Galatiami 3 - Sumi Naga CL (Re-edited) Bible (BSI)

Aküpülü Keo Akümla Kea?

¹ O Galatiami mbomzümiqo, khuu no nongu shiküghüzüve kea? Jisü Khristo ye nongu nhethe lono pekipheshi yedave ke.

² I no hilikhi nongu vilo ighiju ani: Nongu ye Ayezah pelu keu lono keo aküpülü vecheo chilu keu lono Aghungu ithulu kea?

³ Nongu ye hikithipu shi mbomzü keshea? Aghungu lono huthuve apüzü itehi nongu ye ashi lono kupukülai luniye ani keshea?

⁴ Nongu no adou lono ime püaghi aye, kuchou no nongu ghime ye ame kühave akeshea?

⁵ Khuu no Aghungu nongu tsü eno nongu gholo akümzapu kümlaqo shi keno pa ye Ayezah lono keo aküpülü vecheo chikulu lono kea?

⁶ Abraham ghi “Alhou pülübe, eno tino pa pelo achipikalu peke.”

⁷ Tishiaye khunono aküpülü ani keno panongu no Abraham tianuliqo kepi ithilo.

⁸ Kuchoyesü no azünatha ghi Alhou no Jewkumomi pelo aküpülü vecheo achipikalu penani pi ithi akehu azüu no Abraham lau atsakiviu pikülha no pi, “O vecheo shiye kümtsü kümghatsü nani.”

⁹ Tishiaye, khunono aküpülü ani keno, aküpülü timi Abraham gholono kümghatsü nanie.

Aküpülü vecheo Xünani

¹⁰ Khunono Ayezah pelu keu shou pükhü cheni keno pano ye müsüinivae; kughengu ishi yepüani, “Khunono Ayezah Kaku lo yepüakeu kümtsü pape moni eno tipaqo mla moni keno müsüinivae.”

¹¹ Itehi ye khunomu Ayezah vecheo Alhou lau achipikalu monani pi mtsüqheivae, kughengu “Amikuchomi ye aküpülü vecheo xülu nani.”

¹² Ikemu Ayezah ye aküpülü shou bepe amoe, kughengu ishi yepüani ke, “Timi khuu no tipaqo kümtsü peluni keno pa ye xülu nani.”

¹³ Khristo no ni ghenguno angusüu shive no Ayezah lo müsüini keu lono ningu qhüchile luve—kughengu ishi yepüani, “Khuu no asübo lono tshüqhi pithiveni keno pa ye müsüinivae”—

¹⁴ tishianguno Khristo Jisü launo Jewkumomi lau Abraham kükümgha ighi peniye eno aküpülü vecheo ningu no piqhi püakeu Ghungu ithulu niye ke.

Ayezah eno Pikiqhitsa

¹⁵ Athiküzümiqo, timi küxü lono I no kimghi piyeni: timi dolo puloshoqhi thotsü mlave kethiu ye nuxave mla momu süküqha mlae.

¹⁶ Pikiqhitsa ye Abraham ngo pa tikughuko lau shike. Ti ye kutomo lau pipuku ghi, “Eno atikughukoqo lau” ipimoe, ikemu milakhi, ti ye Khristo, lau pipuku ghi, “Eno o tikughuko lau” ipike.

¹⁷ I no pi akeu ye hike: ampe 430 thiuno ighikeu Yezah huye Alhou no azüu no puloshoqhi shi püakeu hexave moe, eno pikiqhitsa abokümsa shive tsümoke.

¹⁸ Kughengu Ayezah vecheo amheghi ighi cheghi aye, ti ye pikiqhitsa shou bepe anike kumovae; ikemu Alhou no pikiqhitsa vecheo amheghi Abraham tsüe.

¹⁹ Tishiaye kushiye Ayezah tsü kea? Ti ye Axüthi, khuu lau ashoqhi shi keno, pa ighi moke kutolo axine ghenguno süküqha tsüke, eno ti ye kungumi vecheo lacheu u lono pekishe ighike.

²⁰ Lacheu huye amqo lakhi sala likhi kumoe, ikemu Alhou ye lakhie.

²¹ Imaye Ayezah ye Alhouw pikiqhitsa bidelau keo? Khilemu kumoe! Kughengu aküxü ithulu peniye Ayezah tsü püaghi aye, Ayezah vecheo achipikaluni cheke.

²² Ikemu Kuchoyesü no thokha kümtsü axine kütsügha qholo süghivae, tishianguno Jisü Khristo lau aküpülü akeu vecheo pikiqhitsa huye khunono pülü keno pano tsüniye ke.

²³ Aküpülü ighi mphilo ningu ye Ayezah qholo akughu shiche, aküpülü ighini ye akeu piyesü mphi kutolo akughu shiche.

²⁴ Ikehu Khristo ighi mphi kutolo Ayezah no ningu ghaküsüu shiche, tishikeu lono ningu pelo aküpülü vecheo achipikalu peniye ke.

²⁵ Ikemu itehi ye aküpülü ighive ake ningu ye ghaküsüu qholo kumovae,

²⁶ kughengu aküpülü vecheo Khristo Jisü gholono nongu kümtsü Alhou nuli ake.

²⁷ Kughengu nongu khije no Khristo lau baptiz shisü luve akeno Khristo pepu luvae.

²⁸ Ikehu Jewmi ngo Greekmi dolo, aqemi ngo ililai kemi dolo, kiptimi ngo totimi dolo kütüqü keu kühae, kughengu nongu kümtsü Khristo Jisü gholo lakhi shivae.

²⁹ Eno nongu no Khristow ipi aye, nongu ye Abraham polo kughukomi, pikiqhitsa kiqi lono amheghi kiyighimi ake.