HABAKUK 2 - Sumi Naga CL (Re-edited) Bible (BSI)

¹ Ni ye I ghukhe-a lo ngoluveni eno qogheki lo iku ngono Pa no I vilo kiu pini keno khejuni, eno I kumchho ghenguno ni ye kiu khochileni keno juni.

Amikuchomi ye Aküpülü lono Xünani

² Eno Ampeu no I khochile: “Atulupha shou kungunhetsü mtsümishei yepuku lo, tishino philu kemi pelo pove pelo.

³ Kughengu ti ye kimshilu kepu do khe ani; ti kishekhani keu ye pai ighive nani, ti ye mikimo nani. Tsala tino asheshive namu khelo; ti ye süpushuve mono mtsüqheino ighi nani.

⁴ “Julo, pa ngulho ye aqheküzae; pa ye akümzümi kumoe, ikemu achipiu-mikuchomi ye aküpülü lono xü nanie.

⁵ “Tinguno alau, aji ye thekuchuue, akuchhomami lakhi ye khilemu akulhoqhilu chemoe. Pa lakimne ye Kithigha toi thonhei; akithi toi pa ye khilemu aghaqive chemoe. Pa no shiye kümtsü pa lau hekütsü eno ashiaye kümtsü paw toi hekütsü cheni.”

Chaldeami lau Ahaküsapu

⁶ Panongu kümtsü no pa cheqhi eno junu ghi thaigha keu tsa pa vilo pi, “Khuu no paw kumomu pekütsü luve eno aküna shoqhi thimeqo pa salashi qhiluve keno ahasapue! Khitohi ow shini kea?

⁷ O piashe kupumi no züleno ithu o shithüghüi moni kea? Tishino panongu no o hakholuve nani.

⁸ Nono aji pele eno ayeghi shipüsa, aphughi eno tile küxümi kümtsü lau küsakügha shi kehu, nono shiye kutomo pükaqhi kehu ghükulumi no o pükaqhi nani.

⁹ “Khuu no kunguu apüsü pesüni ye, eno alhoksa lono itshü luniye pa kibolomi sala akumou laghi lono ala shicheni keno ahaküsapue!

¹⁰ Nono timi kutomo kütsave kehu o kibolomi lau akukujopu shivae; no ye o küxü chipiu pühavae.

¹¹ Kughengu atupi lono atuqu no qa nani, eno akika no asü kümla-a lono khochile nani.

¹² “Khuu no aji pelekeu lono mishiphu shiqhe eno kixikila lono mishighüna puthupheni keno ahaküsapue!

¹³ Julo, timi no ime mla chekeu ye ami no pitive tsüniye ke, eno shiyeqo no ame küha keu lono ime chekeu ye aqokitikhi Mpeu no kekumo?

¹⁴ Kughengu azü no azüghi pichhi püake toi Ampeu juküvüpu kighithi no ayeghi shepichhi nani.

¹⁵ “Khuu no pa kisüghümi aji piye cheni keno ahaküsapue— pano phikümsa lo jupukuni ye nono o loghu leqhi tsüno panongu pelo shomzü peke!

¹⁶ No ye ajekipi züqhulo akukujou no chhitoive nani. Nou no shoalo, eno o phighüyiko ghamo keu piyelo! Ampeu u ajeu akeu jukhu ye idechilesü o lau ighi nani, eno shishe akukujopu no o jekipipu nhavetsü nani!

¹⁷ Nono Lebanon kütsale kehu tino o mhoqhive nani, nono kütsale keu tüghashiqo no o shikichiqhi nani, kughengu aji pelekeu eno ayeghi shiküpsa, aphughi eno tile küxümi kümtsü lau nono küsakügha shike.

¹⁸ “Ayi julho kiyiqiu no akoghe mlaphe keu, pishikiqhi shika chekeu huye kiu ala ani kea? Kughengu atsa pikümla julho mla kelo akümlau ye pa no mlaphe keu pükhübe cheni!

¹⁹ Khuu no asülu vilo, Ithulo; iqünhei keu tuqu vilo, Ithulo! ipi cheni keno ahaküsapue. Hipau ye shikalu nani keo? Julo, hi ye ameshoyi ngo ghükayi no dapüani kemu atuthu ye kühae.

²⁰ Ikemu Ampeu ye Pa kimthe chineki lo ani; ayeghiqha kümtsü no Pa zülo iqünhei shilo.”