HABAKUK 1 - Sumi Naga CL (Re-edited) Bible (BSI)

¹ Tungkupu Habakkuk no ithulu keu tungkuptsa.

Habakkuk no Muchho

² O Ampeu, ni ye khitohi kuphutsü peniye ighamkuni, eno Nono chilu tsümo nani kea? Momu O vilo “Ngukangugha!” lono xalu lopi keghi Nono xalu tsümo nani kea?

³ No ye kushiye I pelo kixikila ithulupe, eno Nou no inaqhoi pimi keu ju ani kea? Kütsakungo eno heqhi buqhi keu no I phivilo ani; Kumgho kütsala keu ipeghi anie.

⁴ Ikehu ayezah ye avehu shimovae, eno kuchou xakütha ye kühavae. Kughengu kixikilami no achipiu mikuchomi süho luve akehu kuchou xakütha ye tuchighivae.

Ampeu no Khochile

⁵ “Shiyeqo gholo juno ithulu lo; akichiqhi eno akümzaqhiyi lo. Kughengu nongu vilo pi namu pülü moni keu kümla lakhi I no nongu ghuloki lo shinani.

⁶ Kughengu julo, hu kukhukimji eno ngosükümla shiye Chaldeami I no puthu ani, panongu ye panow kumomu süxa luveni ye ayeghiqha xü cheni.

⁷ Panongu ye kümsa kimshipu ke; panongu ye pano pulou lono ayezah eno ajuaje pecheni.

⁸ Panow khurshiqo ye angshuu amikhiu nguno akümthüu, avela tineqo nguno ayiküsau; panow khurshimi no kushuo lono kokoshi ighi; panongu no tsüqhini ke alhuqu toi yesü ighi.

⁹ Panongu no heqhi buqhini ke azüu shesü hue. Panongu no asaye jehi timi küghaluve.

¹⁰ Panongu no kükamiqo phimo, eno yepemiqo junuqhi. Aliwo kümtsü panongu no junu, kughengu panongu no ayeghi xapuwo amoqhe no leluve.

¹¹ Tishino panongu no amülhü toi jolesü ighi no wuve, küqüve kemi hipaqo ye pano kumto no pano lhou ke!”

Habakkuk Kumchho Akiniu

¹² O Ampeu I Lhou, Iw Akimtheu, No ye pülhapuju acheni kekumo kea? Ningu ye thimo nani. O Ampeu, Nono küghatha nike panoqo süsüe, O Atuqu, Nono sakiyini ye panoqo puthuphe ke.

¹³ Ow tsüghükhüi keu nhethi ye alhoksa eno akumou shou jupukulu chemoke kushiye thekuchumi shou inaqhoi jupuku, eno küsaküghami no pa nguno amikuchomi munove kelo iqünhei ngove cheni kea?

¹⁴ Azüghi lo akha toi, eno itikiche lhoxüqo no yepeu küha ketoi Nono timiqo mlae,

¹⁵ Aghümi huno akha kümsüpuyi ngo akhame pesü panongu kümtsü sünhephe; panoqo hakütsüpe ghokütsü keu-a lo süve; eno pa ye alovi eno amloqi ani.

¹⁶ Ikehu pa no aghakishi pesü pa khame tsü eno akümllagho pesü ghokütsü keu khame tsüe; kughengu tipaqo vecheo pa ye tule-pele xüani, eno pa chuqupu ye nibonilei anie.

¹⁷ Imaye pa ye pa khame kümsashi kuthole auve eno alholo kimiyemo mithe shiyeqo ghiqhi auve nani keshea?