Galatiami 4 - Sumi Naga CL (Re-edited) Bible (BSI)

Anuli eno Amheghi Kiyighimi

¹ I no hi piakeu ye, amheghi kiyighiu no izülo aphi loye thokha pa no apighiu shiniye aghi namu aqüaxemi sasü aphiphie,

² ikemu papu no atsala kihitha tsükeu tomoke kutolo pa ye ghaküsümi ngo kughukütsümi qholo acheni.

³ Tipaphi lono ningu ghi kughou nino itimi shiche keno ayeghi lo kükütsü jeli no qhasüpe acheke.

⁴ Ikemu kughou ado kupukülai ighive keno Alhou no Pa Nu puwu, totimi pelo punupe, ayezah qholono punu,

⁵ khunoqo ayezah qholo akeno panongu qhüchile luniye ke, tishikeu lono ningu ghi anuli kuchou shi saputhulu peniye ke.

⁶ Nongu ye anuli akehu Alhou no Pa Nu Ghungu ningu mlolo sütsü no, “Abba, Apuo!” ipi ighalupe cheni.

⁷ Ikehu nongu ye aqüaxemi kumovae, ikemu anu lakhiae, eno anu aye Alhou vecheo amheghi kiyighiu ke.

Galatiami Ghenguno Paul Lokümsü

⁸ Khaghi nongu no Alhou mthano ache kelo, nongu ye alhou kumo keqo qüaxemi shiche.

⁹ Ikemu itehi nongu ye Alhou ithivae, momu Alhou no nongu ithivae, tishiaye kishino itaghi idewo qeinai eno ame küküha ayeghi lo kükütsü jeli no qhasüve penishi eno tipaqo qüaxemi shikitheni shiani kea?

¹⁰ Nongu no atsala, aqhi, atusho eno ampe pini acheni.

¹¹ Ni ye adou lono nongu gholo ime mlache keshela pi msa auvae.

¹² Athiküzümiqo, I no nongu hakite ani, I toi shilo, kughengu ni ghi nongu toi shike. Nongu ye I lau akumou shi püamoe.

¹³ Nongu no ithi anike I philo küsükini akeu ghenguno ni ye atüghüshi nongu lau atsakiviu kütsüe,

¹⁴ eno I phimpi lo küsükini anamu nongu no I thogha momu peve mono Alhouw kungumi toi eno Khristo Jisü toi ni ikhilue.

¹⁵ Tishiaye nongu mlokiqi ye kiu shive akea? Kughengu I no ashepe shi anike nongu ye shikulupu keaye nongu nhethi ghi lejope I tsüveni shiche ke.

¹⁶ I no nongu vilo kuchou tsa pike gheno ni ye nongu ghümi shive akeshea?

¹⁷ Panongu ye akimji kivi kühano nongu züiza ani. Panongu ye nongu pesü ni launo kütüta shive tsünishi ani, tishikeu lono nongu pelo pano lau amlotsü peniye ke.

¹⁸ I no nongu gholo akelo likhino kumo püzü alhokuthu lo akimji kivi ghenguno amlo tsüqhiyi keu ye aloe.

¹⁹ I tianuliqo, nongu lolo Khristo lhophelu moke kutolo ni ye itaghi nongu ghenguno apunu küsü toi süani!

²⁰ Ni ye itehi I tsapi ghola kilive no nongu gholo aghinishi ani, kughengu nongu ghenguno ni ye avehu künacho ani.

Hagar ngo Sarah Kichekipiye

²¹ I vilo pilo, nongu khunoqo ayezah qholo anishi cheni keno, nongu ye ayezah tsa iniju chemo keshea?

²² Kughengu ishi yepüani ke Abraham no anu kini ache, lakhi no aqüaxeu totimi vecheo eno lakhi no ililai xüchekeu totimi vecheo punuke.

²³ Ikemu aqeu nu ye ashi lhoaye lono punu, eno ililai keu nu huno pikiqhitsa vecheo punue.

²⁴ Hi ye akiqipu tsa shi pekide luvi: totimi hi pama ye puloshoqhi kini kiqi. Lakhi no Sinai Naghuto lono, aqüaxe tianuli punu keu; li ye Hagar.

²⁵ Hagar ye Arabia lo Sinai Naghuto, li ye itehi Jerusalem sasü kimhelu ani, kughengu li ye li tianuli sasü aqüaxe lo anike.

²⁶ Ikemu kungugha lo Jerusalem akeu huno ililai keu totimi, li ye ningu paza ke.

²⁷ Kughengu shi yepüani: “Alovilo, anuhau anu iqomo keu; ilhethu ighamkulo, no apunu küsü süju mphi keu! Kughengu no jumuve keu totimi huno akimi akeu nipu nguno alau atianuli ananie.”

²⁸ Itehi nongu athiküzümi ye Isaac toi pikiqhi tianuliqo ke.

²⁹ Ikemu tipau ghuloki lo anu khuu ashi lhoaye lono punu keno pa no Aghungu lono punu keu ghimeqhi ketoi, itehi ghi titoi ani.

³⁰ Ikemu Kuchoyesü ye kiu piani kea? “Aqeu totimi eno li nu haphevelo, kughengu aqeliu nu ye anipu kuchou sasü amheghi ighimo nani.”

³¹ Tighenguno, athiküzümiqo, ningu ye aqemi tianuli kumoe, ikemu anipu kuchou nuliqo ke.