tungkupu Habakkuk kighini, Shigionoth ghügha kiqi lono.

² O Ampeu, I no O sütsa chiluvae, eno O kümla sümsa ani. Ni ghuloki lo ghi O kümla püxükithe tsüno ni pelo tipau ithi pelo; aloghu lo kimiyekini kümsülulo.

³ Alhou ye Teman küdau no ighi, Akimtheu ye Paran Toghi lono ighie. Pa juküvü no atsütsü nhakha, Pa shekiqhe no ayeghi chhitoi.

⁴ Pa küvü ye akulu toi; Pa u lono kulophe; eno Pa no Pa küka tile küzüpe qhie.

⁵ Pa züu no küsükini puwu, eno püsa no Pa nepa pape ke.

⁶ Pa no puthugho no ayeghi mighi; Pa no jupuwo no shiyeqo süküthü; tileno alholo naghutoqo ye apanaghave; alholo toghiqo no aqhou iqüilove. Pa laghi ye pülhapuju la ke.

⁷ Cushmi phiki aghime lo akeu I no ithulu; Midian yeghi lo nhaqhiphi no khokhoshi ke.

⁸ O loghu ye aghokiqo shou keshea, O Ampeu? Kughou Nono Ow khurshi eno xakulu khurkuluqo sa keno, O ghakighide ye azüghi shou akeo aghokiqo shou akea?

⁹ Nono apijibo lono shexilika ikhiphepe apiji kutomo kuto eno aghokiqo pesü ayeghi kijetha tsü.

¹⁰ Naghutoqo no No ithulu no thüthüshi; azü no fuchighi qowu; azükutho no mqhomzai ipeghi no azü fukuchope qhemghai süqhe.

¹¹ O piji eno O ngu no phuphushi yeighi kelo khetsünhe ngo aqhi no panoqo-a lo itha mono ngove.

¹² Nono axukighide lono ayeghi katha eno amlokighide lono shiyeqo qodaqhi.

¹³ Nono Ow timi, nukishe luve keqo xaluni ke ghenguno wuke. Nono kixikila kibo lo atou chunuqhi, eno pa kütsü lono apukhu kutolo aphikümsa shivetsü.

¹⁴ Tuqhouno kumlhomi pishiqhini ye alovi ake toi, khuu no I haleveni ye miyitsü toi ighi keno, Nono pa piji pesü paw ghüshimiqo kütsü lo chhesüve tsüe.

¹⁵ Azüghizü chhetsüghü ikughi akeu Nono khurshiqo sasü qodave tsüe.

¹⁶ I no chilu no I phimpi sükidi; aghügha huno I mütsü thüthüshi; tsümave keu no I ghi lo iloghive; I pukhu no khokho shiuve. Ikeghi ni ye inaqhoi shino ni leighi kemi shou aküpüna tsala ighini keu ngokhe anani.

Habakkuk no Ampeu lau Alovi

¹⁷ Mububo no pumove namu, atsaibo lo axathi kühave namu, olivebo no pithi move na, aluza lo achuqupu ipeghi move namu, ambeloji no aqo gholono kühave, amishi kilo lhoxü kühave namu,

¹⁸ ni ye Ampeu jupe alovi nani; I xakulu Lhou lau I no alovini.

¹⁹ Ampeu, Alhou ye I kumto; Pa no I pukhu pe ashe pukhu toi shino akiqhe-a lo chewulu peke. Akighilebo pesü ale shikükau lau.