Galatiami 6 - Sumi Naga CL (Re-edited) Bible (BSI)

Amakho Putsü Kilelo

¹ Athiküzümiqo, khuana no axine lo ikiqive aye, nongu aghungu lomi no mtshaminhei pa sachile saghilo. Nongu jukuto lo tikumo aye nongu ghi ghukuju lo ilove nosae.

² Lakhino lakhi makho putsü kilelo, tishikeu lono Khristo yezah shikupu tsülo.

³ Kughengu timi lakhino pa ye kiumu kumomu kiuala kepi kümsü aye, pa ye pa ampi pishiqhi anie.

⁴ Ikemu milakhi khino pa kümla pejulo, tishi aye pa kisüghümi sasü kimhe mono pa ampi shou likhi qheza kulupu shi nani.

⁵ Kughengu pütüta müzülo amakho pukepu ani.

⁶ Khuno lau atsape shikave akeno pa ye pa shikükau lau akivi thime kümtsü pesü küsaje masae.

⁷ Nongu pishiqhive pekevilo: Alhou kiphikumo shimlae, kughengu milakhi no kiu xusü keno ti xolu nani.

⁸ Khuu no ashi gholau no xusüni keno, ashi lono shiküpsapu xolu nani, ikemu khuu no Aghungu lono xusüni keno Aghungu launo lhokta küxü xolu nani.

⁹ Ningu akivi mlani keu lo aghüthisüve moni nolo, kughengu ningu no azüzü mono mla aye ado achipi lono xolu nani.

¹⁰ Tishiaye ningu no ado kivi ithuluke kümtsü lo timi kümtsü lau akivi kümla shini, eno akhotoshi khunoqo aküpülü lo kibolomi shive akeno panongu lau mlani nolo.

Ashekhau Ghutu eno Akighini

¹¹ I u no kiyethi kijeshi nongu lau ye akeu julo.

¹² Khunono nongu pelo ashi lono timi shipiye penishi cheni keno, panoqo no tsümomo nongu pelo aphighüyiko ghave penishi ani, tishikeu lono Khristow kros ghenguno panongu ghime pemo niye ke.

¹³ Kughengu khunono aphighüyiko ghave akeno panoqou ghi Ayezah pelu chemoe, ikemu panongu ye nongu pelo aphighüyiko ghave penishi ani, tishikeu lono nongu phiashi vecheo qheza niye ke.

¹⁴ Ikemu I müzülo ni ye ni Mpeu Jisü Khristo kros nguno alau ye khilemu qhezamo nani, kughengu paw kros vecheo ayeghi lo küxü ye I launo yedavae, eno ni ye ayeghi küdau ye thivae.

¹⁵ Kughengu aphighüyiko ghana ghamo namu kiumu akiqi kühae, ikemu lhoxü kithe shiluve keu no akhotou ke.

¹⁶ Khunono hipa khuaye lono checheni keno, aloino keu eno kimiyekini no pano shou, eno Alhouw Israelmi shou apeni.

¹⁷ Hinguno hilauye timi khumu I pünaqhi kevilo, kughengu ni ye I phimpi lo Jisü zaku xapu anie.

¹⁸ Athiküzümiqo, ni Mpeu Jisü Khristow küpükini no nongu ghungu gholo apelo. Amen.