Galatiami 5 - Sumi Naga CL (Re-edited) Bible (BSI)

Khristo no Kuqho phevae

¹ Khristo no ningu pesü ililai keu lo kuqho phevae. Ikehu mtotoi puthugho lo, eno itaghi aqüaxemi kuokhasü xapu kithe kevilo.

² Julo: ni Paul no piani, nongu no aphighüyiko kügha ikhilu aye, Khristo ye nongu vehupu kühavae.

³ Itaghi I no thopi shikithe anike timi khuu no aphighüyiko kügha ikhiluni keno pa ye ayezah kümtsü pelu masae.

⁴ Nongu khunoqo ayezah vecheo achipikani ye pükapütsa ani keno, nongu ye Khristo launo kütüta shivae; nongu ye küpükini lono ikiqivae.

⁵ Kughengu ningu ye Aghungu vecheo aküpülü lono achipikani ke khekulho shi laju ani.

⁶ Kughengu Khristo Jisü küdau ye aphighüyiko ghakeu na ghamo keu namu kihi amoe, ikemu kikimiye vecheo aküpülü lono mlakeu likhino ke.

⁷ Nongu ye akivishi pocheke. Khuu no kuchou gholuni keu lono nongu hachileve kea?

⁸ Hi züiza keu ye khuu nongu kulu keno pa launo kumoe.

⁹ Kholaqhi kitila no asho mqo kuchopu kughunguve cheni.

¹⁰ Nongu ye kütau kükümsü lumo nani kepi ni ye Ampeu lau pükhükibe ani, khuu khuu shi aghimu nongu pünaqhi akeu ye pa no aghime pumasae.

¹¹ Ikemu, athiküzümiqo, tsala I no itehi kutolo aphighüyiko kügha sheshu cheghi aye, kushiye itehimu I ghime aphi kea? Tishini kelo kros lono shokukholu chekeu ye ikhivae.

¹² Khunono nongu pünaqhi ani keno ni ye panongu phighü pichive penishi ani!

¹³ Kughengu athiküzümiqo, nongu ye kuqhopheve keu küxü lo kuluvae. Ikemu nongu no ililaive keu dokivi pesü ashi pulou shi kevilo, ikemu kikimiye lono lakhino lakhi huthu kilelo.

¹⁴ Kughengu Ayezah kuchopu atsathi lakhi lono shikupuvae: “O likhi o toi o kisüghümi kimiyelo.”

¹⁵ Ikemu nongu no lakhino lakhi mikiqhi eno ghüzakile aye lakhino lakhi kütsave moni mala jualo.

Aghungu lono Chechelo

¹⁶ Ikemu I no piani, Aghungu lono chechelo, tishiaye nongu ye ashi lo kimne ghakiqipu shimo nani.

¹⁷ Kughengu ashi lo kimne ye Aghungu sasü küla ani, eno Aghungu pulou ye ashi sasü küla ani, kughengu hi küma ye lakhino lakhi kumgho kile acheni, ti ye nono shinishi keu launo lakhape qhiniye ke.

¹⁸ Ikemu Aghungu no o sache aye, no ye Ayezah qholo kumoe.

¹⁹ Ashi lhoaye ye mtsüqheino hipaqo ke: kipti toti dolo asalha, mithekumo, ngosükümla,

²⁰ ajulho kümlla, atumu, kimthikile, mtomshu, anhekushu, amlokighide, aghükha, kijetha eno kothakile,

²¹ aghichikupo, shokümzü, kuthole chusho keu, eno hitoi keu lhoayeqo. I no azüu no nongu ghutuve ketoi itaghi ghutu ani, khunono hipaqo shicheni keno Alhou yekipe ighimla nani.

²² Ikemu Aghungu xathi ye kikimiye, alokivi, aloino, kutuukulu, kimiyeqhiyi keu, akivi, pükhükulu,

²³ akümtsha, alikhi aghasükulu; hitoi keqo shou ayezah kiumu kühae.

²⁴ Khunono Khristo Jisü laumi keno ashi lo kimne eno pitipüza keu jeli kümtsü kros lono yedavae.

²⁵ Ningu no Aghungu lono xü cheghi aye, ningu Aghungu lono checheni nolo.

²⁶ Ningu qhezamoni momu lakhi no lakhi xukuthomoni momu lakhino lakhi jupe anheshu moni nolo!